കാളിദാസന്റെ അഭിജ്ഞാനശാകുന്തളം നാടകത്തില്‍ നിന്നൊരു ശ്ലോകം:
ആപരിതോഷാദ് വിദുഷാം
ന സാധു മന്യേ പ്രയോഗവിജ്ഞാനം
ബലവദപി ശിക്ഷിതാനാം
ആത്മന്യപ്രത്യയം ചേതഃ
അര്‍ത്ഥം:
| പ്രയോഗവിജ്ഞാനം | : | പ്രയോഗിക്കുന്ന വിജ്ഞാനം |
| വിദുഷാം ആപരിതോഷാത് | : | വിദ്വാന്മാരുടെ അഭിനന്ദനം കിട്ടുന്നതു വരെ |
| സാധു ന മന്യേ | : | വിലയുള്ളതായി കരുതപ്പെടുന്നില്ല |
| ബലവത് ശിക്ഷിതാനാം അപി | : | നല്ലതുപോലെ പഠിച്ചവര്‍ക്കു പോലും |
| ചേതഃ ആത്മനി അപ്രത്യയം | : | മനസ്സു് ആത്മവിശ്വാസമില്ലാത്തതാണു്. |
ബ്ലോഗെഴുത്തുകാര്‍ കമന്റു കാംക്ഷിക്കുന്നതു് ഇതുകൊണ്ടാണോ എന്നറിയില്ല. സീനിയര്‍ ബ്ലോഗര്‍മാര്‍ പുതിയ എഴുത്തുകാരെ തിരിഞ്ഞു നോക്കുന്നില്ല, പ്രോത്സാഹിപ്പിക്കുന്നില്ല എന്ന മുറവിളിയും കേള്‍ക്കാറുണ്ടു്. (എന്താണു് ഈ സീനിയര്‍/ജൂനിയര്‍/സബ് ജൂനിയര്‍ ബ്ലോഗര്‍‌മാരെന്നു് എനിക്കിതു വരെ പിടികിട്ടിയിട്ടില്ല.)
ആവാന്‍ വഴിയില്ല. ആണെങ്കില്‍ കുറേ പോസ്റ്റുകള്‍ എഴുതിക്കഴിയുമ്പോള്‍ ആത്മവിശ്വാസം കിട്ടുകയും കമന്റുകള്‍ക്കു വേണ്ടിയുള്ള മുറവിളി നിര്‍ത്തുകയും ചെയ്യേണ്ടതാണു്. ഇതിനു പറ്റിയ പദ്യം പൂന്താനത്തിന്റെ ജ്ഞാനപ്പാന അല്പം മാറ്റിയാല്‍ കിട്ടും.
എത്രയുണ്ടു കമന്റുകളെങ്കിലും
തൃപ്തിയായിടാ ബ്ലോഗര്‍ക്കൊരു കാലം;
പത്തു കിട്ടുകില്‍ നൂറു മതിയെന്നും
ശതമാകില്‍ സഹസ്രം മതിയെന്നും
ആയിരം കമന്റ് പോസ്റ്റിനുണ്ടാകിലും
അയുതമാകുകിലാശ്ചര്യമെന്നതും
ആശയായുള്ള പാശമതിങ്കേന്നു
വേറിടാതെ വലയുന്നു ബ്ലോഗര്‍മാര്‍
…
സ്ഥാനമാനങ്ങള്‍ ചൊല്ലിക്കലഹിച്ചു
നാണം കെട്ടു നടക്കുന്നിതു ചിലര്‍;
മദമത്സരം ചിന്തിച്ചു ചിന്തിച്ചു
മതി കെട്ടു നടക്കുന്നിതു ചിലര്‍;
ബ്ലോഗകങ്ങളില്‍ സേവകരായിട്ടു
കോലംകെട്ടി ഞെളിയുന്നിതു ചിലര്‍.
…
വിദ്യകൊണ്ടറിയേണ്ടതറിയാതെ
വിദ്വാനെന്നു നടിക്കുന്നിതു ചിലര്‍;
കുങ്കുമത്തിന്റെ ഗന്ധമറിയാതെ
കുങ്കുമം ചുമക്കുമ്പോലെ ഗര്‍ദ്ദഭം.
