“ശ്രീവേങ്കടാചലപതേ, തവ സുപ്രഭാതം…”
എം. എസ്. സുബ്ബലക്ഷ്മി പാടിയ വേങ്കടേശ്വരസുപ്രഭാതം ഒരിക്കലെങ്കിലും കേള്‍ക്കാത്തവര്‍ കുറവായിരിക്കും. അതിലെ മിക്ക ശ്ലോകങ്ങളുടെയും വൃത്തമാണു് വസന്തതിലകം.
വളരെ പ്രചാരത്തിലുള്ള ഒരു വൃത്തമാണിതു്. മഹാകാവ്യങ്ങള്‍ മിക്കതിലും ഒരു സര്‍ഗ്ഗം ഈ വൃത്തത്തിലാണു്. മലയാളത്തില്‍, കുമാരനാശാന്റെ വീണ പൂവു്, വി. സി. ബാലകൃഷ്ണപ്പണിക്കരുടെ വിശ്വരൂപം തുടങ്ങി പല ഖണ്ഡകാവ്യങ്ങളുടെയും വൃത്തം ഇതാണു്. അക്ഷരശ്ലോകസദസ്സുകളില്‍ ശാര്‍ദ്ദൂലവിക്രീഡിതവും സ്രഗ്ദ്ധരയും കഴിഞ്ഞാല്‍ ഏറ്റവും കൂടുതല്‍ കേള്‍ക്കുന്ന വൃത്തവും ഇതു തന്നെ.
വസന്തതിലകത്തില്‍ ഗുരുക്കളും (-) ലഘുക്കളും (v) ഇങ്ങനെ ഒരു വരിയില്‍ വരും:
– – v – v v v – v v – v – – (ത ഭ ജ ജ ഗ ഗ)
വൃത്തമഞ്ജരിയിലെ ലക്ഷണം താഴെച്ചേര്‍ക്കുന്നു.
| ചൊല്ലാം വസന്തതിലകം തഭജം ജഗംഗം | |
| download MP3 |
സംസ്കൃതവൃത്തങ്ങളുടെ ലക്ഷണങ്ങള്‍ ഉദാഹരണങ്ങള്‍ കൂടിയാണു്. ലക്ഷണം അതാതു വൃത്തത്തില്‍ത്തന്നെയായിരിക്കും എന്നര്‍ത്ഥം. ഇവിടെ, മുകളില്‍ക്കൊടുത്തിരിക്കുന്ന ലക്ഷണം വസന്തതിലകവൃത്തത്തിന്റെ ഒരു വരി തന്നെയാണു്.
വസന്തതിലകം ഇങ്ങനെ ചൊല്ലാം:
| താരാര താരതര താരര താരതാരാ | |
| download MP3 |
ഉദാഹരണമായി,
|
വാരാശി, തന്നൊടുവിലെശ്ശിശു കേരളത്തെ (ഉള്ളൂര്‍ – ഉമാകേരളം) |
|
| download MP3 |
അല്ലെങ്കില്‍ ഇങ്ങനെയും ചൊല്ലാം:
| താരാ തരാരതരരാ തര താരതാരാ | |
| download MP3 |
ഉദാഹരണം:
| കണ്ടാല്‍ ശരിയ്ക്കു കടലിന്മകള്‍, നാവിളക്കി (ഉള്ളൂര്‍ – ഉമാകേരളം) |
|
| download MP3 |
വേങ്കടേശ്വരസുപ്രഭാതത്തിന്റെ വൃത്തം വസന്തതിലകമാണെന്നു പറഞ്ഞല്ലോ. ഒരു ശ്ലോകം:
| മാതഃ സമസ്തജഗതാം മധുകൈടഭാരേര്‍- വക്ഷോവിഹാരിണി മനോഹരദിവ്യരൂപേ ശ്രീസ്വാമിനി ശ്രിതജനപ്രിയദാനശീലേ ശ്രീവേങ്കടേശദയിതേ തവ സുപ്രഭാതം! |
|
| download MP3 |
യതി ആവശ്യമില്ലാത്തതു കൊണ്ടു്, ഒഴുക്കുള്ള ചെറിയ ശ്ലോകങ്ങള്‍ വാര്‍ക്കാന്‍ വസന്തതിലകത്തിനുള്ള കഴിവു് അന്യാദൃശമാണു്. ശയ്യാഗുണം തുളുമ്പുന്ന, ഒറ്റയടിക്കു ചൊല്ലേണ്ട
|
ഹാ! ജന്യസീമ്‌നി പല യോധഗണത്തെയൊറ്റയ്‌– ക്കോജസ്സു കൊണ്ടു വിമഥിച്ച യുവാവു തന്നെ വ്യാജപ്പയറ്റില്‍ വിജയിച്ചരുളുന്ന ദൈത്യ– രാജന്നെഴും സചിവപുംഗവ, മംഗളം തേ! (വള്ളത്തോള്‍ – ബന്ധനസ്ഥനായ അനിരുദ്ധന്‍) |
|
| download MP3 |
തൊട്ടു്, ആശയങ്ങള്‍ വരികളുടെ ഇടയ്ക്കുവെച്ചു മുറിയുന്ന
|
കണ്ടാല്‍ ശരിയ്ക്കു കടലിന്മകള്‍, നാവിളക്കി– ക്കൊണ്ടാല്‍ സരസ്വതി, കൃപാണിയെടുത്തു നിന്നാല്‍ വണ്ടാറണിക്കുഴലി ദുര്‍ഗ്ഗ, യിവണ്ണമാരും കൊണ്ടാടുമാറു പല മട്ടു ലസിച്ചിരുന്നു. (ഉള്ളൂര്‍ – ഉമാകേരളം) |
|
| download MP3 |
വരെ ഏതു രീതിയിലുള്ള ശ്ലോകത്തിനും ഇതു് അനുയോജ്യമാണു്. ശൃംഗാരം തൊട്ടു ശാന്തം വരെ എല്ലാ രസങ്ങളും വസന്തതിലകത്തില്‍ ശോഭിക്കും.
