രാജേഷ് വര്‍മ്മയ്ക്കു നന്ദി.
“കൂപമണ്ഡൂക”ത്തിന്റെ കമന്റില്‍ കുമാരസംഭവത്തെ പരസ്യമാക്കിയതിനു്.
മനഃപൂര്‍വ്വം പറയാതിരുന്നതാണു്. ബൂലോഗര്‍ക്കു് ഒരു സര്‍പ്രൈസായ്ക്കോട്ടേ എന്നു കരുതി. ഒരുപിടി കുഞ്ഞുവാവകളുടെ മൂത്ത ജ്യേഷ്ഠനാകുമെന്നു കരുതിയതാണു്. പവിത്രക്കുട്ടി ഓവര്‍ടേക്ക് ചെയ്തു മൂത്തോപ്പോള്‍ ആയി. അതു മറ്റൊരു സര്‍പ്രൈസ്! യാത്രാമൊഴിക്കും പവിത്രക്കുട്ടിയ്ക്കും ആശംസകള്‍!
പേരു് ഊഹിക്കുന്നതില്‍ മീനാക്ഷി സമ്മാനാര്‍ഹയായി. രാജേഷ് വര്‍മ്മ എന്തു സമ്മാനമാണോ നിശ്ചയിച്ചിരിക്കുന്നതു്? സാധാരണയായി അദ്ദേഹം 101 പവനില്‍ കുറച്ചൊന്നും സമ്മാനമായി കൊടുക്കാറില്ല 🙂
കൂടുതല്‍ വിവരങ്ങള്‍:
| പേരു് | : | വിഘ്നേശ് * |
| ചെല്ലപ്പേരു് | : | വിക്കി** |
| ജനനസമയം (പോര്‍ട്ട്‌ലാന്‍ഡ്) | : | 2006 നവംബര്‍ 5 11:53 AM PST (1182 തുലാം 20) |
| ജനനസമയം (ഭാരതം) | : | 2006 നവംബര്‍ 6 01:23 AM IST (1182 തുലാം 19) |
| ജനനസ്ഥലം | : | St. Vincent Hospital, Portland, Oregon, USA. |
| തൂക്കം | : | 5 lb 15.8 oz (2.716 Kg) |
| നീളം | : | 20 ഇഞ്ച് (50.8 സെന്റിമീറ്റര്‍) |
| നക്ഷത്രം | : | ഭരണി |
| തിഥി | : | പ്രഥമ (കൃഷ്ണപക്ഷം) |
| ആഴ്ച | : | ഞായര്‍ |
| കരണം | : | സിംഹം |
| നിത്യയോഗം | : | വ്യതീപാത |
* മിന്നലിന്റെ ചേട്ടന്‍ ഇടിവാളിന്റെ മകന്‍ കൊടുങ്കാറ്റിന്റെ പേരു്
** “വിക്കി ക്വിസ് ടൈം” എന്ന ബ്ലോഗിന്റെ ഉടമസ്ഥനായ മന്‍‌ജിത്തിന്റെ ഏറ്റവും പ്രിയങ്കരമായ വസ്തു
ഏറ്റവും സന്തോഷം വിശാഖിനു തന്നെ. ഇതാ അനുജനെ കണ്ടു് “മുഴുതിങ്കളുദയേന കുമുദമെന്നതുപോലെ” ചിരിച്ചു കൊണ്ടിരിക്കുന്ന വിശാഖ്:
കൂടുതല്‍ പടങ്ങള്‍ക്കു് ഇവിടെ നോക്കുക.
മൂപ്പര്‍ക്കു പേരിട്ടതു് ഒരു കഥയാണു്.
ആണ്‍‌കുട്ടിയാണെന്നറിഞ്ഞതു മുതല്‍ ഒരു പേരിനായി ഞങ്ങള്‍ ചര്‍ച്ചകളും വട്ടമേശസമ്മേളനങ്ങളും നടത്തുകയുണ്ടായി. എനിക്കു ശിവന്റെ പേരും (ഉമേഷ്) മകനു സുബ്രഹ്മണ്യന്റെ പേരും (വിശാഖ്) ആയതിനാല്‍ അടുത്തയാള്‍ക്കു ഗണപതിയുടെ പേരിടണമെന്നു് എനിക്കൊരാഗ്രഹം.
“പെണ്‍‌കുഞ്ഞാകാഞ്ഞതു നന്നായി. അല്ലെങ്കില്‍ അതിനു “ഭദ്രകാളി” എന്ന പേരിടണം എന്നു് ഇങ്ങേരു പറഞ്ഞേനേ” എന്നു സിന്ധു.
എനിക്കും സിന്ധുവിനും പ്രാസത്തില്‍ വലിയ താത്പര്യമില്ലെങ്കിലും (ഇതിനു മുമ്പിടാനായി പേരിടുന്നതിലെ പ്രാസത്തെപ്പറ്റി എഴുതിക്കൊണ്ടിരുന്ന പോസ്റ്റ് സമയത്തു തീര്‍ന്നില്ല. അതു് ഇനിയൊരിക്കല്‍ ഇടാം.) അഭ്യുദയകാംക്ഷികളൊക്കെ വിശാഖിനു ചേരുന്ന “വി”യില്‍ തുടങ്ങുന്ന പേരിടണമെന്ന അഭിപ്രായക്കാരായിരുന്നു.
ഇതെല്ലാമൊത്ത വിനായകന്, വിഘ്നേശന്‍, വക്രതുണ്ഡന്‍ എന്നു മൂന്നു പേരുകള്‍ മാത്രമേ കിട്ടിയുള്ളൂ.
വക്രതുണ്ഡന്‍ എന്നതു വക്കാരിയുടെ പേരായതുകൊണ്ടു് ഉപേക്ഷിച്ചു.
“വക്കാരിയുടെ പേരു്” എന്നൊരു ഗവേഷണപ്രബന്ധം ഓഫ്‌യൂണിയനില്‍ പ്രസിദ്ധീകരിക്കണം എന്നു വിചാരിച്ചിട്ടു് ഇതുവരെ പറ്റിയില്ല. ഒന്നിലധികം വര്‍ഷത്തെ ഗവേഷണഫലമായി കണ്ടുപിടിച്ചതാണു്. ഇത്രയുമായ സ്ഥിതിയ്ക്കു് ഇവിടെ ചുരുക്കി പറഞ്ഞേക്കാം.
കോട്ടയം ജില്ലയിലെ കുറിച്ചിയ്ക്കും കടുത്തുരുത്തിയ്ക്കും ഇടയ്ക്കു റോഡ്‌സൈഡിലാണു വക്കാരിയുടെ വീടെന്നു് അദ്ദേഹത്തിന്റെ കൃതികളില്‍ നിന്നു വ്യക്തമാണു്. ഗവേഷണഫലമായി അതു കാരിത്താസ് എന്ന സ്ഥലമാണെന്നു ഞാന്‍ കണ്ടുപിടിച്ചു. ഇതിനു് ഉപോദ്ബലകമായ വസ്തുതകള്‍ പ്രബന്ധത്തില്‍ വിശദീകരിച്ചിട്ടുണ്ടു്.
