മാതാപിതാക്കളെപ്പോലെ കരുതേണ്ട ആളുകളെപ്പറ്റി പ്രറ്സ്താവിക്കുന്ന ശ്ലോകങ്ങള്‍:
ജനിതാ ചോപനേതാ ച
യസ്തു വിദ്യാം പ്രയച്ഛതി
അന്നദാതാ ഭയത്രാതാ
പഞ്ചൈതേ പിതരഃ സ്മൃതാഃ
അര്‍ത്ഥം:
| ജനിതാ ച | : | ജനിപ്പിച്ചവനും |
| ഉപനേതാ ച | : | ഉപനയനം ചെയ്യിച്ചവനും |
| യഃ തു വിദ്യാം പ്രയച്ഛതി | : | വിദ്യ പകര്‍ന്നു തരുന്നവനും |
| അന്നദാതാ | : | ഭക്ഷണം തരുന്നവനും (തീറ്റിപ്പോറ്റുന്നവനും) |
| ഭയത്രാതാ | : | ഭയത്തില്‍ നിന്നു രക്ഷിക്കുന്നവനും |
| ഏതേ പഞ്ച | : | ഈ അഞ്ചു പേര്‍ |
| പിതരഃ സ്മൃതാഃ | : | പിതാക്കന്മാരാണു് |
ഗുരുപത്നീ രാജപത്നീ
ജ്യേഷ്ഠപത്നീ തഥൈവ ച
പത്നീമാതാ സ്വമാതാ ച
പഞ്ചൈതേ മാതരഃ സ്മൃതാഃ
അര്‍ത്ഥം:
| ഗുരുപത്നീ | : | ഗുരുവിന്റെ ഭാര്യ |
| രാജപത്നീ | : | രാജാവിന്റെ ഭാര്യ |
| ജ്യേഷ്ഠപത്നീ | : | ജ്യേഷ്ഠന്റെ ഭാര്യ |
| തഥാ ഏവ ച | : | അതുപോലെ |
| പത്നീമാതാ | : | ഭാര്യയുടെ അമ്മ |
| സ്വമാതാ ച | : | സ്വന്തം മാതാവു് |
| ഏതേ പഞ്ച | : | ഈ അഞ്ചു പേര്‍ |
| മാതരഃ സ്മൃതാഃ | : | മാതാക്കളായി കരുതപ്പെടേണ്ടവരാണു്. |
ചില വ്യത്യാസങ്ങളോടെ ഇന്നത്തെ കാലത്തും ഇവ ഉപയോഗിക്കാം
- “ഉപനയനം ചെയ്യിച്ചവന്‍” എന്ന വിഭാഗത്തില്‍ എഴുത്തിനിരുത്തിയവന്‍, തലതൊട്ടപ്പന്‍, സ്കൂളില്‍ ചേര്‍ത്തവന്‍, ജോലി തന്നവന്‍ എന്നിവരെക്കൂടി ചേര്‍ക്കാം.
- “അന്നദാതാ” എന്ന വിഭാഗത്തില്‍ മേലുദ്യോഗസ്ഥനെക്കൂടി ചേര്‍ക്കാം.
- “ഭയത്രാതാ” എന്ന വിഭാഗത്തില്‍പ്രധാനമന്ത്രി, മുഖ്യമന്ത്രി, മുഖ്യമന്ത്രി, പഞ്ചായത്തു പ്രസിഡണ്ടു്, പഞ്ചായത്തു മെമ്പര്‍, സ്ഥലം എസ്. ഐ. തുടങ്ങിയ പദവിയില്‍ ഇരിക്കുന്ന പുരുഷന്മാരെ ഉള്‍പ്പെടുത്താം.
- ഗുരുപത്നിയ്ക്കു് ഇപ്പോള്‍ വലിയ പ്രാധാന്യമില്ല. ആ സ്ഥാനത്തു് അദ്ധ്യാപികയെ ചേര്‍ക്കാം.
- രാജപത്നിയുടെ സ്ഥാനത്തു് പ്രധാനമന്ത്രി, മുഖ്യമന്ത്രി, മുഖ്യമന്ത്രി, പഞ്ചായത്തു പ്രസിഡണ്ടു്, പഞ്ചായത്തു മെമ്പര്‍ തുടങ്ങിയ പദവിയില്‍ ഇരിക്കുന്ന സ്ത്രീകളെ ഉള്‍പ്പെടുത്താം.
- സ്ത്രീകള്‍ക്കു് പത്നീമാതാവിന്റെ സ്ഥാനത്തു ഭര്‍ത്താവിന്റെ അമ്മയെ ഉള്‍പ്പെടുത്താം.
Umesh | 10-Jun-06 at 12:48 am | Permalink
സുഭാഷിതം: മാതാപിതാക്കളെപ്പോലെ കരുതേണ്ടവര്‍.
Shaniyan | 10-Jun-06 at 1:04 am | Permalink
ഉമേഷ്ജീ,
മാതാ പിതാ ഗുരുഃ ദൈവം..
