അല്പം വൈകിയാണെങ്കിലും എല്ലാവര്‍ക്കും ഈസ്റ്റര്‍ ആശംസകള്‍!
വൈകാതിരിക്കുന്നതെങ്ങനെ? ഈക്കൊല്ലം ഈസ്റ്റര്‍ എത്ര നേരത്തെയാണു വന്നതു്! മാര്‍ച്ച് 23-നു ഈസ്റ്റര്‍ വരുന്നതു കാണുന്നതു് ഇതാദ്യമായാണു്. ഇതു വായിക്കുന്ന മിക്കവാറും ആളുകളുടെയും സ്ഥിതി ഇതു തന്നെയായിരിക്കും. 1913-ല്‍ ആണു് ഏറ്റവും അവസാനം ഇതു സംഭവിച്ചതു്. (95 വയസ്സില്‍ കൂടുതല്‍ പ്രായമുള്ള ആരെങ്കിലും ഗുരുകുലം വായിക്കുന്നുണ്ടോ എന്തോ?) ഇനി ഉണ്ടാവുക 2160-ലും.
മാര്‍ച്ച് 23-നും മുമ്പു് ഈസ്റ്റര്‍ വരുമോ? വരാം. മാര്‍ച്ച് 22 ആണു് ഏറ്റവും നേരത്തേ വരാവുന്ന ഈസ്റ്റര്‍ തീയതി. പക്ഷേ, അതു നമ്മളാരും കാണില്ല. 1818-ലാണു് ഗ്രിഗോറിയന്‍ കലണ്ടറില്‍ ഇതു് അവസാനം വന്നതു്. ഇനി വരുന്നതു് 2285-ലും.
ഏറ്റവും താമസിച്ചു വരുന്ന ഈസ്റ്റര്‍ ഏപ്രില്‍ 25 ആണു്. 1943-ല്‍ ഒരെണ്ണം കഴിഞ്ഞു. ഇനി 2038-ലേ ഉള്ളൂ. നമ്മളില്‍ ചിലരൊക്കെ അതു കാണാന്‍ ഉണ്ടാവും. അത്രയും ക്ഷമിക്കാന്‍ തയ്യാറല്ലാത്തവര്‍ക്കു വേണ്ടി 2011-ല്‍ ഏപ്രില്‍ 24-നു് ഈസ്റ്റര്‍ വരുന്നുണ്ടു്. ഈ അടുത്ത കാലത്തു് ഈസ്റ്റര്‍ ഏറ്റവും വൈകി വന്നതു് 2000-ത്തിലാണു്-ഏപ്രില്‍ 23-നു്.
ലോകത്തിലെല്ലാ ക്രിസ്ത്യാനികളും ഇക്കൊല്ലം മാര്‍ച്ച് 23-നാണോ ഈസ്റ്റര്‍ ആഘോഷിക്കുന്നതു്?
അല്ല എന്നതാണു് ഉത്തരം. കത്തോലിക്കരും പ്രോട്ടസ്റ്റന്റ് വിഭാഗക്കാരും മാര്‍ച്ച് 23-നായിരുന്നു ഈസ്റ്റര്‍ ആഘോഷിച്ചതു്. എങ്കിലും ഓര്‍ത്തോഡോക്സ് ക്രിസ്ത്യാനികള്‍ (യൂ‍റോപ്പിലാണു് ഇവരില്‍ അധികം ആളുകളും) ഏപ്രില്‍ 27-നാണു് ഇക്കൊല്ല്ലം ഈസ്റ്റര്‍ ആഘോഷിക്കുന്നതു്.
ഈസ്റ്റര്‍ കണ്ടുപിടിക്കുവാനുള്ള വിവിധ രീതികളും അതിനു പുറകിലെ ജ്യോതിശ്ശാസ്ത്രയുക്തികളും ഇവിടെ എഴുതിയിരുന്നതു് കണക്കു കണ്ടാല്‍ ബോധക്കേടു വരുന്നവരുടെ സൌകര്യാര്‍ത്ഥം ഈസ്റ്റര്‍ കണ്ടുപിടിക്കാന്‍ എന്ന പോസ്റ്റിലേക്കു മാറ്റിയിരിക്കുന്നു. എങ്കിലും അതിന്റെ നൂലാമാലകള്‍ താഴെ വിശദീകരിക്കുന്നു.