മലയാളത്തില്‍, ദ്വിതീയാക്ഷരപ്രാസം ഈ വൃത്തത്തിലുള്ള ശ്ലോകങ്ങള്‍ക്കു് ഒരു പ്രത്യേകഭംഗി നല്‍കും. മുകളിലുദ്ധരിച്ച മലയാളശ്ലോകങ്ങള്‍ ഉദാഹരണം. തൃതീയാക്ഷരപ്രാസവും വളരെ ഭംഗിയാണു്. രണ്ടുമുള്ള ഒരു ശ്ലോകം ഇതാ:
|
കുട്ടിക്കുരംഗമിഴിയാമുമതന്റെ ചട്ട പൊട്ടിക്കുരുത്തിളകുമക്കുളുര്‍കൊങ്ക രണ്ടും മുട്ടിക്കുടിക്കുമൊരു കുംഭിമുഖത്തൊടൊത്ത കുട്ടിയ്ക്കു ഞാന്‍ കുതുകമോടിത കൈതൊഴുന്നേന്‍! (വെണ്മണി മഹന്‍ നമ്പൂതിരി) |
|
| download MP3 |
ഇപ്പോള്‍ ശ്ലോകം കേട്ടാല്‍ വസന്തതിലകത്തിനെ തിരിച്ചറിയാന്‍ പറ്റുന്നില്ലേ?
Umesh | 22-Jun-06 at 12:08 am | Permalink
“ഛന്ദശ്ശാസ്ത്ര”ത്തിലെ ലേഖനങ്ങള്‍ ഈ രീതിയില്‍ അവതരിപ്പിക്കുക എന്നതായിരുന്നു എന്റെ മനസ്സില്‍. ഈ ലേഖനം പൂര്‍ണ്ണമല്ല. എങ്കിലും നിങ്ങളുടെ അഭിപ്രായം അറിയാന്‍ ഇപ്പോള്‍ പ്രസിദ്ധീകരിക്കുന്നു.
അവസാനം പ്രസ്തുതവൃത്തത്തിലെ പത്തു ശ്ലോകങ്ങള്‍ ഒരു ഓഡിയോ ഫയലായി ഇടാനും പരിപാടിയുണ്ടു് – അക്ഷരശ്ലോകരീതിയില്‍.
അഭിപ്രായങ്ങളും നിര്‍ദ്ദേശങ്ങളും പ്രതീക്ഷിക്കുന്നു.
Shaniyan | 22-Jun-06 at 2:01 am | Permalink
മാഷേ, തഭജംജഗംഗം എന്നത് അവിടെ വരുന്ന സ്വരത്ത/ശബ്ദത്തെയാണോ കാണിക്കുന്നത്? ഏതുതരം പ്രാസങ്ങളാണ് സാധാരണ കാണാറ്? വാക്കുകള്‍ തിരഞ്ഞെടുക്കുമ്പോള്‍ എന്തെങ്കിലും ശ്രദ്ധിക്കേണ്ടതുണ്ടോ? പാലിക്കേണ്ട മറ്റു നിയന്ത്രണങ്ങള്‍ വല്ലതും ഉണ്ടോ?
L.G | 22-Jun-06 at 3:09 am | Permalink
ചൊല്ലാം വസന്തതിലകം തഭജം ജഗംഗം
ഉമേഷേട്ടാ,തഭഗം ജഗംജഗം.. ഞാന്‍ എത്ര തവണ ഇതു കാണാ‍ണ്ടു പഠിച്ചിരിക്കുന്നു സ്കൂളില്‍. പണ്ടൊക്കെ എന്നും കാലത്തെ നാലു മണിക്കു കേള്‍ക്കാറുള്ള എനിക്കേറ്റവും ഇഷടമുള്ള സുപ്രഭാതം ഈ വൃത്തം ആണു എന്നു ഇപ്പോഴാണു അറിയുന്നതു…
ആരുടെ മുമ്പില്ലെങ്കിലും സാഷ്ട്ടംഗം പ്രണമിക്കാന്‍ തോന്നുവാണെങ്കില്‍,അതില്‍ ഒരാള്‍ ഉമേഷേട്ടനായിരിക്കും..എന്നാലും ഇത്രേം വിവരമുള്ള ഒരാളോടു രണ്ടു കൊച്ചു വര്‍ത്താ‍നം പറയാന്‍ ഒക്കെ ഈ ബ്ലോഗ് വഴി സാധിചൂല്ലൊ…സിബു ചേട്ടനും അതിനു പ്രണാമം.