വക്കാരി തന്റെ പ്രൊഫൈലില്‍ ഇട്ടിരിക്കുന്ന പടം ആനയുടേതാണെന്നു ചിലരും ഗണപതിയുടേതാണെന്നു മറ്റു ചിലരും തെറ്റിദ്ധരിച്ചിട്ടുണ്ടു്. ഇതു രണ്ടുമല്ല, അല്ലെങ്കില്‍ ഇതു രണ്ടുമാണു സത്യം എന്നതാണു വസ്തുത. മുഴുവന്‍ ശരീരം വരയ്ക്കാതെ മുഖം മാത്രം വരച്ചതു് ആനയ്ക്കും ഗണപതിയ്ക്കും യോജിക്കുന്ന വക്രതുണ്ഡന്‍ എന്ന പേരിനെ സൂചിപ്പിക്കാനാണെന്നു സംശയാതീതമായി തെളിഞ്ഞിട്ടുണ്ടു്.
ഇപ്പോള്‍ ഗവേഷണവിദ്യാര്‍ത്ഥിയായ ഇദ്ദേഹം കുറച്ചുകാലം ഇന്ത്യയുടെ വടക്കുകിഴക്കേ കോണിലുള്ള ഒരു കലാലയത്തില്‍ അദ്ധ്യാപകനായിരുന്നെന്നും അവിടുത്തെ ഭാഷയില്‍ “മാസ്റ്റര്‍” എന്നതിനു പകരം “മഷ്ടാര്” എന്നാണു പറയുക എന്നും എന്റെ ഗവേഷണം വ്യക്തമാക്കുന്നു. ഇദ്ദേഹത്തിന്റെ പുര്‍ണ്ണനാമമായ വക്‌റതുണ്ഡന്‍ കാരിത്താസ് മഷ്ടാര് എന്നതിന്റെ ചുരുക്കരൂപമാണു് വക്കാരിമഷ്ടാ എന്നതു് എന്നതു നിസ്തര്‍ക്കമത്രേ.
ഈ പേര് ജാപ്പനീസില്‍ “മനസ്സിലായി” എന്നര്‍ത്ഥമുള്ള ഒരു വാക്കില്‍ നിന്നാണു കിട്ടിയതെന്നു പറയുന്നതു കേവലം ഒരു മറ മാത്രമാണു്. “വകരിമസ്റ്റ” എന്നാണു് ആ വാക്കു്. “ഓക്കേ”, “അതു ശരി”, “അപ്പോള്‍ ശരി”, “പിന്നെക്കാണാം” എന്നൊക്കെയാണു് ആ വാക്കിന്റെ അര്‍ത്ഥം, “മനസ്സിലായി” എന്നല്ല.
ഈ ഗവേഷണത്തിനു് എനിക്കൊരു പി. എഛ്. ഡി. അടുത്തു തന്നെ തരമാകും എന്നൊരു കിംവദന്തിയുമുണ്ടു്.
മാത്രമല്ല, അടുത്ത കുട്ടിക്കു വേണ്ടി കുട്ട്യേടത്തി നോക്കി വെച്ചിരിക്കുന്ന പേരാണതു്.
ഭൂരിഭാഗം ആളുകളും വിനായകിനോടൊപ്പമായിരുന്നു. വിഘ്നേശ് എന്ന പേരിന്റെ കൂടെ ഞാനും വിശാഖും മാത്രം.
ബൂലോഗത്തിലെ കുറേ പുലികളോടു് അഭിപ്രായം ചോദിച്ചു. അവിടെയും വിനായകനായിരുന്നു പിന്തുണ കൂടുതല്‍. വിഘ്നേശിനെ പിന്തുണച്ചതു് ആകെ മന്‍‌ജിത്ത് മാത്രം. അതും ചെല്ലപ്പേരായി “വിക്കി” എന്നു വിളിക്കാം എന്നതുകൊണ്ടു്. വിക്കിപീഡിയ തലയ്ക്കുപിടിച്ചാല്‍ മനുഷ്യന്റെ അഭിപ്രായങ്ങളെ വരെ അതു ബാധിക്കും എന്നു മനസ്സിലായില്ലേ?
അവസാനം കഴിഞ്ഞ പ്രാവശ്യം ചെയ്തതു പോലെ കുറേ സായിപ്പുകളെക്കൊണ്ടു പറയിച്ചു നോക്കി. ഫലം അവിശ്വസനീയമായിരുന്നു. വിനായക് ആര്‍ക്കും വഴങ്ങുന്നില്ല. നീളം കൂടിപ്പോയി എന്നാണു പരാതി. അതേ സമയം വിഘ്നേശ് എല്ലാവരും നന്നായി പറഞ്ഞു. (വിഗ്നേശ് എന്നായിപ്പോയെന്നു മാത്രം. അതു പിന്നെ ഇന്ത്യക്കാരും അങ്ങനെ തന്നെയല്ലേ പറയുന്നതു്?) അങ്ങനെ വിഘ്നേശ് ഏതാണ്ടു് ഉറച്ചു.
UMESH-നു് 5 അക്ഷരം. SINDHU-വിനു് 6 അക്ഷരം. VISHAKH-നു 7 അക്ഷരം. VIGHNESH-നു 8 അക്ഷരം. ഏതായാലും പുരോഗതിയുണ്ടു്. ഒമ്പതക്ഷരമുള്ള ശിവന്റെ മക്കള്‍ ഉണ്ടോ എന്തോ? SHASTHAVU?
എനിക്കു ശിവന്റെ പേരും മക്കള്‍ക്കു രണ്ടും ശിവന്റെ പിള്ളേരുടെ പേരും ആയതു കൊണ്ടു് ഇനി സിന്ധുവിന്റെ പേരു മാറ്റണം. പാര്‍വ്വതിയുടെ ഒരു പേരാക്കണം. “സിന്ധു” എന്ന പദത്തിനു ധാരാളം അര്‍ത്ഥങ്ങള്‍ ശബ്ദതാരാവലി നിരത്തുന്നുണ്ടെങ്കിലും അവയില്‍ ജീവനുള്ളതു് “ആന” മാത്രം.
പെണ്‍‌കുട്ടിയായിരുന്നെങ്കില്‍ ഇടാന്‍ പണ്ടു തൊട്ടേ നോക്കി വെച്ചിരുന്ന പ്രിയപ്പെട്ട പേരുകളൊക്കെ പാര്‍വ്വതിയുടെ പര്യായങ്ങളായിരുന്നു-പാര്‍വ്വതി, ഗൌരി, അപര്‍ണ്ണ, ഉമ,… അതിലെതെങ്കിലും ഒന്നിടാം.
സിന്ധുവിനു് ഒരു സങ്കടമുണ്ടു്-തന്റെ പേരു വളരെ ചെറുതായിപ്പോയെന്നു്. അതിനാല്‍ ചെറിയ ചെല്ലപ്പേരൊന്നും ഉണ്ടായിട്ടില്ല എന്നു്.