ഈസ്റ്റര്‍ എന്നാണു് ആഘോഷിക്കേണ്ടതിന്റെ ഉത്തരം കണ്ടെത്താന്‍ നാം ബൈബിളിനെത്തന്നെ ശരണം പ്രാപിക്കേണ്ടി വരും. യേശുവിനെ കുരിശിലേറ്റിയതിന്റെ തലേ ദിവസം നടന്ന അത്താഴം യഹൂദരുടെ പെസഹാ (passover) ദിവസമായിരുന്നു എന്നു സുവിശേഷങ്ങള്‍ പറയുന്നു.
- മത്തായി 26:17:
പുളിപ്പില്ലാത്ത അപ്പത്തിന്റെ ഒന്നാം നാളില്‍ ശിഷ്യന്മാര്‍ യേശുവിന്റെ അടുക്കല്‍ വന്നു: നീ പെസഹ കഴിപ്പാന്‍ ഞങ്ങള്‍ ഒരുക്കേണ്ടതു എവിടെ എന്നു ചോദിച്ചു.
- മാര്‍ക്കോസ് 14:12:
പെസഹകുഞ്ഞാടിനെ അറുക്കുന്നതായ പുളിപ്പില്ലാത്ത അപ്പത്തിന്റെ ഒന്നാം നാളില്‍ ശിഷ്യന്മാര്‍ അവനോടു: നീ പെസഹ കഴിപ്പാന്‍ ഞങ്ങള്‍ എവിടെ ഒരുക്കേണം എന്നു ചോദിച്ചു.
- ലൂക്കോസ് 22:7-8:
പെസഹകുഞ്ഞാടിനെ അറുക്കേണ്ടുന്ന പുളിപ്പില്ലാത്ത അപ്പത്തിന്റെ പെരുനാള്‍ ആയപ്പോള്‍ അവന്‍ പത്രൊസിനെയും യോഹന്നാനെയും അയച്ചു: നിങ്ങള്‍ പോയി നമുക്കു പെസഹ കഴിപ്പാന്‍ ഒരുക്കുവിന്‍ എന്നു പറഞ്ഞു.
യോഹന്നാന്‍ 18:28:
പുലര്‍ച്ചെക്കു അവര്‍ യേശുവിനെ കയ്യഫാവിന്റെ അടുക്കല്‍ നിന്നു ആസ്ഥാനത്തിലേക്കു കൊണ്ടുപോയി; തങ്ങള്‍ അശുദ്ധമാകാതെ പെസഹ കഴിപ്പാന്‍ തക്കവണ്ണം ആസ്ഥാനത്തില്‍ കടന്നില്ല.
യോഹന്നാന്‍ 19:13-14:
ഈ വാക്കു കേട്ടിട്ടു പീലാത്തൊസ് യേശുവിനെ പുറത്തു കൊണ്ടുവന്നു, കല്ത്തളമെന്നും എബ്രായ ഭാഷയില്‍ ഗബ്ബഥാ എന്നും പേരുള്ള സ്ഥലത്തു ന്യായാസനത്തില്‍ ഇരുന്നു. അപ്പോള്‍ പെസഹയുടെ ഒരുക്കനാള്‍ ഏകദേശം ആറാം മണിനേരം ആയിരുന്നു. അവന്‍ യെഹൂദന്മാരോടു ഇതാ നിങ്ങളുടെ രാജാവു എന്നു പറഞ്ഞു.
എന്തായാലും പെസഹായ്ക്കു ശേഷമുള്ള ഞായറാഴ്ചയാണു് ഈസ്റ്റര്‍ എന്നു് ഉറപ്പിക്കാം. ഇതാണു് ക്രിസ്തീയസഭകള്‍ അംഗീകരിച്ച നിര്‍വ്വചനം.