പാപ്പാന്‍ | 22-Jun-06 at 3:25 am | Permalink
ഉമേഷേ, ശ്ലോകങ്ങള്‍/പദ്യങ്ങള്‍/തര്‍‌ജ്ജമകള്‍ എഴുതുമ്പോള്‍ ആദ്യം ഇന്ന വൃത്തത്തില്‍ എഴുതാന്‍ പോകുന്നു എന്നു നിശ്ചയിച്ചിട്ടാണോ തുടങ്ങാറ്? പകുതി എഴുതിക്കഴിയുമ്പോള്‍ മറ്റൊരുവൃത്തമായിരുന്നു കുറേക്കൂടി അനുയോജ്യം എന്നു തോന്നാറുണ്ടോ/തോന്നിയിട്ടുണ്ടോ/തോന്നിയിട്ട് പൊളിച്ചെഴുതിയിട്ടുണ്ടോ? രസങ്ങള്‍‌ക്കു യോജിച്ച വൃത്തങ്ങള്‍ എങ്ങനെയാണു തെരഞ്ഞെടുക്കാറ്?
പാപ്പാന്‍ | 22-Jun-06 at 3:27 am | Permalink
പറയാന്‍ വിട്ടു, ഇതു പോലുള്ള ലേഖനങ്ങള്‍ വളരെ ഉപകാരം ചെയ്യുന്നു. ഇനിയും ഈയിനത്തില്‍‌പ്പെട്ടവ എഴുതുമല്ലോ.
രാജ്‌നായര്‍ | 22-Jun-06 at 5:02 am | Permalink
ഉമേഷ്ജി, എല്‍.ജി പറഞ്ഞതുപോലെ “ചൊല്ലാം വസന്തതിലകം തഭജം ജഗംഗം” എന്നു പലതവണ ചൊല്ലിത്തന്നിട്ടും അതു സുപ്രഭാതത്തിന്റെ ഈണത്തില്‍ ചൊല്ലിത്തരാതിരുന്ന അദ്ധ്യാപകഗണത്തോട് ശകലം ഈര്‍ഷ്യ തോന്നുന്നു.
ചന്ദശാസ്ത്രത്തിന്റെ തുടക്കം അസ്സലായി. വസന്തതിലകം തന്നെ തിരഞ്ഞെടുത്തതും നന്നായിയെന്നു തോന്നുന്നു. പക്ഷെ ഗണം തിരിക്കുന്നതുകൂടി അറിയാത്ത പലരും ഉണ്ടെന്നു മറക്കരുതേ, ആ ഭാഗം കൂടി ചെറുതായെങ്കിലും ഒന്നു വിശദീകരിക്കൂ.
ഈ പംക്തി തുടരുവാന്‍ ഉമേഷിനു സമയവും സൌകര്യവും നല്‍കി സര്‍വ്വേശ്വരന്‍ അനുഗ്രഹിക്കട്ടെ 🙂
ഇനി വിഷ്‌ലിസ്റ്റിലെ അടുത്ത ഐറ്റം ധൈര്യത്തോടെ പറയാമല്ലോ: കര്‍ണ്ണാടക സംഗീതം രാഗം വിസ്തരിച്ചു് ചൊല്ലിത്തരുവാന്‍ ആരെങ്കിലുമുണ്ടോ? പല സൈറ്റുകളും കണ്ടിട്ടുണ്ടു്, പക്ഷെ ഒരു മലയാളി റ്റച്ചില്ല 😉 കൈരളി റ്റീവിയിലെ രാഗോത്സവം തുടര്‍ച്ചയായി കാണുവാനും സാധിച്ചില്ല, ഇപ്പോഴതു് 300 എപിസോഡുകള്‍ പിന്നിടുകയും ചെയ്തിരിക്കുന്നു. മലയാളവേദിയില്‍ ഏറെക്കുറെ സമാനമായ ഒരു ത്രെഡുണ്ടായിരുന്നു, പക്ഷെ മംഗ്ലീഷിലായതുകാരണം ശ്രദ്ധാപൂര്‍വ്വം ഫോളോ ചെയ്യുവാന്‍ കഴിഞ്ഞില്ല.
Shiju Alex | 22-Jun-06 at 6:00 am | Permalink
പക്ഷെ ഗണം തിരിക്കുന്നതുകൂടി അറിയാത്ത പലരും ഉണ്ടെന്നു മറക്കരുതേ, ആ ഭാഗം കൂടി ചെറുതായെങ്കിലും ഒന്നു വിശദീകരിക്കൂ.
അതു വളരെ ശരിയാണ്‌. സ്കൂളില്‍ ഇതൊക്കെ പഠിച്ചുണ്ടെങ്കിലും ഇപ്പോള്‍ എല്ലാം മറന്നു പോയിരിക്കുന്നു. അതും കൂടി ഒന്നു വിശദീകരിച്ചാല്‍ നന്നയിരുന്നു.