Sin എന്ന ചെല്ലപ്പേരു് ഞങ്ങള്‍ നിര്‍ദ്ദേശിച്ചതാണു്. നല്ല അര്‍ത്ഥമുള്ള പേരുമാണു്-ഇംഗ്ലീഷില്‍!
വളരെ നീളമുള്ള ഒരു പേരു്; അതിനു വളരെ ചെറിയ ഒരു വിളിപ്പേരു്. അതാണു സിന്ധുവിന്റെ സ്വപ്നം.
പാര്‍വ്വതിയ്ക്കു പര്യായമായി നീളമുള്ളതും ചെറിയ ചുരുക്കപ്പേരുള്ളതുമായ പേരുകള്‍ വേണമെങ്കില്‍ വലിയ വിഷമമൊന്നുമില്ല. ലളിതാസഹസ്രനാമം നോക്കിയാല്‍ ആയിരം പേരു കിട്ടും. ഞങ്ങള്‍ പരിഗണിച്ചുകൊണ്ടിരിക്കുന്ന പേരുകള്‍ അക്ഷരമാലാക്രമത്തില്‍ താഴെച്ചേര്‍ക്കുന്നു.
| പേരു് | : | ചെല്ലപ്പേരു് |
| അജ്ഞാനദ്ധ്വാന്തദീപിക | : | അജ്ഞാന |
| അശ്വാരൂഢാധിഷ്ഠിതാശ്വകോടികോടിഭിരാവൃതാ | : | അശ്വ |
| ഇച്ഛാശക്തിജ്ഞാനശക്തിക്രിയാശക്തിസ്വരൂപിണി | : | ഇച്ഛ |
| ഉന്മേഷനിമിഷോത്‌പന്നവിപന്നഭുവനാവലി | : | ഉന്മേഷ |
| കാമേശ്വരാസ്ത്രനിര്‍ദഗ്ദ്ധസഭണ്ഡാസുരശൂന്യകാ | : | കാമ |
| കാളരാത്ര്യാദിശക്ത്യൌഘവൃത | : | കാള |
| കുരുവിന്ദമണിശ്രേണീകനത്‌കോടീരമണ്ഡിത | : | കുരു |
| കൂര്‍മ്മപൃഷ്ഠജയിഷ്ണുപ്രപദാന്വിത | : | കൂര്‍മ്മ |
| ക്രോധാകാരാങ്കുശോജ്ജ്വല | : | ക്രോധ |
| ചണ്ഡമുണ്ഡാസുരനിഷൂദിനി | : | ചണ്ഡ |
| ചക്രരാജരഥാരൂഢസര്‍വ്വായുധപരിഷ്കൃത | : | ചക്ര |
| ജന്മമൃത്യുജരാതപ്തജനവിശ്രാന്തിദായിനി | : | ജന്മ |
| ഡാകിനീശ്വരി | : | ഡാകിനി |
| താടങ്കയുഗളീഭൂതതപനോഡുപമണ്ഡല | : | താട (താടക) |
| പായസാന്നപ്രിയ | : | പായസ |
| മന്ത്രിണ്യംബാവിരചിതവിഷംഗവധതോഷിത | : | മന്ത്രി |
| മാണിക്യമകുടാകാരജാനുദ്വയവിരാജിത | : | മാണി |
| സംസാരപങ്കനിര്‍മഗ്നസമുദ്ധരണപണ്ഡിത | : | സംസാര |
ഏതു പേരാണു് അവസാനം സ്വീകരിച്ചുതെന്നു് ഗസറ്റ് വിജ്ഞാപനം വഴി അറിയിക്കുന്നതാണു്.
പ്രത്യേക അറിയിപ്പു്: കാര്യങ്ങള്‍ ഇത്രയുമായ സ്ഥിതിയ്ക്കു് ഗംഗ എന്നോ ഗംഗയുടെ പര്യായങ്ങളോ പേരുള്ള ഒരാളും പോര്‍ട്ട്‌ലാന്‍ഡിലോ പരിസരത്തിലോ വരാന്‍ പാടില്ല എന്നും വന്നാല്‍ പ്രത്യാഘാതങ്ങള്‍ (മേഘത്തിന്റെ ഘ) ഗുരുതരമായിരിക്കും എന്നും സിന്ധു മുന്നറിയിപ്പു നല്‍കിയിരിക്കുന്നു.
മേല്‍പ്പറഞ്ഞ കാരണങ്ങള്‍ കൊണ്ടു് ഗുരുകുലവും എന്റെ മറ്റു പരിപാടികളും ഇനിയൊരു അറിയിപ്പുണ്ടാകുന്നതു വരെ അടച്ചുപൂട്ടുകയാണു്. എല്ലാവരും വെക്കേഷന് അടിച്ചുപൊളിക്കുക. അഭിവാദ്യങ്ങള്‍. അടുത്ത സ്കൂള്‍വര്‍ഷം മഴ തുടങ്ങുമ്പോള്‍ കാണാം.
Umesh::ഉമേഷ് | 10-Nov-06 at 6:37 am | Permalink
ഏറ്റവും ചൂടുള്ള വാര്‍ത്ത-കുമാരസംഭവം.
കൂടാതെ, വക്കാരിയുടെ യഥാര്‍ത്ഥപേരു്, പാര്‍വ്വതിയുടെ പര്യായങ്ങള്‍, വിക്കിയുടെ ഭാവി തുടങ്ങി വിജ്ഞാനപ്രദമായ പല കാര്യങ്ങളും അടങ്ങിയതു്.
ഗുരുകുലം വിന്റര്‍ വെക്കേഷനു് അടയ്ക്കുന്നു. ഒന്നു രണ്ടു മാസത്തിനു ശേഷം കാണാം.
mullappoo | 10-Nov-06 at 6:48 am | Permalink
വായിച്ചു. വിശാഖിനെയും വിഘ്നേശിനെയും കണ്ടു. പാവം സിന്ധു ചെച്ചി. ഇവരല്ലേലും ഇങ്ങനെയാ സിന്ധുച്ചെചി. പണി മുഴുവന്‍ നമുക്കും . അവസാനം അവര്‍ ഒറ്റക്കെട്ടും. 🙂
ആശം സകള്‍.
mullappoo | 10-Nov-06 at 6:51 am | Permalink
അയ്യോ ചോദിക്കാന്‍ മറന്നു. വാക്കരീ സങ്കല്പം സത്യം തന്നെയൊ ? പേരു ? നാടു?എല്ലാം. എന്ന പിന്നെ വീട്ടില്‍ പോണ വഴിക്കു അവിടെ ഒന്നു കയറാം.
ഇതിനു പി.എച്ച്.ഡി. അല്ല അതിലും ഒരു പടി കൂടിയ എന്തേലും തരും. 😉 വാകാരി വന്നോട്ടെ. ഉമേഷേട്ടാ.