നിര്‍വ്വചനം 1: പെസഹായ്ക്കു ശേഷമുള്ള ആദ്യത്തെ ഞായറാഴ്ചയാണു് ഈസ്റ്റര്‍.
ഇനി എന്നാണു പെസഹാ എന്നു നോക്കാം.
യഹൂദരുടെ ഹീബ്രൂ കലണ്ടറിലെ Nisan എന്ന മാസത്തിലെ 15-)ം ദിവസമാണു പെസഹാ. സൂര്യന്‍ ഭൂമദ്ധ്യരേഖയെ തെക്കു നിന്നു വടക്കോട്ടേയ്ക്കു മുറിച്ചു കടക്കുന്ന Vernal equinox-നോ (ഇതു് ഏകദേശം മാര്‍ച്ച് 21-നാണു സംഭവിക്കുന്നതു്) അതിനു ശേഷമോ ഉള്ള ആദ്യത്തെ കറുത്തവാവിനു ശേഷമുള്ള ദിവസമാണു് ഈ മാസം തുടങ്ങുന്നതു്.
കൊന്നപ്പൂക്കള്‍ പൂക്കുന്നതും വിഷുപ്പക്ഷി അലയ്ക്കുന്നതുമൊക്കെ കാലം തെറ്റി നേരത്തേ ആണെന്നു ചിലരൊക്കെ പറയുന്നതു കേള്‍ക്കാറുണ്ടു്. ഇതാവുമോ കാരണം?
അപ്പോള്‍ ഈസ്റ്ററിന്റെ നിര്‍വ്വചനം ഇങ്ങനെ പറയാം.
നിര്‍വ്വചനം 2: മാര്‍ച്ച് 21-നു ശേഷമുള്ള ആദ്യത്തെ കറുത്ത വാവു കഴിഞ്ഞുള്ള പതിനഞ്ചാം ദിവസത്തിനു ശേഷമുള്ള ഞായറാഴ്ചയാണു് ഈസ്റ്റര്‍.
ഇതു തെറ്റാണെന്നു് ഇക്കൊല്ലത്തെ ഈസ്റ്റര്‍ നോക്കിയാല്‍ അറിയാം. മാര്‍ച്ച് 21-നു ശേഷമുള്ള കറുത്ത വാവു് ഏപ്രില്‍ 6-നു്. അതു കഴിഞ്ഞുള്ള 15–)ം ദിവസം ഏപ്രില്‍ 21. അതിനു ശേഷമുള്ള ഞായറാഴ്ച ഏപ്രില്‍ 27. അന്നല്ലല്ലോ ഈസ്റ്റര്‍, മാര്‍ച്ച് 23-നല്ലേ? എവിടെയോ പ്രശ്നമുണ്ടല്ലോ?
ആ പ്രശ്നം തന്നെയാണു് പാശ്ചാത്യരും ഗ്രീക്ക് ഓര്‍ത്തോഡോക്സുകാരും തമ്മിലുള്ള വ്യത്യാസം. ഗ്രീക്ക് ഓര്‍ത്തോഡോക്സുകാര്‍ യഹൂദരുടെ പെസഹാ കഴിഞ്ഞു മാത്രമേ ഈസ്റ്റര്‍ ആഘോഷിക്കുകയുള്ളൂ. ഇക്കൊല്ലം അതു് ഏപ്രില്‍ 27-നാണു്.
പിന്നെ കത്തോലിക്കരും പ്രോട്ടസ്റ്റന്റുകാരും ബാക്കിയുള്ളവരും എങ്ങനെ വേറേ ഒരു ദിവസം ആഘോഷിക്കുന്നു?
ഇതിനു കാരണം മുകളിലുള്ള രണ്ടാം നിര്‍വ്വചനത്തില്‍ സൌകര്യത്തിനു വേണ്ടി വരുത്തിയ ഒരു വ്യത്യാസമാണു്.
കറുത്തവാവിനു ശേഷം 15 ദിവസം കഴിഞ്ഞാല്‍ വെളുത്ത വാവാണല്ലോ. അതുകൊണ്ടു് നിര്‍വ്വചനം ഇങ്ങനെ പരിഷ്കരിച്ചു.