…
സത്തുക്കള്‍ ചെന്നിരന്നാലുമാക്കമ-
ന്റല്‌പമാത്രം കൊടാ ചില ദുഷ്‌ടന്മാര്‍
ചത്തുപോം നേരം ബ്ലോഗര്‍ പ്രൊഫൈല്‍ പോലു-
മൊത്തിടാ കൊണ്ടുപോവാനൊരുത്തര്‍ക്കും.
…
ഇന്നലെയോളമെന്തെന്നറിഞ്ഞീലാ
ഇന്നി നാളെയുമെന്തെന്നറിഞ്ഞീലാ
ഇന്നിക്കണ്ട ബ്ലോഗിന്നു വിനാശവു-
മിന്ന നേരമെന്നേതുമറിഞ്ഞീലാ.
…
കണ്ടാലൊട്ടറിയുന്നു ചിലരിതു
കണ്ടാലും തിരിയാ ചിലര്‍ക്കേതുമേ.
കണ്ടതൊന്നുമേ സത്യമല്ലെന്നതു
മുമ്പേ കണ്ടിട്ടറിയുന്നിതു ചിലര്‍.
…
കണ്ടു കണ്ടങ്ങിരിക്കും ജനങ്ങളെ-
ക്കണ്ടില്ലെന്നു വരുത്തുന്നതും ബ്ലോഗ്.
രണ്ടു നാലു ദിനംകൊണ്ടൊരുത്തനെ
തണ്ടിലേറ്റി നടത്തുന്നതും ബ്ലോഗ്.
മാളികമുകളേറിയ മന്നന്റെ
തോളില്‍ മാറാപ്പു കേറ്റുന്നതും ബ്ലോഗ്.
…
കുംഭമാസത്തിലാകുന്നു നമ്മുടെ
ജന്മനക്ഷത്രമശ്വതിനാളെന്നും
ശ്രാദ്ധമുണ്ടഹോ വൃശ്‌ചികമാസത്തില്‍
സദ്യയൊന്നുമെളുതല്ലിനിയെന്നും;
ഉണ്ണിയുണ്ടായി വേള്‍പ്പിച്ചതിലൊരു
ഉണ്ണിയുണ്ടായിക്കണ്ടാവു ഞാനെന്നും;
കോണിക്കല്‍ത്തന്നെ വന്ന നിലമിനി-
ക്കാണമെന്നന്നെടുപ്പിക്കരുതെന്നും,
ഇത്‌ഥമോരോന്നു ബ്ലോഗിയിരുന്നീടീല്‍
ഹിറ്റു കിട്ടാതെയായിടും ദൈവമേ!
…
കൂടിയല്ല നാം ബ്ലോഗുന്ന നേരത്തും
കൂടിയല്ല കമന്റുന്ന നേരത്തും
മദ്ധ്യേയിങ്ങനെ കാണുന്ന നേരത്തു
മത്സരിക്കുന്നതെന്തിനു നാം വൃഥാ?
🙂
ആര്യ എന്ന മാത്രാവൃത്തത്തിലുള്ള ഈ ശ്ലോകത്തിനു കേരളവര്‍മ്മ വലിയ കോയിത്തമ്പുരാന്റെ അനുഷ്ടുപ്പിലുള്ള പരിഭാഷ:
വിജ്ഞന്മാരഭിനന്ദിച്ചേ
വിജ്ഞാനം സാധുവായ് വരൂ;
നല്ല ശിക്ഷ കഴിച്ചോര്‍ക്കും
ഇല്ല വിശ്വാസമാത്മനി.
അനില്‍ | 29-Nov-07 at 9:12 am | Permalink
മറ്റു കാര്യങ്ങളൊന്നും അറിയില്ല.
അറിവുള്ളവര്‍ പറഞ്ഞുതന്ന ചില കാര്യങ്ങള്‍ ഇതാ:
സീനിയര്‍=ബ്ലോഗിങ്ങിനു വേണ്ട പല വ്യഞ്ജനങ്ങള്‍ ഉല്പാദിപ്പിച്ചു വിതരണം ചെയ്യുന്ന ആള്‍ക്കാര്‍. സര്‍വീസ്/വിവര പ്രൊവൈഡര്‍മാരെന്നും പറയാം.