Adithyan | 10-Nov-06 at 6:51 am | Permalink
നമിക്കുന്നു സാ‍ാ‍ാര്‍…
ഇതിനോടൊക്കെ വേറേ എങ്ങനെ പ്രതികരിക്കണം എന്നറിയില്ല.
മീനാക്ഷി | 10-Nov-06 at 7:03 am | Permalink
അമ്പട ഞാനേ! ആദ്യമായാണ് എന്തിനെങ്കിലും പ്രൈസ് അടിക്കുന്നത്. വര്‍മ്മാജീ, നൂറുപവനായാലും ഞാന്‍ സ്വീകരിക്കുന്നതാണ്. ബാക്കിയുള്ള ഒരു പവന്‍ വിഘ്നേശിന്റെ 28-ന് സമ്മാനമായി കൊടുക്കണേ.
ഉത്സവം | 10-Nov-06 at 12:52 pm | Permalink
ആദിയുടെ കമന്റേ എനിക്കും പറയാനുള്ളൂ
നമിച്ചു.
വക്കാരിയെ ക്കുറിച്ച് 2 വാക്ക് (ഗുരുകുലത്തില്‍ വന്ന് തിരുത്താന്‍ ഞാന്‍ ആളല്ല എങ്കിലും :-))
നമ്മുടെ വക്കാരിയേക്കുറിച്ചല്ലാ സാക്ഷാല്‍ ജപ്പാന്‍ കാരുടെ വക്കാരിമഷ്താ (wakarimashita)(分かりました)
(root form 分かる) എന്നാല്‍ to understand, to be understood,to know എന്നര്‍ത്ഥം.
ആരെങ്കിലും എന്തെങ്കിലും പറഞ്ഞ് തന്നിട്ട് പുടികിട്ടിയോ എന്നു ചോദിച്ചാല്‍ ജപ്പാനില്‍ ആണെങ്കില്‍ പിടികിട്ടിയെങ്കില്‍ ഉടന്‍ പറയുക “ഹൈ(yes) വക്കരിമഷ്താ(understood)”
ഓക്കെ,ഓള് റയിറ്റ് = ദായിജോബു
അതു ശരി = സോ ദെസ് നേ
പിന്നെക്കാണാം = മതാ നേ, മതാ ഔ
എന്നാലും ആ വക്കാരിപ്പേരു വന്നത് ഗവേഷിച്ച് കണ്ടുപിടിച്ച വഴി…ഒന്നു കൂടി നമിയ്ക്കുന്നു.
അനംഗാരി | 10-Nov-06 at 2:19 pm | Permalink
ഹാവൂ, ഈ ഗവേഷണം ഭയങ്കരം തനെ. ഒരു പേരിനു പിന്നില്‍ എന്തിരിക്കുന്നു എന്ന പഴഞ്ചന്‍ പല്ലവി ഇനി ദൂരെക്കളയാം.5,6,7,8 അതങ്ങിനെ നീളട്ടെ.
പയ്യന്‍സ് | 10-Nov-06 at 3:23 pm | Permalink
വിനായകന് ഒരു വലിയകഷണം അല്ലെങ്കില്‍ വേണ്ട ഫുള്‍ പീസ് ആശംസ ഇതോടൊപ്പം പോസ്റ്‍റുന്നു. വക്കാരിയുടെ നാമം ഒരു ഗവേഷണാത്മക അ’ഫ്യാ’സം ക്ഷ ആയി.
ബിന്ദു | 10-Nov-06 at 6:47 pm | Permalink
ആഹാ! വന്നല്ലൊ വനമാലന്‍.:)ആശംസകള്‍ള്‍… ള്‍!!!
പേരു കൊള്ളാം. 101 പവന്‍ നഷ്ടമായി, നേരത്തെ ഒരു വാക്കു പറഞ്ഞിരുന്നെങ്കില്‍…
പിന്നെ സിന്ധുചേച്ചിയുടെ പേരാണെന്നും പറഞ്ഞ് ദേവിസഹസ്രനാ‍മം എഴുതിവച്ചിരിക്കുന്നു അല്ലേ? 😉
വക്കാരി ചരിതം സത്യമോ? :O
Kiranz..!! | 10-Nov-06 at 6:52 pm | Permalink
ഈശ്വരാ……
ഇഞ്ചിപ്പെണ്ണ് | 19-Nov-06 at 3:41 pm | Permalink
ഹയ്..ഉമേഷേട്ടാ… ഹാ‍പ്പി ബര്‍ത്തഡേ!
കുഞ്ഞുവാവ ശാര്‍ദ്ദൂലവിക്രീഡിതം വൃത്തത്തിലാണൊ കരയണേ?
വെക്കേഷന് പോര്‍ട്ടലാന്റിലോട്ട് വന്നാലോന്ന് കരുതിയതാ,ഇനി ഇപ്പൊ കുഞ്ഞുവാവയൊക്കെ ആയിട്ട് അവിടെ ഭയങ്കര ബിസി ആയിരിക്കുമല്ലേ? സിന്ധുചേച്ചീന്റെ അമ്മയാണൊ അത്?
devaragam | 19-Nov-06 at 4:08 pm | Permalink
ങേ? ഇതാര്‌ ഇഞ്ചിയോ? കിണറ്റില്‍ മുങ്ങിയാല്‍ കുളത്തില്‍ പൊങ്ങുന്ന ആകെ ഒരാളിനേ എനിക്കു പരിചയം ഉണ്ടായിരുന്നുള്ളു ഇതുവരെ- ആട്ടോക്കലാധരനെ. ഇപ്പോ ഇഞ്ചിയേയും ആ പട്ടികയില്‍ പെടുത്തി.
നാട്ടില്‍ പോയിരുന്നോ?
ഗുരുക്കളേ,
പേരിട്ടുകഴിഞ്ഞ സ്ഥിതിക്ക്‌ ഇനിയൊന്നും പറയാനില്ല. ഇല്ലെങ്കില്‍ ചില നിര്‍ദ്ദേശങ്ങള്‍ വച്ചേനെ. ഒരു സാമ്പിളിന്‌ ഇതു പിടിച്ചോ. “അയ്യത്താര്‌” – പേരു കേട്ടാല്‍ നല്ല തദ്ദേശി ദ്രാവിഡ ദ ദൈവത്തിന്റെ പേരാണെന്നു തോന്നുകയും ചെയ്യും, രാത്രി മോനെ “അയ്യത്താരേ” എന്നു നീട്ടി വിളിക്കുമ്പോല്‍ അയ്യത്തു വല്ല കള്ളനോ കുടിയനോ നില്‍പ്പുണ്ടെങ്കില്‍ അപ്പോഴേ ഓടിക്കൊള്ളുകയും ചെയ്യും.
