വിവരമില്ലാത്തവന്റെ അഹങ്കാരം:
ഇന്ദ്രനീലേ ന രാഗോऽസ്തി
പദ്മരാഗേ ന നീലിമാ
ഉഭയം മയി ഭാതീതി
ഹന്ത ഗുഞ്ജാ വിജൃംഭതേ
അര്‍ത്ഥം:
| ഇന്ദ്രനീലേ രാഗഃ ന അസ്തി | : | ഇന്ദ്രനീലത്തില്‍ ചുവപ്പില്ല |
| പദ്മരാഗേ നീലിമാ ന (അസ്തി) | : | പദ്മരാഗത്തില്‍ നീലയില്ല |
| ഉഭയം മയി ഭാതി ഇതി | : | ഇതു രണ്ടും എന്നിലുണ്ടു് എന്നു് |
| ഹന്ത, ഗുഞ്ജാ വിജൃംഭതേ | : | കുന്നിക്കുരു അഹങ്കരിക്കുന്നു. |
നീലനിറമുള്ള ഇന്ദ്രനീലവും ചുവന്ന നിറമുള്ള പദ്മരാഗവും വിലയേറിയ രത്നങ്ങളാണു്. രണ്ടു നിറവുമുള്ള കുന്നിക്കുരുവാകട്ടേ, തീരെ വില കുറഞ്ഞതും.
എക്കാലത്തും പ്രസക്തമായ ഒരു ഉപാലംഭം. ഇത്തരം കുന്നിക്കുരുക്കളെ രാഷ്ട്രീയത്തിലും സാഹിത്യചര്‍ച്ചകളിലും ധാരാളം കാണാം.
Umesh | 09-Jun-06 at 9:41 am | Permalink
സുഭാഷിതം: കുന്നിക്കുരുവിന്റെ അഹങ്കാരം.
രാജ് | 09-Jun-06 at 12:46 pm | Permalink
സാഹിത്യചര്‍ച്ചകളിലോ സാഹിത്യലോകത്തോ?
ശനിയന്‍ | 09-Jun-06 at 1:27 pm | Permalink
എല്ലായിടത്തും അതു തന്നെ കഥ.. നമ്മുടെ ആപ്പീസില്‍ ജാവയില്‍ സ്വയം 10 ഇല്‍ 9 റേറ്റ് ചെയ്യുന്നവനേക്കാളും വിവരമുണ്ട് ആവശ്യത്തിന് (മാത്രം) സഹായിക്കാന്‍ എത്തുന്ന എന്റെ തലക്ക്.. ആള്‍ സ്വയം പറയുന്നത് ഇനിയുമേറെ പഠിക്കാന്‍ കിടക്കുന്നു, ഇപ്പോഴും പഠിക്കുകയാണ് എന്നൊക്കെ.. ഞാന്‍ അദ്ദേഹത്തിന്റെ ശിഷ്യനാവാനുള്ള ശ്രമത്തിലാ.. പക്ഷേ, അത് ഹനുമാന്‍ ചെന്ന് സൂര്യനോട് ചോദിച്ച പോലെ ആണെന്ന് മാത്രം..
Su | 09-Jun-06 at 1:36 pm | Permalink
കുറേയെണ്ണം ഒരുമിച്ച് പോസ്റ്റ് ചെയ്യാത്തത് എന്താ ഉമേഷ്‌ജീ ?
🙂
മന്‍‌ജിത് | 09-Jun-06 at 2:05 pm | Permalink
ഒന്നാമന്മാരാണെന്നു വീമ്പിളക്കിയ a,b,c ഇത്യാദികളെപ്പറ്റിയും ഇങ്ങനെയൊരു കഥയുണ്ടല്ലോ. പാവപ്പെട്ട മറ്റക്ഷരങ്ങളെല്ലാം കൂടി ചൂണ്ടിക്കാണിച്ചത്.