ജൂനിയര്‍=മേല്‍പ്പറഞ്ഞ കിടുപിടികള്‍ തിന്ന് ആസ്വദിച്ച് സീനിയേഴ്സിനെ ബഹുമാനിച്ചും ആദരിച്ചും സസുഖം ബ്ലോഗുന്നവര്‍. ലവര്‍ കൊല്ലാന്‍ പറഞ്ഞാല്‍ കൊല്ലാനും ചാവാന്‍ പറഞ്ഞാല്‍ ചാവാനും തയാറായവര്‍.
സബ് ജൂനിയര്‍ =ലതൊന്നും തിന്നാന്‍ കിട്ടുന്നില്ലേ എന്നു വിലപിക്കുന്നവര്‍.
sanathanan | 29-Nov-07 at 9:24 am | Permalink
സംഗതി കൊള്ളാം 🙂
Itival | 29-Nov-07 at 10:08 am | Permalink
എന്തായാലും നന്നായൈ ഉമേഷ്ജി 😉 ഈയടുത്ത് ഒരു വിദ്വാന്‍ കമന്റും ചോദിച്ച് നടപ്പായിരുന്നു, പുതിയവരെ പഴയവര്‍ തിരിഞ്ഞു നോക്കുന്നില്ലേന്നൊക്കെ പരാതിയുമായി..
ഇദ്ദേഹം കഴിഞ്ഞയാഴ്ച ഒരു കഥ എഴുതി പോസ്റ്റി. നല്ല കിണ്ണങ്കാച്ചി പൈങ്കിളി.. നമ്മട മാത്യൂമറ്റത്തിനു വരെ രോമാഞ്ചം വരും..
ഈ കഥ വായിച്ച ഞാന്‍ (സമയമില്ലെങ്കിലും) ഒന്നു കമന്റി.. ഇദ്ദേഹത്തിന്റെ ബ്ലോഗില്‍ “പൈങ്കിളിയാണല്ലോ ചേട്ടാ, എന്നു മാന്യമായി തന്നെ പറഞ്ഞു” !
2 ദിവസം കഴിഞ്ഞ് നോക്കിയപ്പോ ആകമന്റില്ല അവിടെ.. ബ്ലോഗോണര്‍ ഡിലിറ്റു ചെയ്തു 😉 പുള്ളിക്കതങ്ങ് “പ്രയാര്‍” ച്ഛേ പ്രയാസ് ആയി തോന്നിയിരിക്കുന്നു!! ഹെന്താ ചെയ്യാ!!!
കമന്റു ചോദിച്ച് ബ്ലോഗില്‍ വിവാദ പോസ്റ്റിട്ടും തേരാപ്പാര നടന്ന വിദ്വാനാണു , ആ പോസ്റ്റിനു ആകെ കിട്ടിയ 2 കമന്റില്‍ ഒന്നു ഡീലിറ്റിയത്!! ഹോ ഭയങ്കരം!
അപ്പോ ഇതിന്റെയൊക്കെ അര്‍ത്ഥമെന്താ??
“മനോഹരം, ,കിടിലം, കലക്കി , അത്യുജ്ജലം.. എന്നൊക്കെ എഴ്ശുതിയാല്‍ മതി… മറീച്ച് വിമര്‍ശനമോ, ആത്മാര്‍ത്ഥമായ കമന്റോ ഒവേണ്ടാ എന്നാണര്‍ത്ഥം.
എന്തായാലും ഇനി കമംന്റുമ്പോ ഇതൊക്കെ ശ്രദ്ധിച്ചേക്കാം.
ഈ പോസ്റ്റും കലക്കി , അതിഗംഭീരം, അത്യുജ്ജലം 😉
** [ ഇനി ഇതൊക്കെ മാത്രേ കമന്റുകളില്‍ എഴുതൂ, ഈ പോസ്റ്റു മുതല്‍ ശീലിച്ചു തുടങ്ങാം..]
mansoor | 29-Nov-07 at 10:12 am | Permalink
വളരെ മനോഹരമായിരിക്കുന്നു
ഈ അക്ഷരങ്ങളുടെ മായാജാലം
അഭിനന്ദനങ്ങള്‍
നന്‍മകള്‍ നേരുന്നു
പ്രയാസി | 29-Nov-07 at 11:03 am | Permalink
കണ്ടു കണ്ടങ്ങിരിക്കും ജനങ്ങളെ-
ക്കണ്ടില്ലെന്നു വരുത്തുന്നതും ബ്ലോഗ്.
രണ്ടു നാലു ദിനംകൊണ്ടൊരുത്തനെ
തണ്ടിലേറ്റി നടത്തുന്നതും ബ്ലോഗ്.