Umesh::ഉമേഷ് | 19-Nov-06 at 4:22 pm | Permalink
ഇഞ്ചിയേ,
സിന്ധുവിന്റെ അമ്മ തന്നെ. പക്ഷേ പേരു് “ഭയങ്കര ബിസി” എന്നല്ല:)
ഇഞ്ചിയ്ക്കു പോര്‍ട്ട്‌ലാന്‍ഡില്‍ വരാന്‍ സമയമൊന്നും നോക്കേണ്ട. എപ്പോഴും സ്വാഗതം. ഇഞ്ചി വന്നിട്ടു വേണം ഇഞ്ചിയുടെ കൂടെ ഒരു ഫോട്ടോ എടുത്തു ഫ്രെയിം ചെയ്തു വെക്കാന്‍. യേശുദാസ്, അബ്ദുള്‍ കലാം, ബില്‍ ഗേറ്റ്സ്, റസ്സല്‍ ക്രോ തുടങ്ങിയവരോടും ഇതു തന്നെയാണു പറയാനുള്ളതു്. മഹാത്മാക്കളുടെ പാദസ്പര്‍ശത്താല്‍ എന്റെ ഭവനം പുളകിതമാവട്ടേ.
(വീട്ടില്‍ ഫ്രെയിം ചെയ്തു വെച്ചില്ലെങ്കിലും ബൂലോഗത്തില്‍ ഇഞ്ചിയുടെ പടമിടണമെന്നു് ആഗ്രഹമുണ്ടു്. “ഇഞ്ചിപ്പെണ്ണു് ഈ ബ്ലോഗിന്റെ നാഥ” എന്നെഴുതി വെയ്ക്കുകയും വേണം 🙂 )
തേവരേ,
“അയ്യത്താരു” കലക്കി.. ശ്ശെ. ഇത്തിരി നേരത്തേ പറഞ്ഞുകൂടായിരുന്നോ?
(പഴയ കൊല്ലം ജില്ലയുടെ വെളിയിലുള്ളവര്‍ക്കായി: അയ്യം = പറമ്പു്. അയ്യത്തു പോവുക = ലണ്ടന്‍ സന്ദര്‍ശിക്കുക.)
atulya | 19-Nov-06 at 5:33 pm | Permalink
ഉമേശു മാശേ..എന്റെ നോമിനേഷനായ വിഷ്ണു ഏത് രൗണ്ടില്‍ , എങ്ങനെ പുറന്തള്ളപ്പെട്ടു? ഒരു അമ്മായി എന്ന നിലയ്ക്‌ എ നീഡ്‌ എ വാലീഡ്‌ ആന്റ്‌ സാറ്റിസ്ഫ്യൈയിംഗ്‌ എക്സപ്ലനേഷന്‍!! പ്ലീസ്‌ സബ്മിറ്റ്‌ യുവര്‍ റീസണ്‍സ്‌ ആസ്‌ റ്റു വൈ ഷോ കേസ്‌ നോട്ടീസ്‌ നോട്ട്‌ റ്റു ബി സെന്റ്‌ റ്റു യൂ…..
devaragam | 19-Nov-06 at 5:42 pm | Permalink
വൈഷ്ണവജനതോയും ശൈവരും ഇന്നാളുവരെ മുന്നാളുകാര്‍ ആയിരുന്നു തുല്യേ. ഗുരുകുലത്തില്‍ വിഷ്ണുവെന്ന പേരു രാശിയല്ല. കോമ്പ്രമൈസ്‌ പേരുകള്‍ അതായത്‌ ശിവരാമകൃഷ്ണന്‍ എന്നൊക്കെ വേണേല്‍ ആകാം 🙂
ഇഞ്ചിപ്പെണ്ണ് | 19-Nov-06 at 5:47 pm | Permalink
ആ‍ാ..എനിക്ക് മനസ്സിലായി..എന്തിനാ ഫോട്ടോയെന്ന്. വീട്ടിന്റെ മുന്നില് വീടിന് കണ്ണുകെട്ടാണ്ടിരിക്കാന്‍ വെക്കാനല്ലേ? 🙂 അതിന് ആദീടെ ഫോട്ടൊ പോരെ?
ഹായ്..ദേവേട്ടാ..നാട്ടിലൊന്നും പോയില്ല.
സന്തോഷ് | 19-Nov-06 at 6:47 pm | Permalink
അതുല്യാജീ, ഷോ കോസ് നോട്ടീസയച്ചാല്‍ പോരേ? 🙂
ഇടിവാള്‍ | 16-Dec-06 at 4:48 am | Permalink
ഉമേഷ്ജി
ഇപ്പഴാ കണ്ടത്. മകന്‍ സുഖമായിരിക്കുന്നു എന്നു കരുതുന്നു.
എന്റെ മകന്‍ വിഘ്നേഷിനെ “വിച്ചു” ന്നാ വിളിക്കുക. 2007 ജനുവരി 1 നു 2 വയസ്സാവും.
ഇ പോസ്റ്റീടുമ്പോള്‍,മിന്നലിനേയും, ഇടിവാളിനേയുമൊക്കെ ഓര്‍ത്തു പരാമര്‍ശിച്ചതില്‍ സന്തോഷം;)
എല്ലാ ആശംസകളോടെയും…
wakaari | 16-Dec-06 at 10:34 pm | Permalink
ങാ…ഹാ… ബൂലോക ഊപ്പയപ്പസര്‍പ്പക്കാരെയൊക്കെ പിന്നെയും പിന്നെയും ആരോ കിനാവിന്റെ വഴിതെറ്റിക്കാന്‍ കച്ചയും കച്ചിയും കെട്ടിയിറങ്ങിരിക്കുകയാണല്ലേ പാവം ഉരഗേഷ്‌ജി 🙂
സഹഹൃദയരേ, ഹൃദയമുള്ളവരേ, ഏക് ഏക് ശൂന്യ് ശൂന്യ് ശൂ ശൂന്യഹൃദയരേ, നിങ്ങള്‍ പതറരുത്, തളരരുത്, പകലരുത്, പലരരുത്, പഴമരുത്, വഴി തെറ്റരുത്. ഇതെല്ലാം നിങ്ങളെ പരീക്ഷിക്കാന്‍ ഉമേഷ്‌ജിയുടെ ചില ചിന്ന നമ്പ്ര് കള്‍ മാത്രം. ഞാന്‍ ഇതൊന്നുമല്ലെന്ന്… ഞാന്‍ ചുമ്മാ ഒരു കഥയില്ലാത്തവന്‍ 🙂
ഉമേഷ്ജി, ജൂനിയറിന് ഇവിടെയും ഒരു സ്വാഗതം. ഇതിപ്പോഴാ നേരാംവണ്ണം വായിച്ചത്.