നിര്‍വ്വചനം 3: മാര്‍ച്ച് 21-നോ അതിനു ശേഷമോ വരുന്ന ആദ്യത്തെ വെളുത്ത വാവിനു ശേഷം വരുന്ന ആദ്യത്തെ ഞായറാഴ്ചയാണു് ഈസ്റ്റര്‍.
ഇവിടെ ഒരു പ്രശ്നമുണ്ടു്. മാര്‍ച്ച് 21-നു ശേഷം കറുത്ത വാവിനു മുമ്പു വെളുത്ത വാവാണു വരുന്നതെങ്കില്‍ (ഇക്കൊല്ലം അങ്ങനെയായിരുന്നു) കത്തോലിക്കരുടെ ഈസ്റ്റര്‍ നേരത്തേ വരും. ഓര്‍ത്തോഡോക്സ് ഈസ്റ്റര്‍ അതിനു ശേഷം ഒരു മാസം കഴിഞ്ഞേ വരൂ.
അതു പോകട്ടേ. മൂന്നാം നിര്‍വ്വചനമാണു ശരി എന്നു തന്നെ ഇരിക്കട്ടേ. അപ്പോള്‍ അതനുസരിച്ചാണോ ഈസ്റ്റര്‍ കണ്ടുപിടിക്കുന്നതു്?
ഏയ്, അല്ല. ഈ നിര്‍വ്വചനവും പാലിക്കാന്‍ എന്നാണു വെളുത്ത വാവുണ്ടാക്കുന്നതെന്നു കണ്ടുപിടിക്കണ്ടേ? അതിനു് ജ്യോതിശ്ശാസ്ത്രം ഉപയോഗിക്കണ്ടേ? ശാസ്ത്രം എന്നു കേട്ടാല്‍ അതു പറയുന്നവരെ കുന്തത്തില്‍ കുത്തി തീയില്‍ ചുടാനും വിചാരണ നടത്തി കള്ളസത്യം ചെയ്യിക്കാനുമായിരുന്നല്ലോ സഭയ്ക്കു് അന്നു താത്പര്യം!
ഭൂമിയില്‍ നിന്നു നോക്കുമ്പോള്‍ സൂര്യനും ചന്ദ്രനും കൃത്യം എതിര്‍വശത്തു വരുന്ന (180 ഡിഗ്രി) സമയമാണല്ലോ വെളുത്ത വാവു്. ഇതു് ആവര്‍ത്തിക്കുന്നതു ശരാശരി 29.5307 ദിവസത്തിലൊരിക്കലാണു്. 19 വര്‍ഷത്തില്‍ ശരാശരി 19 x 365.25 = 6939.75 ദിവസം ഉണ്ടു്. ഈ കാലം നേരത്തേ പറഞ്ഞ വെളുത്ത വാവുകള്‍ക്കിടയിലെ കാലയളവിന്റെ ഏകദേശം 235 ഇരട്ടിയാണു്. 235 x 29.5307 = 6939.688. ഈ വസ്തുത (Metonic cycle) പണ്ടേ മനുഷ്യന്‍ ശ്രദ്ധിച്ചിരുന്നു. (എന്റെ പിറന്നാളും ജന്മദിനവും 19 വര്‍ഷത്തിന്റെ കണക്കും എന്ന പോസ്റ്റില്‍ ഇതിനെപ്പറ്റി പറഞ്ഞിട്ടുണ്ടു്) ക്രിസ്ത്യന്‍ സഭാശാസ്ത്രജ്ഞര്‍ ഇതു കൃത്യമായി ഒന്നാകുന്നു എന്നു തീരുമാനിച്ചു.
അപ്പോള്‍ സംഗതി വളരെ എളുപ്പം. വര്‍ഷത്തെ 19 കൊണ്ടു ഹരിക്കുക. ശിഷ്ടം കാണുക. ഒന്നു കൂട്ടുക. 1 മുതല്‍ 19 വരെയുള്ള ഒരു സംഖ്യ കിട്ടും. ഓരോ സംഖ്യയ്ക്കും ഒരു തീയതിയുണ്ടാവും, മാര്‍ച്ച് 21-നു ശേഷമുള്ള ആദ്യത്തെ വെളുത്ത വാവായി. സഭ അതിനു താഴെപ്പറയുന്ന ഒരു പട്ടികയുണ്ടാക്കി.