മാളികമുകളേറിയ മന്നന്റെ
തോളില്‍ മാറാപ്പു കേറ്റുന്നതും ബ്ലോഗ്.
നന്നായി..:)
abhayarthi | 29-Nov-07 at 11:54 am | Permalink
ടുപ്പ്‌ ടുപ്പ്‌ ടുപ്പ്‌ അനുഷ്ട്ടൂപ്പ്‌ വൃത്തത്തില്‍ രണ്ടാം പാദത്തില്‍ മറ്റതില്‍ , നടുക്ക്‌ യതി പാദാതി പൊരുത്തമിത്‌ കാമാക്ഷിയാം.
മറ്റൊന്നിന്‍ നര്‍മ യോഗത്തില്‍ അതു തന്നല്ലിയോ ഇത്‌ എന്ന്‌വര്‍ണ്യത്തില്‍
രണ്ടിലൊന്നിനാശംക ഇശ്ശിലിതന്‍ പേര്‍ ഉല്‍പ്പലാക്ഷിയാം.
വൃത്ത ഭംഗി അശേഷം പോയിട്ടില്ല…
ഉമേശന്‍ സാറ്‌ പാരഡിയെഴുതിയാല്‍ വ്യാകരണവും വിമര്‍ശനവും ഞാനെഴുതുമേ….
രസിച്ചു.
മൂര്‍ത്തി | 29-Nov-07 at 12:22 pm | Permalink
🙂
ഷെയറിംഗ് ലിസ്റ്റുകളൊക്കെ വ്യാപകമായാല്‍ എത്ര പേര്‍ ഷെയര്‍ ചെയ്തു എന്നറിയാനാവും താല്പര്യം.
vadavosky | 29-Nov-07 at 2:24 pm | Permalink
പോസ്റ്റിട്ടാല്‍ ആരും കമന്റുചോദിച്ച്‌ നടക്കേണ്ട കാര്യമൊന്നുമില്ല. ഞാന്‍ പുതിയ ബ്ലോഗറാണ്‌. ഇന്നലെ ( 28th November) ഞാനിട്ട പോസ്റ്റിന്‌ ആറു പേര്‍ കമന്റിട്ടു.222 ഹിറ്റുകള്‍ ഇന്നലെ മാത്രം ഉണ്ട്‌. ( ചിലപ്പോള്‍ യന്ത്രത്തകരാറായിരിക്കണം) ബൂലോഗമെന്താണെന്നു മനസ്സിലാക്കാന്‍ ഇല്ലാത്ത സമയമുണ്ടാക്കി ഒരു അഗ്രഗേറ്ററില്‍ വരുന്ന പോസ്റ്റെല്ലാം വായിച്ചുനോക്കിയപ്പോള്‍ മനസ്സിലായത്‌ വളരെ മോശം പോസ്റ്റ് ആയാലും അതിന്‌ കുറെ cheerleaders ഉണ്ടാവും.ചിലപ്പോള്‍ mutual admiration society membersന്റെ കമന്റുകള്‍ ആയിരിക്കും. കമന്റുകിട്ടുന്നതിന്റെ എണ്ണം ഒരു അളവുകോലല്ല. അതിനുദാഹരണം അനോണീ ആന്റണിയുടെ അന്‍പതാം പോസ്റ്റിലുണ്ട്‌. നല്ല പോസ്റ്റെഴുതിയാല്‍ ഒരു ക്ലബ്ബില്‍ ചേര്‍ന്നില്ലെങ്കിലും സീനിയര്‍ ജൂനിയര്‍ വ്യതാസമില്ലാതെ ആളുകള്‍ വായിക്കും. അല്ലാത്തവനെ ജനം പായിക്കും. ( ഒരു രഹസ്യം കൂടി ഞാന്‍ മനസ്സിലാക്കി. പോസ്റ്റിന്റെ തലക്കെട്ടില്‍ പുലി എന്നെഴുതുക. എന്റെ പോസ്റ്റിന്റെ തലക്കെട്ടില്‍ പുലി കണ്ടപ്പോള്‍ ആളുകള്‍ ഓടിക്കൂടിയതുകൊണ്ടാണ്‌ എനിക്ക്‌ ഹിറ്റ്‌ കൂടാന്‍ കാരണം. പുതിയ ബ്ലോഗര്‍മാര്‍ക്ക്‌ പരീക്ഷിക്കാവുന്നതാണ്‌ പുലിക്കവിത, പുലിക്കഥ,ബ്ലോഗും പുലിയും, പുപ്പുലി. പോസ്റ്റിന്‌ പുലിയുമായി ബന്ധമൊന്നും വേണ്ട)
Aravind | 29-Nov-07 at 2:24 pm | Permalink
ഉമേഷ് ആചാര്യ് (ഇത്തിരി സ്റ്റൈല്‍ ഇരുന്നോട്ടെ) ഇത്തിരികൂടി കനപ്പെട്ട വിഷയങ്ങള്‍ കൈകാര്യം ചെയ്യണമെന്ന് (എന്നാല്‍ ഓവറാക്കല്ല്) അഭ്യര്‍ത്ഥിക്കുകയാണ്, അപേക്ഷിക്കുകയാണ്.