ഇതിന്റെ ബാക്കി?
Umesh | 10-Jun-06 at 1:06 am | Permalink
പിടിയില്ല ശനിയാ. അതൊരു പൂര്‍ണ്ണവാക്യമാണെന്നു തോന്നുന്നു. ശ്ലോ‍കമല്ലായിരിക്കും.
അരവിന്ദന്‍ | 10-Jun-06 at 7:50 am | Permalink
ഉമേഷ്ജ്യേ..പതിവ് പോലെ അറിവിന്റെ തിളങ്ങുന്ന മുത്ത്. 🙂
പക്ഷേ..
സ്വന്തം മാതാവിനെ മാതാവായി കരുതണം എന്ന് പറയുമ്പോ…
ഒരു കന്‍ഫ്യൊഷന്‍. അത് ഇം‌പ്ലീസിറ്റ് അല്ലേ? അതു പോലെ കരുതേണ്ടവരെക്കുറിച്ചല്ലേ ശ്ലോകം?
devanand | 10-Jun-06 at 8:36 am | Permalink
ഇതിലെ സ്മൃതാ എന്നതിനു “generally referred to as ” എന്ന അര്‍ത്ഥമാണെന്നു തോന്നുന്നു
മാസ്റ്റ്രേ
മന്ത്രാങ്കം എന്ന “ഗൈഡ്‌ റ്റു ചാക്യാര്‍ ഫോര്‍ സക്സസ്സ്ഫുള്‍ കൂത്ത്‌” കിത്താബില്‍ ആണു ഞാന്‍ പഞ്ച പിതാ-മാതാ ഡെഫനിഷന്‍ കണ്ടത്‌. ഒറിജിനലി ഇത്‌ എവിടെത്തെയാ? .
devanand | 10-Jun-06 at 8:38 am | Permalink
“ഇതിലെ സ്മൃതാ എന്നതിനു “generally referred to as ” എന്ന അര്‍ത്ഥമാണെന്നു തോന്നുന്നു ” എന്ന ഗീര്‍വ്വാണ്‍സ്‌ “സ്വന്തം മാതാവിനെ മാതാവായി കരുതണം എന്ന് പറയുമ്പോ”…> എന്ന അരവിന്ദ ഡവുട്ടിന്റെ മറുവടി ആയിരുന്നേ..
കലേഷ് | 10-Jun-06 at 9:30 am | Permalink
ഉമേഷേട്ടാ, ഈ ശ്ലോകങ്ങള്‍ എവിടെനിന്നാന്നൂടൊന്നു പറഞ്ഞു തരാമോ?
Umesh | 10-Jun-06 at 2:04 pm | Permalink
അരവിന്ദാ,
സ്വന്തം അച്ഛനെ (ജനിതാ) പിതാവായും, അമ്മയെ മാതാവായും കാണണം എന്നു പറയുന്നതിലെന്താ തെറ്റു്? ആ ലിസ്റ്റില്‍ സ്വന്തം അമ്മയില്ലായിരുന്നെങ്കില്‍ അരവിന്ദന്‍ ചോദിക്കില്ലായിരുന്നോ, “ഹല്ല, ഇവരെല്ലാമുണ്ടു്, സ്വന്തം അമ്മ മാത്രമില്ല. ഇതെന്തു കാര്യം?” എന്നു്.
മറ്റൊരു കാര്യം, സ്വന്തം അച്ഛനമ്മമാരെപ്പോലെ, ഇവരും ആദരണീയരാണു് എന്നുള്ള കാര്യം.
കലേഷേ, ദേവാ,
ആരെഴുതിയെന്നറിയാമെങ്കില്‍ ഞാന്‍ ആ വിവരംകൊടുക്കും. ഇല്ലെങ്കില്‍ എനിക്കറിയില്ല. മിക്കവാറും ആര്‍ക്കും അറിയില്ല.
ഈ രണ്ടു ശ്ലോകങ്ങള്‍ ഞാന്‍ ആദ്യം കാണുന്നതു്‌ ഉത്സവപ്പറമ്പിലും മറ്റും കിട്ടുമായിരുന്ന “നീതിസാരം”എന്ന ചെറിയ പുസ്തകത്തിലാണു്. അതു് ഏതെങ്കിലും ഒരാള്‍ എഴുതിയതല്ല.
ഞാന്‍ “സുഭാഷിത”ത്തില്‍ ഇതു വരെ എഴുതിയ ശ്ലോകങ്ങളെല്ലാം ഓര്‍മ്മയില്‍ നിന്നെഴുതിയതാണു്. ഇതൊക്കെ വായിച്ചതു പത്തിരുപത്തഞ്ചു കൊല്ലം മുമ്പുമാണു്. ആരുടെയെങ്കിലും കയ്യില്‍ ഈ ശ്ലോകങ്ങളുള്ള പുസ്തകങ്ങളുണ്ടെങ്കില്‍ ദയവായി തിരുത്തുക.