1 : ഏപ്രില്‍ 5 2 : മാര്‍ച്ച് 25 3 : ഏപ്രില്‍ 13 4 : ഏപ്രില്‍ 2 5 : മാര്‍ച്ച് 22 6 : ഏപ്രില്‍ 10 7 : മാര്‍ച്ച് 30 8 : ഏപ്രില്‍ 18 9 : ഏപ്രില്‍ 7 10 : മാര്‍ച്ച് 27 11 : ഏപ്രില്‍ 15 12 : ഏപ്രില്‍ 4 13 : മാര്‍ച്ച് 24 14 : ഏപ്രില്‍ 12 15 : ഏപ്രില്‍ 1 16 : മാര്‍ച്ച് 21 17 : ഏപ്രില്‍ 9 18 : മാര്‍ച്ച് 29 19 : ഏപ്രില്‍ 17
പട്ടികയില്‍ നിന്നു വെളുത്തവാവുദിവസം കണ്ടുപിടിച്ചു് അതിനു ശേഷം വരുന്ന ഞായറാഴ്ചയായി ഈസ്റ്റര്‍ ആഘോഷിച്ചു. (വെളുത്ത വാവു് ഞായറാഴ്ചയാണെങ്കില്‍ അതിനടുത്ത ഞായറാഴ്ചയാണു് ഈസ്റ്റര്‍).
പില്‍ക്കാലത്തു വന്ന ഗണിതശാസ്ത്രജ്ഞര്‍ ഈ പട്ടികയെ ഒരു ഗണിത/അല്‍ഗരിതരൂപത്തില്‍ ആക്കാന്‍ പറ്റുമോ എന്നു ശ്രമിച്ചു. അവര്‍ കണ്ടുപിടിച്ച വഴി ഇങ്ങനെ: മാര്‍ച്ച് 22-നുള്ള ചന്ദ്രന്റെ “പ്രായം” കണ്ടുപിടിക്കാന്‍ ഒരു സൂത്രവാക്യം ഉണ്ടാക്കി. അതായതു് കറുത്ത വാവു കഴിഞ്ഞു് എത്ര ദിവസം കഴിഞ്ഞാണു മാര്‍ച്ച് 22 വരുന്നതെന്നു്. അതില്‍ നിന്നു പിന്നീടുള്ള വെളുത്ത വാവും അതിനു ശേഷമുള്ള ഞായറാഴ്ചയും കണക്കു കൂട്ടി.
ഇങ്ങനെ ഈസ്റ്റര്‍ ആഘോഷിച്ചു വരുന്ന വേളയിലാണു് കലണ്ടര്‍ പരിഷ്കരണം ഉണ്ടായതു്. എല്ല്ലാ നാലുകൊല്ലത്തിലൊരിക്കല്‍ അധിവര്‍ഷം വരുന്നതും വര്‍ഷത്തിനു കൃത്യം 365.25 ദിവസം എന്നു കണക്കു കൂട്ടുന്നതുമായ ജൂലിയന്‍ കലണ്ടര്‍ കൃത്യമല്ലെന്നും, 400 കൊണ്ടു നിശ്ശേഷം ഹരിക്കാന്‍ പറ്റാത്ത 1900, 1800 തുടങ്ങിയ നൂറ്റാണ്ടുകളെ അധിവര്‍ഷമല്ലാതെ കണക്കാക്കുന്ന ഗ്രിഗോറിയന്‍ കലണ്ടര്‍ ഉപയോഗിക്കണം എന്നും ശാസ്ത്രജ്ഞര്‍ വാദിച്ചു. പല രാജ്യങ്ങളും ഇതിനെ ആദ്യമൊന്നും അംഗീകരിച്ചില്ല. കാരണം 19 വര്‍ഷത്തിലെ ആവര്‍ത്തനം ഈ പരിഷ്കാരത്തിനു ശേഷം വളരെ ബാ‍ലിശമായിപ്പോകും. അവസാനം ഈസ്റ്ററിനു ഫലപ്രദമായ ഒരു കണക്കുകൂട്ടല്‍ ഉണ്ടാക്കിയതിനു ശേഷം മാത്രമേ പലരും ഗ്രിഗോറിയന്‍ കലണ്ടറിനെ അംഗീകരിച്ചുള്ളൂ. പതിനാറാം നൂറ്റാണ്ടില്‍ ആരംഭിച്ച ജൂലിയന്‍-ഗ്രിഗോറിയന്‍ മാറ്റം ലോകരാഷ്ട്രങ്ങള്‍ എല്ലാം അംഗീകരിച്ചതു് ഇരുപതാം നൂറ്റാണ്ടിലാണു്. ഈസ്റ്റര്‍ തന്നെയായിരുന്നു പ്രധാന പ്രശ്നം.