(ഇടിഗഡീ, കമന്റ് കലക്കി…ഗഡിയെ കാണാന്‍ ഇപ്പോ ഉമേഷ്ജിയുടെ ബ്ലോഗില്‍ വരേണ്ട ഗത്യായി. ടൈം!)
മുരളി മേനോന്‍ | 29-Nov-07 at 2:57 pm | Permalink
എന്താപ്പോ ഇണ്ടായേ,, ഇതൊക്കെ കണ്ടും കേട്ടും മനസ്സിനൊരു മടുപ്പ് വന്നു തുടങ്ങ്യോ… രംഗങ്ങള്‍ മാറും, വേഷങ്ങള്‍ മാറും….പിന്നേയും തുടര്‍ന്നുകൊണ്ടിരിക്കും, പല രൂപത്തില്‍ ഭാവത്തില്‍…
നമുക്ക് ചെയ്യാനുള്ളത് ചെയ്ത് അരങ്ങൊഴിയുക…..
ഭാവുകങ്ങള്‍!!
keralafarmer | 29-Nov-07 at 3:28 pm | Permalink
🙂
wakaari | 29-Nov-07 at 5:29 pm | Permalink
എന്റെ ഒരു സുഹൃത്തിന് “ഹൌ ആര്‍ യു” എന്ന് ചോദിച്ച് ഒരു മെയിലയച്ചു. കൃത്യം ഒരു കൊല്ലവും രണ്ട് മാസവും കഴിഞ്ഞപ്പോള്‍ മറുപടി വന്നു-
“ഐ ആം ഫൈന്‍, താങ്ക്യൂ”.
2006 ഡിസംബറില്‍ ഒരനോണി ഉമേഷ്‌ജിയോട് ചോദിച്ചു-“ക്യാന്‍ ഐ കോണ്‍‌ടാക്ട് യു ബൈ ഈമെയില്‍?”
ഒന്‍‌പത് മാസം കഴിഞ്ഞപ്പോള്‍ ഉമേഷ്ജി മറുപടിയെഴുതി:
“ഒഫ് കോഴ്‌സ് , യൂ ക്യാന്‍ കോണ്‍‌ടാക്ട് മി”
പോസ്റ്റിന്റെ ലക്ഷണം കണ്ടിട്ട് കൊല്ലവര്‍ഷം അഞ്ഞൂറാമാണ്ടില്‍ നടന്ന എന്തോ സംഭവത്തോടനുബന്ധിച്ചെഴുതിയ പോസ്റ്റാണോ എന്ന് വര്‍ണ്ണ്യത്തിലാശങ്കയുള്ളതുകാരണം ഉല്‍‌പ്രേക്ഷാഖ്യ കുളം‌കലക്കി.
🙂
സന്തോഷ് | 29-Nov-07 at 5:39 pm | Permalink
കുംഭമാസത്തിലാകുന്നു എന്നു തുടങ്ങുന്ന ഭാഗം എന്നെ ഉദ്ദേശിച്ചാണ്, എന്നെ മാത്രം ഉദ്ദേശിച്ചാണെന്ന് പകല്‍ പോലെ വ്യക്തം. ഈ സീനിയര്‍ ബ്ലോഗറിന്‍റെ ഒരു കാര്യം.