Umesh | 10-Jun-06 at 2:06 pm | Permalink
അരവിന്ദാ,
അമ്മായിയമ്മയെ അമ്മയായി സ്നേഹിച്ചു സ്നേഹിച്ചു് സ്വന്തം അമ്മയെ മറന്നുപോകരുതു് എന്നുമാവാമല്ലോ 🙂
Ragesh | 10-Jun-06 at 4:42 pm | Permalink
രാജപത്നിയുടെ സ്ഥാനത്തു് പ്രധാനമന്ത്രി, മുഖ്യമന്ത്രി, മുഖ്യമന്ത്രി, പഞ്ചായത്തു പ്രസിഡണ്ടു്, പഞ്ചായത്തു മെമ്പര്‍ തുടങ്ങിയ പദവിയില്‍ ഇരിക്കുന്ന സ്ത്രീകളെ ഉള്‍പ്പെടുത്താം. – അയ്യോ……കുഞ്ഞാലികുട്ടിയുടെ ഭാര്യയേയും, മുരളി മന്ത്രിയായാല്‍, അദ്യത്തിന്റ്റെ ഭാര്യയേയും, എല്ലാം രാജപത്നീ സ്ഥാനം കൊടുത്താചരിക്കേണ്ടി വരുമോ കടവുളേ….കാപ്പാത്തുങ്കോ.
Umesh | 12-Jun-06 at 7:51 pm | Permalink
കുറുമാനേ,
കുഞ്ഞാലിക്കുട്ടിയുടെ ഭാര്യയെ ഉള്‍പ്പെടുത്തണമെന്നല്ല ഞാന്‍ പറഞ്ഞതു്. ഇന്ദിരാഗാന്ധി, കെ. ആര്‍. ഗൌരിയമ്മ, ശ്രീമതിട്ടീച്ചര്‍ തുടങ്ങി ആ പദവികള്‍ വഹിച്ചിട്ടുള്ള സ്ത്രീകള്‍ എന്നാണു്. അങ്ങനെയല്ലെന്നു തോന്നുമോ വായിച്ചാല്‍?
ഏവൂരാന്‍ | 12-Jun-06 at 9:17 pm | Permalink
കുഞ്ഞാലിക്കുട്ടിക്കതിന് ഭാര്യയുണ്ടോ? ഇല്ലല്ലോ?
അങ്ങേര്‍ അവിവാഹിതനല്ലേ?
ബ്രഹ്മാവിനാണോ ആയുസ്സിന് പഞ്ഞം? 🙂
paappaan | 12-Jun-06 at 10:42 pm | Permalink
“അമ്മായിയമ്മയെയമ്മിമേല്‍ വച്ചിട്ട്
നല്ലോരു കല്ലോണ്ടു നാരായണാ”
എന്നൊരു പദ്യശകലം പണ്ട് സര്‍‌വവിജ്ഞാനകോശത്തില്‍ വായിച്ചിട്ടുണ്ട്
Rajesh R Varma | 16-Jun-06 at 7:49 pm | Permalink
ഉമേഷേ,
ഇതുപോലെ മറ്റൊരു പുരാതനഗ്രന്ഥത്തില്‍ ഭാര്യമാരുടെ വിവരണമുണ്ട്‌. മൂലം ഓര്‍മ്മയില്ല. ഒരു വിവര്‍ത്തനം കൊടുക്കുന്നു:
അധ്യാപിക,യയല്‍ക്കാരി,
സഹജന്‍ തന്റെ പത്നിയും,
ഭാര്യതന്‍ തോഴിയും പിന്നെ
ശിഷ്യയും നേഴ്‌സുമങ്ങനെ
വേലക്കാരി, കളിത്തോഴി,
കൊളീഗും പുരനാരിയും
സ്വന്തം ഭാര്യയുമെന്നേവം
ഭാര്യമാര്‍ പതിനൊന്നിനം.
🙂
Umesh | 18-Jun-06 at 12:51 am | Permalink
രാജേഷേ, അതു കലക്കി!
കൂടെപ്പഠിച്ചവളെ എന്തേ കൂട്ടിയില്ല? പ്രത്യേകിച്ചു ലാബ്‌മേറ്റിനെ?
മറ്റുള്ള പെണ്‍‌പിള്ളേര്‍ കേവലം കൂട്ടുകാര്‍
മര്‍ത്യന്നു പൊണ്ടാട്ടി ലാബ്‌മേറ്റു താന്‍
എന്നല്ലേ മഹാകവിവചനം?
🙂
ശ്രീഹരി::Sreehari | 08-May-09 at 8:11 pm | Permalink
“മറ്റുള്ള പെണ്‍‌പിള്ളേര്‍ കേവലം കൂട്ടുകാര്‍
മര്‍ത്യന്നു പൊണ്ടാട്ടി ലാബ്‌മേറ്റു താന്‍”
ഞങ്ങടെ ലാബില്‍ വന്നിട്ടുണ്ടോ?
babukalyanam | 13-Feb-10 at 6:58 pm | Permalink
“ഭാര്യമാര്‍ പതിനൊന്നിനം.”
🙂