നല്ല പോസ്റ്റ്. ഇത്തരത്തില്‍ മറ്റുള്ളവര്‍ക്കു അറിവു പകര്‍ന്നു നല്‍കാന്‍ ഈശ്വരന്‍ ഇനിയും അനുവദിക്കട്ടെ.
rageshku@gmail.com | 22-Jun-06 at 6:07 am | Permalink
ഗുരുപത്നിക്ക് അടുപ്പില്‍ വയ്യ്ക്കാന്‍ വെറുകുപറക്കാന്‍ പോയി വന്നപ്പോള്‍, ഗുരുവിന്നു ചമത വേണംന്ന്. എന്നാ ശരി, ചമത പറിച്ച് കൊണ്ടു വന്നപ്പോള്‍, ഗുരുപുത്രന്‍, വിശാഖന്, ഓലപ്പീപ്പി വേണംന്ന്. ഓല തപ്പി, വനമായ വനമൊക്കെ തെങ്ങേല്‍ കയറി, ഓല വെട്ടി, പീപ്പിയുണ്ടാക്കി കൊടുത്ത്, ഗുരുകുലത്തില്‍ വന്നപ്പോള്‍, അധ്യയനവര്‍ഷം പകുതി കഴിഞ്ഞുപോയ്.
എന്നാ ശരി ആദ്യം മുതലെ പഠിപ്പിക്കൂ ഗുരുക്കളെ.
Umesh | 22-Jun-06 at 6:58 am | Permalink
എല്ലാവര്‍ക്കും നന്ദി. ചോദ്യങ്ങള്‍ക്കു് ഉത്തരം പറയാം. ഏറ്റവും എളുപ്പമായതു് ആദ്യം എന്നിങ്ങനെ… 🙂
എല്‍‌ജീ, രാജ്,
സ്കൂളുകളില്‍ ഇവ ശരിക്കു പഠിപ്പിക്കാറില്ല. ഒന്നാമതായി പല അദ്ധ്യാപകര്‍ക്കും അറിയില്ല. രണ്ടാമതായി, ഇതും പഠിപ്പിച്ചുകൊണ്ടിരുന്നാല്‍ “പോര്‍ഷന്‍” തീരില്ല. മൂന്നാമതായി, പിള്ളേര്‍ക്കിതിലൊന്നും താത്‌പര്യവുമില്ല. അതുകൊണ്ടു്, ഗണം തിരിച്ചു വൃത്തം തിരിക്കുന്ന സംഗതിയാണു പഠിപ്പിക്കുന്നതു്.
സുപ്രഭാതത്തിന്റെ വസന്തതിലകം നിങ്ങളുടെയും പ്രിയപ്പെട്ട വൃത്തമാണെന്നറിഞ്ഞതില്‍ സന്തോഷം.
സംസ്കൃതവൃത്തങ്ങളുടെ ലക്ഷണവും അതാതു വൃത്തത്തില്‍ തന്നെയാണെന്നറിയുന്നവര്‍ കുറവാണു്. ഉദാഹരണത്തിനു്,
പന്ത്രണ്ടാല്‍ മസജം സതംത ഗുരുവും ശാര്‍ദ്ദൂലവിക്രീഡിതം
എന്നു ചൊല്ലുക. (സതംത ആണു്, സംതത അല്ല). എന്നിട്ടു്, സന്തോഷിന്റെ “കള്ളിന്നോടു വിരക്തി…” ഒന്നു ചൊല്ലി നോക്കുക.
അതുകഴിഞ്ഞു്, സ്രഗ്ദ്ധരയുടെ ലക്ഷണമായ
ഏഴേഴായ് മൂന്നു ഖണ്ഡം മരഭനയയുതം സ്രഗ്ദ്ധരാവൃത്തമാകും
എന്നു ചൊല്ലുക. പിന്നീടു രാജേഷ് വര്‍മ്മയുടെ “പത്രം വായിച്ചിരിക്കും..” എന്ന ശ്ലോകം ചൊല്ലി നോക്കുക.
സാമ്യം വ്യക്തമായെങ്കില്‍ അക്ഷരശ്ലോകസദസ്സിലെ esfull.pdf എന്ന പുസ്തകം ഡൌണ്‍‌ലോഡു ചെയ്യുക. അതിന്റെ അവസാനത്തില്‍ അതില്‍ ഉപയോഗിച്ചിട്ടുള്ള വൃത്തങ്ങളുടെ ലക്ഷണവും സൂചികയും ഉണ്ടു്. ഒരു വൃത്തമെടുത്തിട്ടു്, അതിന്റെ ഉദാഹരണങ്ങള്‍ ചൊല്ലി നോക്കുക. ഇവ വ്യക്തമായി മനസ്സിലാകാന്‍ അധികം സമയമൊന്നും വേണ്ട.
രാജ്, ശനിയാ, ഷിജു,
ഗണം തിരിക്കാതെ തന്നെ വൃത്തം കണ്ടുപിടിപ്പിക്കുക എന്നതായിരുന്നു എന്റെ ലക്ഷ്യം. പൂര്‍ണ്ണതയ്ക്കു വേണ്ടി ലക്ഷണവും കൊടുത്തെന്നേ ഉള്ളൂ. നാം പാട്ടുകേട്ടിട്ടൂ് അതിന്റെ രാഗം തിരിച്ചറിയുന്നതു് സ്വരസ്ഥാനങ്ങള്‍ അളന്നുനോക്കിയിട്ടു് ആരോഹണവും അവരോഹണവും കണ്ടുപിടിച്ചു്, രാഗലക്ഷണത്തില്‍ നിന്നു രാഗം കണ്ടുപിടിച്ചല്ലല്ലോ. അങ്ങനെയും ചെയ്യാം എന്നു മാത്രം.