ഈസ്റ്ററിന്റെ കണക്കുകൂട്ടല്‍ പിന്നെയും സങ്കീര്‍ണ്ണമായി. ഗ്രിഗോറിയന്‍ കലണ്ടറിനു വേണ്ടി വരുന്ന കണക്കുകൂട്ടലുകള്‍ ഒരു വശത്തു്. ജ്യോതിശ്ശാസ്ത്രവ്യവസ്ഥകളൊക്കെ കാറ്റില്‍ പറത്തി 19 വര്‍ഷത്തിന്റെ ചാന്ദ്രചക്രത്തെ അടിസ്ഥാനമാക്കി കണക്കുകൂട്ടിയിരുന്ന ഈസ്റ്റര്‍ ഇനി അതേ പോലെ കണക്കാക്കണമെങ്കില്‍ ഒരുപാടു സങ്കീര്‍ണ്ണതകള്‍ വേണ്ടിവരും. അവസാനം അവയും ശരിയാക്കി. ചന്ദ്രന്റെ “പ്രായം” കണക്കാക്കാനുള്ള തീയതി മാര്‍ച്ച് 22-ല്‍ നിന്നു ജനുവരി 1 ആക്കി. മാര്‍ച്ച് 22-ലെ പ്രായത്തില്‍ നിന്നു് ജനുവരി 1-ലെ പ്രായം കണ്ടുപിടിക്കാന്‍ വഴി കണ്ടുപിടിച്ചു. അതില്‍ ഗ്രിഗോറിയന്‍ കലണ്ടറിലെ അധിവര്‍ഷത്തിന്റെ കണക്കുകള്‍ ചേര്‍ത്തു. പിന്നെ മാര്‍ച്ച് 22-നു ശേഷമുള്ള ആദ്യത്തെ വെളുത്ത വാവു കണ്ടുപിടിച്ചു. അതിനടുത്ത ഞായറാഴ്ചയും. ഇതൊക്കെ ചേര്‍ത്തുവെച്ചാല്‍ സാധാരണമനുഷ്യനു് ഒരു എത്തും പിടിയും കിട്ടാത്ത കണക്കുകളായി.
ഇതിനെ ഗണിതസൂത്രവാക്യങ്ങളാക്കാന്‍ പല ഗണിതജ്ഞരും ശ്രമിച്ചു. പ്രസിദ്ധ ഗണിതശാസ്ത്രജ്ഞനായ ഗാസ് ആണു് ഒരാള്‍. ഗാസ് ഒരു അടിപൊളി അല്‍ഗരിതം ഉണ്ടാക്കി. പക്ഷേ ഒരു കുഴപ്പം. എല്ലാ വര്‍ഷത്തിനും അതു ശരിയാവില്ല. അതു കഴിഞ്ഞു് പിന്നീടു പട്ടികകള്‍ ഉപയോഗിച്ചു് ശരിയാക്കണം.
