ഒന്‍പതു കളികളില്‍ മൂന്നു ജയവും ആറു സമനിലകളുമായി മുന്നേറവേ, അവസാനത്തെ മൂന്നു കളികളില്‍ നിന്നു് ജയിക്കാന്‍ ഒരു സമനില മാത്രം ആവശ്യമായിരുന്നപ്പോള്‍, വിശ്വനാഥന്‍ ആനന്ദ് ലോകചെസ് ചാമ്പ്യന്‍ഷിപ്പിന്റെ പത്താമത്തെ കളിയില്‍ ക്രാംനിക്കിനോടു തോറ്റു.
അതിനെന്തു്? ഇനി രണ്ടു കളികളില്‍ ഒരു സമനില കിട്ടിയാല്‍ പോരേ?
മതി. പക്ഷേ, തോല്‍‌വിയില്‍ അടിപതറിപ്പോകുന്ന കളിക്കാരനായിരുന്നു എന്നും ആനന്ദ്.
1995-ലെ പി. സി. എ. ലോക ചാമ്പ്യന്‍ഷിപ്പ് ഓര്‍മ്മയില്ലേ? ആദ്യത്തെ എട്ടു കളികളില്‍ സമനില വഴങ്ങിയതിനു ശേഷം ഒമ്പതാമത്തെ കളിയില്‍ ആനന്ദ് കാസ്പറോവിനെ തോല്‍പ്പിച്ചതു്. അടുത്ത ചാമ്പ്യന്‍ ആനന്ദു തന്നെ എന്നുറപ്പിച്ചപ്പോഴാണു് പത്താമത്തെ കളിയില്‍ കാസ്പറോവ് ജയിച്ചതു്. അടി പതറിയ ആനന്ദ് പിന്നീടുള്ള അഞ്ചു കളികളില്‍ നാലും തോറ്റു. പതിനൊന്നാമത്തെ കളിയിലെ പരാജയം ഒരു സാധാരണ കളിക്കാരനു പോലും പറ്റാത്ത തരത്തിലുള്ളതായിരുന്നു.
ജയിക്കുന്തോറും അജയ്യനായി മുന്നോട്ടു പോകുമ്പോഴും, തോല്‍‌വിയില്‍ നിന്നു കര കയറാന്‍ ആനന്ദ് പലപ്പോഴും പണിപ്പെട്ടിരുന്നു. 1978-ല്‍ കോര്‍ച്ച്നോയ്ക്കെതിരേ തകര്‍ന്ന നിലയില്‍ നിന്നു കര കയറി അവസാനം ജയിച്ച കാര്‍പ്പോവിനെപ്പോലെയോ, 1984-ലെ ലോകചാമ്പ്യന്‍ഷിപ്പില്‍ 0-5-നു പുറകിലായിട്ടു (6 കളികള്‍ ജയിക്കുന്ന ആളായിരുന്നു ചാമ്പ്യന്‍) പിന്നെ ഒരു കളിയും തോല്‍ക്കാതെ മൂന്നു കളികള്‍ ജയിച്ച കാസ്പറൊവിനെപ്പോലെയോ (ഈ മാച്ച് പിന്നെ നിര്‍ത്തിവെയ്ക്കുകയായിരുന്നു.) തോല്‍‌വിയില്‍ നിന്നു തിരിച്ചുകയറിയ ചരിത്രം ആനന്ദിനില്ല.
എങ്കിലും ഇവിടെ ആനന്ദ് ജയിക്കുമെന്നു തന്നെ കരുതാം. പത്തു കളി കഴിഞ്ഞപ്പോള്‍ ക്രാംനിക്ക് രണ്ടു പോയിന്റ് പുറകിലാണു് (6-4). ജയിക്കാന്‍ ആനന്ദിനു് ഇനിയുള്ള രണ്ടു കളിയില്‍ ഒരു സമനില മാത്രം മതി. അടുത്ത കളിയില്‍ ആനന്ദിനു വെളുത്ത കരുക്കളുമാണു്. മാത്രമല്ല, അടുത്ത രണ്ടു കളിയും തോറ്റാല്‍ത്തന്നെ ടൈബ്രേക്കറില്‍ ജയിക്കാനും അവസരമുണ്ടു്.
എന്തുകൊണ്ടും ആനന്ദ് ജയിക്കും എന്നു തന്നെയാണു് എന്റെ പ്രതീക്ഷയും ആഗ്രഹവും. എങ്കിലും…
(ഫോട്ടോ കടപ്പാടു്: വിക്കിപീഡിയ)
[2008-10-29]: പതിനൊന്നാമത്തെ കളിയില്‍ 24 നീക്കങ്ങള്‍ക്കുള്ളില്‍ സമനില നേടി ആനന്ദ് വീണ്ടും ലോകചാമ്പ്യനായി. സമനിലയ്ക്കു വേണ്ടി കളിക്കാതെ വളരെ ഊര്‍ജ്ജസ്വലമായി കളിച്ചാണു് ആനന്ദ് ഇതു സാധിച്ചതു്. അപകടം നിറഞ്ഞ ഓപ്പനിംഗ് ഉപയോഗിക്കുക മാത്രമല്ല, പന്ത്രണ്ടാം നീക്കത്തില്‍ ഒരു കാലാളിനെ ബലി കഴിക്കുക കൂടി ചെയ്തു ആനന്ദ്.