ഏതായാലും ഗണം തിരിക്കുന്നതു വിശദമാക്കുന്ന ഒരു പോസ്റ്റ് ഉടനേ ഇടാം. പക്ഷേ വൃത്തം തിരിച്ചറിയാന്‍ അതിന്റെ ആവശ്യമില്ല എന്നു തന്നെയാണു് എന്റെ വിശ്വാസം.
ശനിയന്റെ മറ്റു ചോദ്യങ്ങള്‍ക്കു വഴിയേ ഉത്തരം തരാം. വസന്തതിലകത്തില്‍ കവിത എഴുതാന്‍ തുടങ്ങുന്നതിനു മുമ്പു് അല്പം ക്ഷമിക്കൂ. അതിനു മുമ്പു് മനസ്സില്‍ ആ വൃത്തം ഉറയ്ക്കണം. ശനിയന്‍ ഇതിനു മുമ്പു് എഴുതിയിട്ടുള്ള കവിതകളുടെ ഈണം മനസ്സിലുള്ളതുപോലെ.
എല്‍‌ജിയേ,
തഭഗം ജഗംജഗം അല്ല, തഭജം ജഗംഗം. ഇമ്പോശിഷ്യന്‍ വേണോ? സാഷ്ടാംഗപ്രണാമമൊന്നും വേണ്ട. വീട്ടില്‍ വരുമ്പോള്‍ മീന്‍‌കറി വെച്ചുതന്നാല്‍ മതി 🙂
പാപ്പാനേ,
കവിത എഴുതാന്‍ തുടങ്ങുമ്പോള്‍ ആശയത്തിനു പറ്റിയ ഒരു വൃത്തം തോന്നുകയാണു പതിവു്. രചന പുരോഗമിക്കുമ്പോള്‍ ചിലപ്പോള്‍ വൃത്തം മാറിയേക്കാം. കാത്തിരിക്ക ഞാന്‍ അഞ്ചു വൃത്തങ്ങളില്‍ എഴുതി നോക്കിയിട്ടാണു് അവസാനം അനുഷ്ടുപ്പിലാക്കിയതു്. ജൊയ്സി കിസ്മറിന്റെ രണ്ടു വരികള്‍ ആദ്യം ഞാന്‍ ഇങ്ങനെയാണു തര്‍ജ്ജമ ചെയ്തതു്. പിന്നീടു് മന്‍‌ജിത്ത് അതു മൊത്തം തന്നപ്പോള്‍ വൃത്തം മാറ്റി ഇങ്ങനെ തര്‍ജ്ജമ ചെയ്തു.
പ്രീഡിഗ്രിയ്ക്കു പഠിക്കുമ്പോള്‍ ഉമര്‍ ഖയ്യാമിന്റെ റുബായിയാത്ത് മുഴുവനും ഞാന്‍ മന്ദാക്രാന്തയില്‍ തര്‍ജ്ജമ ചെയ്തു. (ആദ്യത്തെ ശ്ലോകം ഇവിടെ). പിന്നീടു് അതിലെ പല ശ്ലോകങ്ങളും മറ്റു പല വൃത്തത്തിലും തര്‍ജ്ജമ ചെയ്തു. ഉദാഹരണങ്ങള്‍ ഇവിടെയും ഇവിടെയും.
രാജ്,
ഞാന്‍ ഇക്കാര്യത്തില്‍ എന്റെ സുഹൃത്തു് അജിത് ചന്ദ്രന്റെ സഹായം അഭ്യര്‍ത്ഥിച്ചിട്ടുണ്ടു്. തത്‌കാലം താളങ്ങള്‍ മാത്രം, എന്റെ വൃത്തലേഖനങ്ങളോടു ചേര്‍ത്തു് അവലോകനം ചെയ്യാനാണു പരിപാടി. അതു കഴിഞ്ഞു്, അദ്ദേഹത്തിനു സമയമുണ്ടെങ്കില്‍ രാഗങ്ങളിലേക്കും കടക്കാം. ഇവിടെ ഓഡിയോ വളരെ അത്യാവശ്യമാണു്.
wakaari | 22-Jun-06 at 3:27 pm | Permalink
ഉമേഷ്ജി, നമിച്ചിരിക്കുന്നു. ഇതൊക്കെ എന്താണെന്നറിഞ്ഞ് കേള്‍ക്കുന്നതിന്റെ സുഖം ഒന്നു വേറേ തന്നെ. പെരിങ്ങോടര്‍ പറഞ്ഞതുപോലെ കര്‍ണാടക സംഗീതത്തിന്റെ രാഗങ്ങള്‍… എല്ലാം സമയം പോലെ. (നമിക്കല്‍ കഴിഞ്ഞു).
bindu | 22-Jun-06 at 5:46 pm | Permalink
ഇതുപോലെ എല്ലാ വൃത്തവും അലങ്കാരവും ഒക്കെ എഴുതിയാല്‍ മറന്നതെല്ലാം ഒന്നോര്‍മിച്ചെടുക്കാമായിരുന്നു. :))
Shiju Alex | 23-Jun-06 at 4:42 am | Permalink
ഉമേഷേട്ടാ,
ഈ download mp3 എന്ന ലിങ്കില്‍ ഉള്ള അറ്റാച്‌മന്റ്‌ zip file ആയി ഇടാമോ? എന്റെ ബ്രൌസര്‍ mp3 ഡൌണ്‍ലോഡ്‌ ചെയ്യാന്‍ അനുവദിക്കുന്നില്ല.