siji | 17-Dec-06 at 1:32 am | Permalink
പേരിടലിന്റെ കഥ വളരെ നന്നായിട്ടുണ്ട്‌.ഒരു പേരിലെന്തിരിക്കുന്നുവെന്ന് ചോദിക്കുന്നവരുണ്ട്‌ എന്നാല്‍ അത് ഒരു’ഇടലായി’ നടത്തുമ്പോളുള്ള ഭൂകമ്പങ്ങള്‍ വലുതാണ്‌
എന്റെ രണ്ടു പുത്രമ്മാര്‍ക്കും കൃഷ്ണ സംബന്ധിയായ പേരായിരുന്നു വെക്കാന്‍ ഞങ്ങള്‍ക്കു താത്പര്യം,എന്നാല്‍ വീട്ടുകാര്‍ക്ക്‌ ശിവനും അതിനു വേണ്ടിയൊരു അടിയൊക്കെ നടന്ന് അവസാനം ഞങ്ങള്‍ക്കിഷ്ടമുള്ള ‘ഗോവര്‍ദ്ധന്‍’ എന്നപേരു വച്ചു. പിന്നെ അടുത്ത കുട്ടിയുണ്ടായപ്പോളാണ്‌ വേറെ യുദ്ധം നാട്ടില്‍ നിന്ന് ആരും ഒന്നും മിണ്ടുന്നില്ല.’നിങ്ങള്‍ക്കിഷ്ടമുള്ളതു തന്നെ വെച്ചേക്ക്‌’ എന്ന് മറുപടി.അതേതായാലും നന്നായി ഒരു യുദ്ധം ഒഴിവായിക്കിട്ടിയല്ലോ. പ്രഹളാദ്‌ എന്നു ഞങ്ങള്‍ വെച്ചു. പിന്നെത്തുടങ്ങ്‌ പ്രശ്നങ്ങള്‍ പുരാണത്തില്‍ പ്രഹളാദ്‌ കഷ്ടതയനുഭവിക്കുന്ന കുട്ടിയാണ്‌ ഈ പേര് ദോഷേ ചെയ്യൂന്നായി എല്ലാവരും.എന്തായാലും കൃഷ്ണ ഭക്തരായ ഞങ്ങള്‍ പേരു മാറ്റിയിട്ടില്ല.സായിപ്പമ്മാര്‍ക്ക്‌ പറയാന്‍ വിഷമമുള്ള പേരാണ്‌ രണ്ടും എന്നാലും സാരമില്ല അവരുടെ എത്ര വിഷമമുള്ള പേരും നമ്മള്‍ പ്രൊനൗണ്‍സ്‌ ചെയ്യുന്നില്ലേ അതുപോലെ അവരും ഒന്ന് ട്രെ ചെയ്യട്ടേന്നെ.എന്റെ സിജി ന്നുള്ള പേരു പോലും പ്രൊനൗണ്‍സ്‌ ചെയ്യാന്‍ സായിപ്പന്മ്മാര്‍ക്കാവില്ല സെജി,സീജീ എന്നൊക്കെയാ പറയുക അപ്പോപ്പിന്നെ എല്ലാം കണക്കായില്ലേ…
siji | 17-Dec-06 at 1:40 am | Permalink
പിന്നെ ഉമേഷ് മാഷേ എനിക്കൊരു സംശയം ഉണ്ട്‌.
നമ്മുടെ ബ്ലോഗുകളില്‍ ‘അര്‍മ്മാദിക്കുക’ എന്നൊരു വാക്ക് ആഹ്ലാദിക്കുക എന്ന അര്‍ത്ഥത്തിലോ ആമോദിക്കുക എന്ന അര്‍ത്ഥത്തിലോ മിക്കവരും ഉപയോഗിക്കാറുണ്ട്‌.ഞാനിതുവരേയും ആ പദം കേട്ടിട്ടില്ല,അതു മലയാള ഭാഷയില്‍ നിലവിലുള്ള പദമാണോ? അതോ കേരളത്തിലെ ചില ഭാഗങ്ങളില്‍ മാത്രം ഉപയോഗിക്കുന്ന പദമാണോ? അതോ ഞാനിതുവരേയും കേള്‍ക്കാത്ത മലയാള പദമാണോ?
മറുപടി തരുമല്ലോ…
Viswaprabha വിശ്വം | 17-Dec-06 at 2:01 am | Permalink
സിജീ,
എന്തായാലും അതു നന്നായി!
ഒരാള്‍ കൂടി വിരുന്നു വരുകയാണെങ്കില്‍ ‘ഹ്രീഹ്ലാദന്‍’ എന്നു പേരിടാന്‍ പ്രത്യേകം ശ്രദ്ധിക്കുമല്ലോ!
അര്‍മ്മാദം അഥവാ ആര്‍മ്മാദം ഒരു പുതിയ മലയാളവാക്കാണ്. ‘അടിപൊളി’, ‘അല്‍ക്കുല്‍ത്ത്’, ‘ചെത്ത്’ തുടങ്ങിയവന്മാരുടെ അനിയനായി വരും! ആദിയോ ദില്‍ബുവോ ശ്രീജിത്തോ അങ്ങനെ ഏതോ ഒരു ആര്‍മാദിയാണ് ക്യാമ്പസുകളില്‍ നിന്നും ആ ടീനേജ് വാക്കിനെ ബൂലോഗത്തേക്കു കൊണ്ടുവന്നത്. ഇക്കണക്കിനു പോയാല്‍ അതു പത്തുപതിനഞ്ചുകൊല്ലത്തിനുള്ളില്‍ നിഘണ്ടുവില്‍ കട്ടിമഷിയില്‍ എഴുതിയ ഒരു പദമാവും അത്.
ഹ്രീഹ്ലാദം പക്ഷേ വളരെ പഴയ ഒരു വാക്കാണ്. എല്ലാവരും മറന്നുപോയി. ബൂലോഗത്ത് അതിനൊരു പുനര്‍ജ്ജന്മം കിട്ടി ഈയിടെയായി. അതിനുശേഷം ഉമേഷ് ഉറക്കമെണീറ്റാല്‍ ആദ്യം പത്തു പ്രാവശ്യം ആ വാക്കു ജപിക്കും. പിന്നെയേ ബാക്കി കാര്യമുള്ളൂ.
ഹ്രീഹ്ലാദത്തെക്കുറിച്ച് ആര്‍മ്മാദിച്ച് ഒരു പോസ്റ്റ് ഉടനെ വരും എന്റെ തമോഗര്‍ത്തത്തില്‍!
ബൂലോഗങ്ങളില്‍ പിന്നെയും പല വാക്കുകളും പ്രചാരത്തില്‍ വരുന്നു: ഉദാഹരണത്തിന്: നമ്മുടെ തൃശ്ശൂക്കാരുടെ തന്നെ ‘ഗഡി’, ‘പൂശ്’, ‘വേണ്ട്രാ’,’ര് ജാ‍ാതിസ്റ്റ!’ ഒക്കെ കൊടകര-പോട്ട-കൂടല്‍മാണിക്യം-വെങ്കിടങ്ങ് തട്ടകങ്ങളില്‍ നിന്നും പ്രസരിക്കുന്നുണ്ട്. അതുപോലെ തമിഴ്, കന്നട, ഹിന്ദി ഒക്കെ …
‘ബൂലോഗം’, ‘ പിന്മൊഴി’ ഇവയും ബ്ലോഗുകളില്‍നിന്നും പുറത്തേക്കു പതഞ്ഞുപോകുന്ന വാക്കുകള്‍ തന്നെ!
su | 17-Dec-06 at 2:36 am | Permalink
സിജീ,
ആര്‍മ്മാദിക്കുക എന്ന് ഞാന്‍ ആദ്യം കേള്‍ക്കുന്നത്, അല്ലെങ്കില്‍ ശ്രദ്ധിക്കുന്നത് ഇഷ്ടം എന്ന സിനിമയില്‍ ആണ്. അതില്‍ ഇന്നസെന്റ് പറയുന്നുണ്ട് ആര്‍മ്മാദം എന്ന വാക്ക്.