wakaari | 29-Nov-07 at 6:00 pm | Permalink
വിദ്യകൊണ്ടറിയേണ്ടതറിയാതെ എന്ന ഭാഗം ദേവേട്ടനെ ഉദ്ദേശിച്ചാണെന്നാണ് തോന്നുന്നത്. അതിന്റെ അവസാനം ദേവേട്ടനെ കഴുതേ എന്ന് വിളിക്കുകയും ചെയ്തു – കഷ്ടം എന്നല്ലാതെ എന്തെങ്കിലും പറയണോ? ഇത്ര സീനിയറാണെന്നോര്‍ത്തില്ല 🙂
Umesh:ഉമേഷ് | 29-Nov-07 at 6:21 pm | Permalink
ആ ഭാഗം എന്നെപ്പറ്റിയാണു് എന്നു വക്കാരി കണ്ടുപിടിക്കും എന്നായിരുന്നു എന്റെ വിശ്വാസം. വക്കാരി എന്നെയും കടത്തി വെട്ടി.
വക്കാരീ, നിന്‍ പാദം മൂടും ചെരുപ്പിന്‍ വാറഴിക്കാന്‍ പുണ്യം കിട്ടാന്‍ ഞാന്‍ എത്ര മന്വന്തരം കാത്തിരിക്കണം?
അരവിന്ദോ, കണ്ട്രോള്‍, ക്ഷമ, വക്കാരീസ് ടിപ്സ്… ഗമണ്ടന്‍ പോസ്റ്റൊക്കെ വരുന്നുണ്ടു്. തത്ക്കാലം ഇതു കൊണ്ടു തൃപ്തിപ്പെടു്.
എല്ലാവര്‍ക്കും നന്ദി.
InjiPennu | 29-Nov-07 at 6:42 pm | Permalink
ഹഹ! ആ ഗമണ്ടന്‍ പോസ്റ്റ് വരുന്നുണ്ട് എന്നുള്ള ഭീഷണി കണ്ടിട്ട് ചിരിച്ചിട്ട് പൂവാന്ന് കരുതി!
വാല്‍മീകി | 30-Nov-07 at 4:02 am | Permalink
നന്നായി ഉമേഷേട്ടാ… നല്ല വരികള്‍.
Su | 30-Nov-07 at 4:47 am | Permalink
“ഇത്‌ഥമോരോന്നു ബ്ലോഗിയിരിക്കവേ
ചത്തുപോകുന്നു പാവം ശിവ! ശിവ!”
ഞാനൊന്നും പറയുന്നില്ല.
അങ്കിള്‍ | 30-Nov-07 at 5:21 am | Permalink
പ്രീയ ഉമേഷ്.
കമന്റുകളെപ്പറ്റി പറഞ്ഞ കാര്യങ്ങളൊന്നും എന്റെ ബ്ലോഗില്‍ ബാധകമല്ല. കാരണം, അവിടെ ഞാന്‍ മാത്രമേ കമന്റാറുള്ളൂ.
സഹയാത്രികന്‍ | 30-Nov-07 at 9:51 am | Permalink
“സ്ഥാനമാനങ്ങള്‍ ചൊല്ലിക്കലഹിച്ചു
നാണം കെട്ടു നടക്കുന്നിതു ചിലര്‍;
മദമത്സരം ചിന്തിച്ചു ചിന്തിച്ചു
മതി കെട്ടു നടക്കുന്നിതു ചിലര്‍;
ബ്ലോഗകങ്ങളില്‍ സേവകരായിട്ടു
കോലംകെട്ടി ഞെളിയുന്നിതു ചിലര്‍“
ഉമേഷ് ജി… ഇതസ്സലായി
🙂
Jayarajan | 01-Dec-07 at 5:42 am | Permalink
കൊള്ളാം ഉമേഷ് ജീ, രസിച്ചു.
“പോസ്റ്റിന്റെ ലക്ഷണം കണ്ടിട്ട് കൊല്ലവര്‍ഷം അഞ്ഞൂറാമാണ്ടില്‍ നടന്ന എന്തോ സംഭവത്തോടനുബന്ധിച്ചെഴുതിയ പോസ്റ്റാണോ എന്ന് വര്‍ണ്ണ്യത്തിലാശങ്കയുള്ളതുകാരണം ഉല്‍‌പ്രേക്ഷാഖ്യ കുളം‌കലക്കി”
വക്കാരീ, ചിരിപ്പിച്ചൂ, ട്ടോ 🙂
ദേവന്‍ | 04-Dec-07 at 5:10 am | Permalink
ശെഡ്ഡാ, വായിച്ചിട്ട് ഒരു കാര്യം പറയാം എന്ന് വച്ചപ്പോഴേക്ക് അത് വക്കാരി പറഞ്ഞു.