എണ്ണാന്‍ തുടങ്ങിയാല്‍ എ വരുന്നത് തൌസന്‍‌ഡില്‍, ബി വരുന്നത് ബില്യണില്‍, സിയാകട്ടെ ക്രോറിലും.
സുഭാഷിതം കലക്കുന്നുണ്ട്.
Umesh | 10-Jun-06 at 1:04 am | Permalink
പെരിങ്ങോടാ,
നിരൂപകരില്‍ ഈ സ്വഭാവം കൂടുതല്‍ കണ്ടിട്ടുണ്ടു്. പ്രത്യേകിച്ചു് അവര്‍ പുകഴ്ത്തുന്ന ആളുകളെപ്പറ്റി പറയുമ്പോള്‍.
ശനിയോ,
ഹനുമാന്‍ സൂര്യനോടു ചോദിച്ചോ? അങ്ങനൊരു സംഭവമുണ്ടായോ? താടിക്കു വെട്ടു കൊണ്ടപ്പോഴാണോ?
ഏതായാലും സ്വയം ഹനുമാന്‍ എന്നു വിളിച്ചതു “ശനിയന്‍” എന്ന തൂലികാനാമം സ്വീകരിച്ചവനു ചേര്‍ന്നതു തന്നെ.
സൂ,
ഇടയ്ക്കു് അല്പം സമയം കിട്ടുമ്പോഴാണു സുഭാഷിതമെഴുതുന്നതു്. (ഭാരതീയഗണിതവും വ്യാകരണവുമൊക്കെ സമയമെടുത്തു പുസ്തകങ്ങളൊക്കെ നോക്കി എഴുതുന്നതാണു്.) ഒറ്റയിരുപ്പില്‍ ഓര്‍മ്മയുള്ള ഒരു ശ്ലോകവും അര്‍ത്ഥവും എഴുതും. മിക്കവാറും ഒന്നില്‍ക്കൂടുതല്‍ എഴുതാന്‍ സമയമുണ്ടാവുകയില്ല.
പിന്നെ, ഇതെല്ലാം തന്നെ സ്വതന്ത്രമായി നില്‍ക്കാന്‍ കഴിയുന്ന ശ്ലോകങ്ങളായതുകൊണ്ടു് വെവ്വേറെ കൊടുക്കുകയാവും നല്ലതെന്നു തോന്നുന്നു.
ഇവയെ വിക്കിയിലിടാനും പരിപാടിയുണ്ടു്. തെറ്റുകള്‍ തിരുത്തിയതിനു ശേഷം. വിക്കിയ്ക്കു ചേരാത്ത പരാമര്‍ശങ്ങള്‍ ഒഴിവാക്കിയിട്ടു്. ദാ ഇതുപോലെ.
സുഭാഷിതങ്ങളെല്ലാം ഒന്നിച്ചു കാണണമെങ്കില്‍ ഈ പേജിന്റെ ഇടത്തുവശത്തുള്ള “Posts – categorywise” എന്ന ലിങ്കില്‍ നോക്കുക. വലത്തുവശത്തു മുകളിലായി എല്ലാ സുഭാഷിതങ്ങളും കാണാം.
“സുഭാഷിതം” എന്നതു സൂവിന്റെ ബ്ലോഗ് ആകേണ്ടതായിരുന്നു, അല്ലേ? സുവിന്റെ ഭാഷിതം സുഭാഷിതം 🙂
Su | 13-Jun-06 at 3:51 pm | Permalink
എന്റെ ഭാഷ പലപ്പോഴും “സു ഭാഷ“ ആവുന്നതില്‍ നിന്നും വ്യതിചലിക്കുന്നുണ്ടെന്നാണ് എനിക്ക് തോന്നുന്നത്. സാഹചര്യവും മൂഡും ഒക്കെ ആവും കാരണം. അതുകൊണ്ട് അങ്ങനെ ഒരു ബ്ലോഗ് തുടങ്ങി ഒരു “കു ഭാഷിതം” ആക്കേണ്ടല്ലോ.