ഉമേഷ്ജീ,
ഓഫിനു മാപ്പ്
siji | 17-Dec-06 at 12:44 pm | Permalink
അതു ശരി.ഞാന്‍ ഇതേതാണ്ട്‌ ഭയങ്കര സാഹിത്യ ബുജികള്‍ ഉപയോഗിക്കുന്ന എനിക്കറിയാത്ത വാക്കായിട്ടാണ്‌ കണക്കാക്കിയത്‌.വിശ്വേട്ടനും ഉമേഷേട്ടനും നന്ദി.പിന്നെ വിശ്വേട്ടാ അടുത്ത കുട്ടിക്ക്യോ? ഇനിയൊരുകുട്ടിക്കായി എന്നെ ഇങ്ങനെ ശപിക്കരുത്‌..രണ്ടെണ്ണത്തിനെ പെറ്റുവളര്‍ത്തിയതിന്റെ ത്ണ്ടല്‍ വേദനയും തലവേദനയും ഒന്നടങ്ങിയിട്ടേയുള്ളു.ആപേരെന്തായാലും എന്റെ ചേട്ടന്റെ കുട്ടിക്കായി നിര്‍ദ്ദേശിക്കാം.പിന്നെ ഉമേഷേട്ടാ കുഞ്ഞുമോന്‍ നന്നായി ഉറങ്ങുന്നുണ്ടോ?ഇവടത്തെ 2 എണ്ണത്തിനും 7 മാസം വരെ ഉറക്കമേയില്ലായിരുന്നു.നാട്ടില്‍ നിന്നും വിസകിട്ടാതിരുന്നതിനാല്‍ 2 പ്രാവശ്യവും ആരും വന്നില്ല.
ഉമേഷേട്ടന്റെ കുട്ടികളുടെ പേര് വളരെ നന്നായിട്ടുണ്ട്‌.
devaragam | 17-Dec-06 at 12:53 pm | Permalink
പവിത്രേടേം വിക്കീടേം ഹാരീടേം പിറകേ കൊച്ചുങ്ങളിനീം ഒറ്റക്കും ഇരട്ടക്കും (ട്രിപ്‌ലെറ്റ്സ് ആരും വരുന്നതായി അറിവ് കിട്ടിയിട്ടില്ല) കുറേ വരാന്‍ പോകുന്നു. ബൂലോഗത്ത് ഇത്രയും സാഹിതീസാഹ്യകരര്‍ ഉള്ളസ്ഥിതിക്ക് ആരെങ്കിലും ഒരു ബേബി നെയിം പോസ്റ്റ് തുടങ്ങോ.
devaragam | 17-Dec-06 at 12:58 pm | Permalink
കരനല്ല, കരര്‍. ബീയര്‍ എന്നതിലെ ര്. ഗുരുക്കളേ കമന്റ് ഡിലീറ്റാന്‍ സംവിധാനം വയ്ക്കോ, അച്ചരപ്പിചാചിനെ ഉച്ചാടന്‍ ചെയ്യാനാവുന്നില്ല
ദില്‍ബാസുരന്‍ | 17-Dec-06 at 2:21 pm | Permalink
വിശ്വേട്ടന്‍ ഈ പോസ്റ്റ്ല് വന്നും തമോഗര്‍ത്തത്തിന്റെ പരസ്യമിട്ടോ? ജ്ഞ്ജിലിപ്പുകളുടെ ഉത്തുംഗശൃംഗങ്ങളില്‍ ഹ്രീഹ്ലാദാരവങ്ങള്‍ മുഴക്കി അര്‍മ്മാദിയ്ക്കാന്‍ എല്ലാരും വിശ്വേട്ടന്റെ തമോഗര്‍ത്തതില്‍ പോകൂ. വെള്ളം ചേര്‍ക്കാതെ വെട്ടിരുമ്പടിച്ച എഫക്റ്റ് ഞാന്‍ ഗ്യാരണ്ടി! 🙂
ഓടോ: വോ.. പിന്നേ.. ഏത് ഉമേഷേട്ടന്റെ പോസ്റ്റായാലും ഞാന്‍ ഓഫടിയ്ക്കും. അടിച്ചിരിയ്ക്കും.
(ഇങ്ങനെ ചിരിപ്പിച്ച് കൊല്ലരുത് ഉമേഷേട്ടാ..അപ്പൊ എഞ്ജോയ് യുവര്‍ വ്യക്ക്യേഷ്യം)
പച്ചാളം | 17-Dec-06 at 3:08 pm | Permalink
ഉമേഷേട്ടാ,
ആശംസകള്‍ വിത്ത് പ്രാര്‍ത്ഥനകള്‍.
എന്നാലും വക്കാരിക്കിട്ട് കൊടുത്ത പണി, വൌ!
നമിച്ചു!
കൃഷ്‌ | krish | 17-Dec-06 at 5:10 pm | Permalink
ഉമേഷ്ജി.. കുമാരസംഭവം വായിച്ച്‌ ചിരിച്ചുപോയി.. മറുപടിയിടാന്‍ വൈകി… എങ്കിലും….
അഭിനന്ദനങ്ങള്‍.
അല്ലാ.. പത്നിയുടെ പുതിയ പേര് ഏതാണെന്നു പറഞ്ഞില്ലല്ലോ. ഇതിന്‌ വോട്ടെടുപ്പ്‌ ഉണ്ടോ..
കൃഷ്‌ | krish
Umesh::ഉമേഷ് | 18-Dec-06 at 2:06 am | Permalink
സിജി,
“ആര്‍മ്മാദിക്കുക” എന്ന വാക്കു് അബദ്ധമാണെന്നു ഞാന്‍ കുറേ മുമ്പേ പറഞ്ഞിരുന്നു-ദാ ഇവിടെ. പിന്നെ, ഇതു് ഇഷ്ടം എന്ന സിനിമയിലുണ്ടെന്നു സൂ പറഞ്ഞ സ്ഥിതിക്കു്‌ ഇനി ചോദ്യമില്ല.