Devanand | 23-Jun-06 at 10:37 am | Permalink
ഈ വൃദ്ധവിദ്യാര്‍ത്ഥിയേം കൂട്ടണേ
“ചൊല്ലാം വസന്ത തിലകം ശാര്‍ദ്ദൂല വിക്രീഡിതം”
“ഗുരു തന്നെ എഴുത്തെല്ലാം അശ്ലീലത്തിന്‍ പേര്‍ നതോന്നത”
എന്നൊക്കെ തോന്ന്യാസം പാടീട്ടുണ്ടെന്നല്ലാതെ, മലയാളം നേരെ പഠിക്കാന്‍ ഈ 36 വയസ്സിനകത്ത്‌ യോഗമുണ്ടായില്ല.
ഫോര്‍മല്‍ ആയി പഠനം തുടങ്ങട്ടേ.
ഠോ (തേങ്ങ ഉടച്ച ഒച്ചയാ)
അരവിന്ദന്‍ | 23-Jun-06 at 11:30 am | Permalink
ഉമേഷ്ജിയുടെ മുന്‍പില്‍ നമിക്കാന്‍ തുടങ്ങിയാല്‍ പിന്നെ കമിഴ്ന്ന് അങ്ങ് കിടക്കുന്നതാണ് മെച്ചം.
അല്ലെങ്കില്‍ നമിച്ച് നമിച്ച് എന്റെ നടുവിന്റെ ഊപ്പാട് തീരും.
ചിലപ്പോഴൊക്കെ ബൂലോഗത്തില്‍ വെറുതേ ചുറ്റി‌ത്തിരിയുമ്പോള്‍ സമയം പാഴാക്കുകയാണോ എന്ന കുറ്റബോധം തോന്നിയിട്ടുണ്ട്.
മനസ്സില്‍ കുറ്റബോധം തോന്നിത്തുടങ്ങിയാല്‍ പിന്നെ എല്ലാം യാന്ത്രികമായിരിക്കുമെന്ന് പണ്ട് രാജുമോന്‍ എന്ന വിന്‍സെന്‍‌റ്റ് ഗോമസ് പറഞ്ഞിട്ടുണ്ടല്ലോ..
ഉമേഷ്ജിയുടെ ബ്ലോഗ് വായിക്കുമ്പോള്‍ വല്ലാത്ത ആശ്വാസം.
എന്തൊരറിവ്…
അതെ..രാഗങ്ങളെപ്പറ്റിയും പറയണേ..രാഗോത്സവം എന്റേയും പ്രിയപ്രോഗ്രാമായിരുന്നു.
Umesh | 23-Jun-06 at 1:10 pm | Permalink
കുറുമോ, നന്ദി.
ബിന്ദു, അതിനു നല്ല വഴി “വൃത്തമഞ്ജരി”യും “ഭാഷാഭൂഷണ”വും സംഘടിപ്പിക്കുകയാണു്. നമുക്കവ വിക്കിയിലും ഇടണം. ദാത്തുക് ചേട്ടന്‍ അവ ടൈപ്പുചെയ്തിട്ടുണ്ടെന്നു തോന്നുന്നു. ഇവിടെ അവ എഴുതണമെങ്കില്‍ ഒരുപാടു കാലമെടുക്കും. അങ്ങുന്നുമിങ്ങുന്നും ചില രസകരമായ കാര്യങ്ങളെഴുതാനേ നമുക്കു പറ്റൂ.
ദേവോ, ദാ രണ്ടു ലക്ഷണം കൂടി:
(1) മുതുകു വയറിനോടൊട്ടണം പട്ടിണിക്കു്
(2) കുരുവും ചുളയും ചുളയും കുരുവും കുരുവും കുരുവെന്നെഴുത്തുകള്‍
ഒരു കുരൂനൊരു ചുള; ചുളയെല്ലാമൊന്നു പോല്‍
കുരുവൊന്നെങ്കിലും വേണം മാറാതോരോ ചുളയിലും;
നടുക്കു കൂഞ്ഞു്, പുറത്തു മുള്ളു് – പൊരുത്തമിതു ചക്കയാം.
പെരിങ്ങോടാ, വക്കാരീ,അരവിന്ദാ,
രാഗങ്ങളെപ്പറ്റി മനസ്സിലാക്കാന്‍ ഒരുപാടു റിസോഴ്സുകളുണ്ടു്. നല്ല ചില കാസറ്റ് സീരീസുകളുണ്ടു്. എന്റെ കയ്യിലുള്ള ഒരെണ്ണത്തിന്റെ വിശദവിവരങ്ങള്‍ ഞാന്‍ തരാം. ബ്ലോഗ് ഇതിനുപറ്റിയ വേദിയല്ല. അല്ലെങ്കില്‍ ഒരുപാടു് ഓഡിയോ ഫയലുകള്‍ വേണ്ടിവരും.