വിദ്യ “കൊണ്ടറിയേണ്ടത്” അറിഞ്ഞിട്ടില്ലെന്ന് പറഞ്ഞത് എന്നെക്കൊണ്ട് ഭാര്യയെ തല്ലിക്കാന്‍ ആണോന്നും സംശയം. പിന്നെ ഈ ഗര്‍ദ്ദഭം, നാട്യക്കാരന്‍ എന്നുള്ള വിളിയൊന്നും ഏല്‍ക്കില്ല, ഇതിലും വലുത് എത്ര ഏതൊക്കെ ഗുരുക്കന്മാരു വിളിച്ചിരിക്കുന്നു എന്നെ.
അനിലേട്ടോ
ആരാണു സീനിയര്‍? അവനവന്‍ ബ്ലോഗ്ഗര്‍ ഐഡി തുടങ്ങുന്നതിന്റെ തലേ ദിവസം വരെ ഉള്ളവര്‍ സീനിയര്‍.
ആരാണു ജൂനിയര്‍? അവനവന്‍ തന്നെ.
ആരാണു സബ് ജൂനിയര്‍? അവനവന്‍ ബ്ലോഗ് തുടങ്ങി അടുത്ത ദിവസം മുതല്‍ വരുന്നവര്‍.
ഇങ്ങനെയല്ലേ ഈ സീനിയോറിറ്റി കണ്‍‌വെന്‍ഷന്‍?
ഇടിവാളേ,
ഞാന്‍ പണ്ടേ പറഞ്ഞതാ സ്പാം ബോട്ട് പോലെ ഒരു കമന്റ് ബോട്ട് ആരെങ്കിലും എഴുതാന്‍. കമന്റ് വേണമെന്നുള്ളവര്‍ ആ വേഡ് വേരി എടുത്തു കളഞ്ഞാല്‍ മതി, ബോട്ട് ഇക്കണ്ട ആയിരം ബ്ലോഗര്‍മാരുടെ പേരിലും “അടിപൊളി, സൂപ്പര്‍, നമിച്ചു, കലക്കി” എന്നൊക്കെ കമന്റ് തനിയേ ഇട്ടോളുമല്ലോ.
വടവോസ്കി, ശ്രദ്ധിക്കപ്പെടാന്‍ പോസ്റ്റു പോലും വേണമെന്നില്ലന്നേ. നിങ്ങളുടെ ബ്ലോഗ് ഞാന്‍ ഇതുവരെ കണ്ടില്ല, പക്ഷേ വേറേ രണ്ടിടത്ത് കമന്റ് കണ്ടപ്പോള്‍ ആളെ ശ്രദ്ധിച്ചു.
Rajesh R Varma | 09-Dec-07 at 8:21 am | Permalink
ഏതെങ്കിലുമൊരു ജാംബവാന്റെ പ്രശംസകേട്ടു മാത്രം സ്വയം മതിപ്പുണ്ടാകുന്ന ഒരു ഹനുമാന്‍ എല്ലാവരുടെയും ഉള്ളിലുണ്ടെന്നു തോന്നുന്നു. പ്രതിഭ വിജയത്തിന്റെ മുന്‍പില്‍ നമിച്ചുനില്‍ക്കുന്നു എന്നോ മറ്റോ ഒരു പറച്ചിലുണ്ട്‌. അതനുസരിച്ച്‌ എന്റെ ബ്ലോഗിനെക്കാള്‍ ഒരു ഹിറ്റ്‌ കൗണ്ട്‌/റീഡര്‍ ലിസ്റ്റിങ്ങ്‌ എങ്കിലും കൂടുതലുള്ള ബ്ലോഗന്‍ സീനിയര്‍. ഒന്നെങ്കിലും കുറവുള്ളവന്‍ ജൂനിയര്‍. പത്രലേഖനങ്ങളിലും മറ്റും പേരുവന്നിട്ടുള്ളവര്‍, അച്ചടി-ദൃശ്യ-ശ്രാവ്യ മാധ്യമങ്ങളില്‍ സാന്നിധ്യമുള്ളവര്‍ തുടങ്ങിയവര്‍ സൂപ്പര്‍ സീനിയര്‍.