ഇരുപത്തിരണ്ടാം നീക്കത്തില്‍ ഒന്നുകില്‍ അടിയറവു സംഭവിക്കുക, അല്ലെങ്കില്‍ മന്ത്രിമാരെ പരസ്പരം വെട്ടിമാറ്റുക എന്ന സ്ഥിതിയിലെത്തിയപ്പോള്‍ ക്രാംനിക്കിനു് മന്ത്രിമാരെ ഒഴിവാക്കി സമനിലയില്‍ കൂടുതലായി ഒന്നുമില്ലാത്ത ഒരു സ്ഥിതിയിലേയ്ക്കു പോകേണ്ടി വന്നു.
വെല്‍ ഡണ്‍ ആനന്ദ്! ഇങ്ങനെ തന്നെയാണു സമനില നേടേണ്ടതു്. ഞങ്ങളെല്ലാവരും അഭിമാനിക്കുന്നു.
(ഫോട്ടോ കടപ്പാടു്: സൂസന്‍ പോള്‍ഗാറിന്റെ ബ്ലോഗ്)
M.O.Varma | 28-Oct-08 at 9:25 am | Permalink
സമനിലക്ക് വേണ്ടി കളിച്ചാല്‍ ഇങ്ങനെയിരിക്കും!
ബൂലോഗത്തിലെ ലോക്കല്‍ ആനന്ദായ ഉമേഷ് മാഷേ, എനിക്ക് ചെസ്സ് ശാസ്ത്രീയമായി പഠിക്കണമെന്നുണ്ട്..(ഇറ്റാലിയന്‍ ഡിഫന്‍സ്, ചെക്ലോസോവാക്യന്‍ ഒഫെന്‍സ്, കൂത്താട്ടുകുളം ഓപ്പണിംഗ് എന്നൊക്കെ പറഞ്ഞ് സ്റ്റൈല്‍ ആയിറ്റ്). ഇപ്പോള്‍ വെറും അമേച്വര്‍ കളിയാണ്..പരിസരത്തുള്ളവരെയെല്ലാം ഓടിച്ചിട്ട് പിടിച്ച് കളിച്ചു തോല്‍‌പ്പിച്ചു മടുത്തു.
ഏതെങ്കിലും കൊള്ളാവുന്ന ഫ്രീ ഓണ്‍ലൈന്‍ റിസോഴ്സുകള്‍ വല്ലതും?
jayarajan | 28-Oct-08 at 3:09 pm | Permalink
ആനന്ദ് കറുത്ത കരുക്കളുമായി കളിക്കുമ്പോഴല്ലേ 2 കളിയും ജയിച്ചത്? ഏതായാലും ടൈബ്രേക്കറില്‍ ആനന്ദ് പണ്ടേ സ്പെഷലിസ്റ്റ് ആണല്ലോ? 🙂
അയല്‍ക്കാരന്‍ | 29-Oct-08 at 2:49 am | Permalink
ഉമേഷ്, “1978-ല്‍ കോര്‍ച്ച്നോയ്ക്കെതിരേ തകര്‍ന്ന നിലയില്‍ നിന്നു കര കയറി അവസാനം ജയിച്ച കാര്‍പ്പോവിനെപ്പോലെയോ..” എന്നതില്‍ ഒരു ശങ്ക. കാര്‍പ്പോവ് തകര്‍ന്നനിലയില്‍ എപ്പോഴെങ്കിലും എത്തിയിരുന്നോ? വളരെ ശക്തമായ നിലയില്‍ നിന്നിട്ട് അവസാനം രക്ഷപെടുകയല്ലേ ചെയ്തത്. തകര്‍ന്ന നിലയില്‍നിന്ന് കര കേറുന്നതിന് അടുത്തുവരെ വന്നത് കര്‍ച്ച്നോയിയല്ലേ?
ചെറിയനാടന്‍ | 29-Oct-08 at 1:07 pm | Permalink
ഭാരതത്തിന്റെ അഭിമാനമായ ആനന്ദ് തന്നെ ജയിക്കുമെന്ന്‍ പ്രത്യാശിക്കാം.
വര്‍മ്മാജിയുമായി ഒരു കൈ നോക്കുന്നോ? 🙂
babukalyanam | 29-Oct-08 at 5:22 pm | Permalink
അവസാനം ആനന്ദിന് കിരീടം :-))