പിന്നെ, ഞാനും സംഗീതവുമായി ഒരു ബന്ധവുമില്ല. എനിക്കാകെ ഒരു ശ്രുതിയേ ഉള്ളൂ എന്നു് എന്റെ കവിതാലാപനത്തില്‍ നിന്നു മനസ്സിലായിക്കാണുമല്ലോ. കര്‍ണ്ണാടകസംഗീതത്തിലെ ഗണിതത്തെപ്പറ്റി ഒരു ലേഖനം ഇവിടെ ഇടാം. ഈ കാസറ്റുകളില്‍ അവ ഉണ്ടാവാന്‍ വഴിയില്ല. എങ്കിലും അവയെപ്പറ്റി പറയുന്ന പുസ്തകങ്ങളും വെബ്‌സൈറ്റുകളും ധാരാളമുണ്ടു്.
Umesh | 23-Jun-06 at 1:13 pm | Permalink
ഷൈജു,
ഒരു ലേഖനത്തിലെ MP3 ഫയലുകളെല്ലാം കൂടി ഒരു ZIP file ആയി ഇടാന്‍ ശ്രമിക്കാം.
paappaan | 23-Jun-06 at 3:10 pm | Permalink
(ചില അലങ്കാരങ്ങളുടെ (അശ്ലീല)ലക്ഷണം കോളജില്‍ പഠിക്കുന്ന കാലത്ത് കേട്ടിട്ടുണ്ട്. ഉമേഷിനറിയാതിരിക്കാന്‍ വഴിയില്ല)
raju | 27-Jun-06 at 12:44 pm | Permalink
I found a good blog site. it contain some political articles. please check it
http://npr.bizhat.com
raghunath paleri | 27-Jun-06 at 7:59 pm | Permalink
Dear Umesh,
your contributions are excellent.
Umesh | 28-Jun-06 at 2:34 pm | Permalink
പാപ്പാനേ,
ഞാനും ചിലതൊക്കെ കേട്ടിട്ടുണ്ടു്. വൃത്തം, അലങ്കാരം ഇവയുടെ ലക്ഷണങ്ങള്‍, പഠിക്കാനുള്ള പദ്യങ്ങള്‍, ന്യൂട്ടന്റെ ചലനനിയമങ്ങള്‍ തുടങ്ങിയവയുടെ “മനോഹരമായ” പാരഡികള്‍.
മലയാളത്തിനു് ഇതുവരെ ഒരു നല്ല രാഷ്ട്രീയബ്ലോഗില്ലാത്ത കുറവു തീര്‍ന്നു. കൂട്ടരേ, http://npr.bizhat.com ഒന്നു നോക്കൂ. രാജൂ, വളരെ നന്ദി.
രഘുനാഥ്,
വളരെ നന്ദി. പ്രശസ്ത കഥാകൃത്തായ രഘുനാഥ് പലേരി തന്നെയോ ഇതു്?
സതീഷ് | 30-Jun-06 at 5:40 am | Permalink
പലപ്പോഴും പറഞ്ഞു തരേണ്ടവര്‍ക്ക് അതിനുള്ള വിവരമോ താല്പര്യമോ ഇല്ലാത്തതാണ്‍ ന്നമ്മളനുഭവിക്കുന്ന ഭാഷാപ്രശ്നങ്ങള്‍ക്കു കാരണ്ം എന്ന് തോന്നിയിട്ടുണ്ട്. അതീനു വേണ്ടി ഒന്നും ചെയ്യാതെ വെറുതെ മലയാളം നശിക്കുന്നു എന്നു പറയുന്നതില്‍ വലിയ കാര്യമില്ല എന്ന് തോന്നുന്നു!
ഉമേഷ്ജിയുടെ ബ്ലോഗ് വായിക്കുമ്പോള്‍ പറഞ്ഞറിയിക്കാനാവാത്ത സന്തോഷം..നന്ദി..
ഉണ്ണി | 07-Jul-06 at 3:28 am | Permalink
നന്നായി, ഉമേഷ്.
‘യരതാഭജസാമനം’ ‘യമാതാരാജഭാനസലഗം’ എന്നീ സൂത്രവാക്കുകള്‍ കൂടി വിശദീകരിച്ചാല്‍ ഗണം തിരിക്കാന്‍ എളുപ്പം മനസ്സിലായേനെ.
Umesh | 11-Jul-06 at 2:19 am | Permalink
നന്ദി, സതീഷ്.
ഉണ്ണീ, എഴുതിത്തുടങ്ങിയിട്ടുണ്ടു്. വഴിയേ പ്രസിദ്ധീകരിക്കാം. നന്ദി.
മൂര്ത്തി | 05-Mar-07 at 4:45 pm | Permalink
നൃപതി ജയിയ്ക്ക യശസ്വീ
ഭാസുര താരുണ്യ രാഗവാന്‍ സതതം
എന്നത് ഗണത്തിന്റെ ലക്ഷണം അറിയാനുള്ള ഒരു കുറുക്കുവഴിയാണ്. മുകളിലെ ഒരോ വാക്കിന്റെയും ഗുരുവും ലഘുവും അടയാളപ്പെടുത്തുക.വാക്കിന്റെ ആദ്യ അക്ഷരം ഗണത്തെ സൂചിപ്പിക്കുന്നു. നൃപതിയുടെ ഗുരു ലഘു അടയാളപ്പെടുത്തിയാല്‍ ന ഗണത്തിന്റെ ലക്ഷണമായി..അങ്ങിനെ ഓരോ ഗണത്തിന്റെയും ലക്ഷണം മനസ്സിലാക്കാം..