എല്ലാവരുടെയും ശ്രദ്ധയ്ക്കു്,
വക്കാരിയെപ്പറ്റി എഴുതിയതു മുഴുവന്‍ തമാശയാണു്. അദ്ദേഹത്തിന്റെ പേരു് വക്രതുണ്ഡന്‍ എന്നല്ല, വീടു കാരിത്താസിലല്ല, മാസ്റ്ററായി ജോലി ചെയ്തിട്ടില്ല, തെക്കുകിഴക്കേ ഇന്ത്യയില്‍ പഠിപ്പിച്ചിട്ടില്ല, വക്കാരിമഷ്ടായുടെ അര്‍ത്ഥം വക്കാരി പറഞ്ഞതുതന്നെയാണു്, എനിക്കു് ഈ ജന്മം തമിഴ്‌നാടു മുഖ്യമന്ത്രിയായില്ലെങ്കില്‍ പി. എഛ്. ഡി. കിട്ടാനും പോകുന്നില്ല 🙂
[മറ്റൊരിടത്തു പറഞ്ഞതു പോലെ വക്കാരി ഇപ്പോള്‍ അമേരിക്കയിലുമല്ല. എങ്കിലും ഇംഗ്ലീഷ് സംസാരിക്കുന്ന ഒരു നാട്ടിലാണെന്നൊരു ക്ലൂ തരാം. രാവിലെ എഴുനേറ്റാല്‍ പല്ലുതേപ്പു് തുടങ്ങിയവയ്ക്ക് ഒരു മണിക്കൂര്‍ എടുത്തിട്ടു് അതിനു ശേഷമേ കമ്പ്യൂട്ടറില്‍ കയറൂ എന്നും പറഞ്ഞുതരാം. എങ്ങനെയുണ്ടു വക്കാരീ ജീവിതം?]
(വക്കാരിയേ, ഇതില്‍ ഏതെങ്കിലും അബദ്ധത്തില്‍ ശരിയായെങ്കില്‍ അറിയിക്കുക. ഒരു ലോട്ടറി ടിക്കറ്റ് എടുക്കാനാ 🙂 )
ഈ പോസ്റ്റില്‍ ആ ഫോട്ടോയ്ക്കു മുകളിലുള്ളതേ സത്യമുള്ളൂ. സിന്ധുവിന്റെ പേരു മാറ്റാനും ഉദ്ദേശമില്ല. സിദ്ധാര്‍ത്ഥന്‍ ശബ്ദതാരാവലി ഉണ്ടാക്കുമ്പോള്‍ അതില്‍ സിന്ധു എന്ന വാക്കിനു പാര്‍വ്വതി എന്ന പേരു് എഴുതിച്ചേര്‍ക്കാനാണു പുതിയ പ്ലാന്‍.
ഇടിവാളേ,
രാജേഷ് വര്‍മ്മ ഇവിടെ ഈ വാര്‍ത്ത ഇട്ടപ്പോള്‍ പേരൂഹിക്കാന്‍ ഒരു മത്സരമിട്ടിരുന്നു. ഇവിടെ ഞാന്‍ രണ്ടു ഹിന്റും കൊടുത്തിരുന്നു. അതിലൊന്നായിരുന്നു പ്രിയങ്കരനായ ഒരു ബൂലോഗപ്പുലിയുടെ മകന്റെ പേരാണെന്നതു്. വാളിന്റെ ഹോം പേജില്‍ നിന്നാണു് എനിക്കു മകന്റെ പേരു കിട്ടിയതു്. വിഘ്നേശിന്റെ പേരു് അതിനു മുമ്പേ തീരുമാനിച്ചിരുന്നു.
വിശാഖിനെത്തന്നെ വിച്ചു, വിച്ചാ എന്നൊക്കെ വിളിക്കും. പിന്നെ വിഘ്നേശിനെ എങ്ങനെ അങ്ങനെ വിളിക്കും?
തേവരേ,
കമന്റു തിരുത്താന്‍ എനിക്കൊരു കമന്റോ മെയിലോ ഇട്ടാല്‍ മതി. ഞാന്‍ തിരുത്തിക്കൊള്ളാം. കമന്റു ഡിലീറ്റാന്‍/തിരുത്താന്‍ വകുപ്പു കൊടുക്കണമെങ്കില്‍ ലോഗിന്‍/പാസ്‌വേര്‍ഡ് സംവിധാനം ഏര്‍പ്പെടുത്തേണ്ടി വരും. അതു വേണമെങ്കില്‍ ചെയ്യാം. പക്ഷേ എല്ല്ലാവര്‍ക്കും ആതു ബുദ്ധിമുട്ടാകും.
എല്ലാവര്‍ക്കും നന്ദി.
Jayarajan | 10-Nov-07 at 5:31 pm | Permalink
ഉമേഷ്ജീ, വിക്കിക്ക് എന്റെ വക ‘ബിലേറ്റഡ്’ ജന്മദിനാശംസകള്‍. പഴയ പോസ്റ്റുകളെല്ലാം വായിക്കുന്ന കൂട്ടത്തില്‍ ഇത് കണ്ടപ്പോള്‍ തന്നെ വിചാരിച്ചിരുന്നതാണ്: നവംബര്‍ 6-ന് തന്നെ ഒരു ആശംസ ഇടണമെന്ന്. പക്ഷേ എന്റെ മറവി 🙁
babu kalyanam | 06-Apr-08 at 7:08 pm | Permalink
“ഉന്മേഷനിമിഷോത്‌പന്നവിപന്നഭുവനാവലി : ഉന്മേഷ”
മതി. ഉന്മേഷ – ഉമേഷ് എന്നു കേള്‍ക്കുമ്പോള്‍ ഒരു ഉന്മേഷം ഒക്കെ ഉണ്ട്‌. 😉
ഹോം പേജില്‍, വിഘ്നേഷിന്റെ പേര് ചേര്‍ക്കാന്‍ മറന്നോ?
I mean ഇവിടെ ->http://www.usvishakh.net/
Dr. P. Narayanan | 07-Jul-16 at 5:24 am | Permalink
എനിക്കറിയുന്ന ഒരു സംസ്കൃതം പ്രൊഫസ്സറുടെ മകളുടെ പേര് മിത്ഥ്യ എന്നാണ്. അർത്ഥം ചോദിച്ചപ്പോൾ ദേവിയുടെ പേരായി ലളിതാസഹസ്രനാമത്തിലുണ്ടെന്നാണ് മറുപടി പറഞ്ഞത്.അങ്ങനെയൊരു നാമം അതിലില്ലല്ലോ എന്നു പറഞ്ഞപ്പോൾ മിത്ഥ്യാ ജഗദധിഷ്ഠാനാ എന്നു അദ്ദേഹം ചൊല്ലിക്കേൾപ്പിച്ചു.മിത്ഥ്യാജഗദധിഷ്ഠാനാ എന്ന ഒറ്റനാമത്തെയാണ് അദ്ദേഹം ഇങ്ങനെ പിരിച്ചത് എന്നു മനസ്സിലായപ്പോൾ ചിരിക്കണമോ കരയണമോ എന്നു മനസ്സിലായില്ല. വാൽക്കഷ്ണം- മിത്ഥ്യാ എന്നതു സംസ്കൃതത്തിൽ ഒരു അവ്യയമാണ്, ആകാരാന്ത സ്ത്രീലിങ്ഗശബ്ദമല്ല.