ഇത് ടീച്ചേഴ്സ് ട്രെയിനിംഗിനു പഠിച്ചുകൊണ്ടിരിക്കെ സ്കൂളില്‍ ക്ലാസ് എടുക്കാന്‍ വന്ന ഒരു പയ്യന്‍ മാഷ്, പഠിപ്പിച്ചതാണ്..
ഗുരു ലഘു അടയാളപ്പെടുത്തല്‍ മറന്നുപോയതുകൊണ്ട് അതിനു തുനിയുന്നില്ല..
വേറെ ആരെങ്കിലും ഒന്നു സഹായിക്കൂ…
Umesh::ഉമേഷ് | 08-Mar-07 at 2:44 am | Permalink
മൂര്ത്തി,
നന്ദി. “നൃപതി ജയിക്ക…” എന്ന പദ്യം ഏ. ആര്‍. രാജരാജവര്‍മ്മയുടെ “വൃത്തമഞ്ജരി”യിലുള്ളതാണു്. വൃത്തനിര്‍ണ്ണയത്തെക്കുറിച്ചു് കുറെക്കാലം മുമ്പു് എഴുതിത്തുടങ്ങിയ പോസ്റ്റ് ഇതുവരെ തീര്‍ന്നില്ല. അല്പം കൂടി ക്ഷമിക്കുക.
മറ്റു പോസ്റ്റുകള്‍ക്കിട്ട കമന്റുകളും കണ്ടിരുന്നു. എല്ലാറ്റിനും നന്ദി.
നിഷ്ക്കളങ്കന്‍ | 30-Oct-07 at 9:19 pm | Permalink
ഉമേഷ്ജി,
ആധികാരിക‌മായ പോസ്റ്റ്. വളരെ നന്ദി. ശരിയ്ക്കും ഗുരുവിന്നു മുന്‍പില്‍ വന്നുപെട്ടതു തന്നെ ഞാന്‍.
മറ്റുള്ള വൃത്തങ്ങ‌ളെക്കുറിച്ചുള്ള ആ പോസ്റ്റിനായി കാത്തിരിയ്ക്കുന്നു.
കുട്ടന്‍ ഗോപുരത്തിങ്കല്‍ | 11-Oct-09 at 1:09 pm | Permalink
ചാകാനുറച്ചമിതമായികുടിയ്ക്കുവോനേ
പോകുന്നപോക്കിലവിടേയുമിറങ്ങിനോക്കാം.
ആകില്ലനേര്‍വഴിതെളിയ്ക്കുവതെങ്കിലും ഹാ!
ലോകത്തിലിന്നുമിതുപോലെമനുഷ്യരുണ്ടോ?
ഉമേഷ് | Umesh | 11-Oct-09 at 3:08 pm | Permalink
കുട്ടാ, പോസ്റ്റു മാറിപ്പോയോ?
Vikraman Thampuran | 07-May-11 at 6:28 pm | Permalink
ഈ ബ്ലോഗ്കൂട്ടത്തിൽ ചേരാൻ ഒരു
റിട്ടയേർഡ്‌ എഞ്ചിനീയർ ആയ എനിക്കും താത്പര്യം തോന്നുന്നു. എനിക്കുമുണ്ട്‌ അക്ഷരശ്ലോകത്തിൽ
അൽപ്പം കമ്പം. ശ്വാസകോശസംബന്ധിയായ കുറച്ചസുഖങ്ങളുണ്ടെങ്കിലും അക്ഷരശ്ലോകശാഖയെപ്പറ്റി
കൂടുതൽ പഠിക്കാനും അറിവുള്ള കാര്യങ്ങൾ വരു തലമുറകൾക്ക്‌ പറഞ്ഞു കൊടുക്കുവാനും ഉത്സാഹവുമുണ്ട്‌.
വൃത്തമഞ്ജരിയുടെ ഒരു കോപ്പി കിട്ടിയാൽ കൊള്ളാമായിരുന്നു. വില കൊടുക്കാൻ തയ്യറാണു.
kvikraman@rediffmail.com ആണു എന്റെ മെയിൽ ഐഡി. ഉള്ളവർ
ബന്ധപ്പെടുമല്ലോ.
അംബിക പി മേനോൻ | 22-May-20 at 10:44 am | Permalink
എന്തെങ്കിലുമൊക്കെ കുത്തിക്കുറിക്കുന്ന ഒരു വിവരദോഷിയാണ് ഞാൻ. തല്ക്കാലം സമസ്യാപൂരണം എന്നൊക്കെ വരുന്ന കവിതകളിൽ ഒരു കൈ നോക്കും.താളം മാത്രo നോക്കിയാണ് ഈ സാഹസത്തിനു മുതിരുന്നത്. വൃത്തനിയമങ്ങളൊന്നും അറിയില്ല. ഈ പേജിൽ എങ്ങനെ യോ വന്നു പെട്ടതാണ്. വാസ്തവത്തിൽ മനസ്സിലുള്ള ഒരു വലിയ ആഗ്രഹ മാണ് ഇതൊക്കെ അറിയണമെന്നുള്ളത്. അതായിരിക്കാം അങ്ങനെ സംഭവിച്ചത്.. വളരെ വിജ്ഞാന പ്രദം.. എല്ലാവർക്കും നന്ദി