പത്തൊന്‍പതാം നൂറ്റാണ്ടിന്റെ അവസാനത്തിലും ഇരുപതാം നൂറ്റാണ്ടിന്റെ ആദ്യത്തിലുമാണു് ഈസ്റ്റര്‍ കണ്ടുപിടിക്കാനുള്ള കുറ്റമറ്റ ഗണിതരീതികള്‍ ഉണ്ടായതു്. അവയെപ്പറ്റിയുള്ള വിശദമായ വിവരണം ഈസ്റ്റര്‍ കണ്ടുപിടിക്കാന്‍ എന്ന പോസ്റ്റില്‍ വാ‍യിക്കാം.
ഗ്രിഗോറിയന്‍ കലണ്ടറില്‍ ആകെ ഇതു മാത്രമേ സങ്കീര്‍ണ്ണമായുള്ളൂ. ഭാരതത്തിലെ കലണ്ടറുകളുടെ സങ്കീര്‍ണ്ണതകളുമായി താരതമ്യപ്പെടുത്തിയാല്‍ ഇതു് ഒന്നുമല്ല. നമ്മുടെ വിശേഷദിവസങ്ങളും മറ്റും കണ്ടുപിടിക്കാന്‍ സൂര്യോദയാസ്തമയസമയം തുടങ്ങി ഒരുപാടു കാര്യങ്ങള്‍ നോക്കണം. ഇതു പോലെ ഒരു പ്രശ്നം 1957-ല്‍ ഇന്ത്യയില്‍ ശകവര്‍ഷം പരിഷ്കരിച്ചപ്പോഴും ഉണ്ടായി. ഇപ്പോള്‍ വിശേഷദിവസങ്ങളില്‍ പലതും പഴയ നിര്‍വ്വചനങ്ങളുമായി ഒത്തു പോകുന്നില്ല. അതിനെപ്പറ്റി എഴുതാന്‍ വേറെയൊരു വലിയ പോസ്റ്റു തന്നെ വേണം. അതെഴുതിയാല്‍ മധുരാജിന്റെ ഈ ചോദ്യത്തിനു് ഉത്തരവുമാകും.
ജൂലിയന്‍ കലണ്ടറില്‍ 28 വര്‍ഷത്തില്‍ തീയതി-ആഴ്ച കലണ്ടര്‍ ആവര്‍ത്തിയ്ക്കും. 19 വര്‍ഷത്തിലൊരിക്കല്‍ ചാന്ദ്രചക്രവും. ഈസ്റ്റര്‍ രണ്ടിനെയും ആശ്രയിക്കുന്നതുകൊണ്ടു് 28 x 19 = 532 വര്‍ഷത്തില്‍ ഈസ്റ്റര്‍ തീയതികള്‍ ആവര്‍ത്തിക്കും. ഗ്രിഗോരിയന്‍ കലണ്ടരില്‍ സംഭവം ആകെ മാറി. തീയതി-ആഴ്ച കലണ്ടര്‍ 400 കൊല്ലത്തിലൊരിക്കലേ ആവര്‍ത്തിക്കൂ. ചാന്ദ്രചക്രം 14250 വര്‍ഷത്തിലും. അതിനാല്‍ 57,00,000 വര്‍ഷത്തില്‍ ഒരിക്കലേ ഗ്രിഗോറിയന്‍ കലണ്ടറില്‍ ഈസ്റ്റര്‍ തീയതികള്‍ ആവര്‍ത്തിക്കൂ.
ഈ 57,00,000 വര്‍ഷത്തെ ചക്രത്തില്‍ ഏറ്റവും കൂടുതല്‍ തവണ വരുന്ന ഈസ്റ്റര്‍ തീയതി ഏപ്രില്‍ 19 ആണത്രേ – 3.87%. ഏറ്റവും കുറവു് മാര്‍ച്ച് 22-ഉം – 0.48%. വിശദവിവരങ്ങള്‍ ഇവിടെ.
ഗ്രഹചലനങ്ങളുടെ സിദ്ധാന്തങ്ങള്‍ ഉണ്ടാക്കിയ ജോഹനാസ് കെപ്ലര്‍ ഒരിക്കല്‍ പറഞ്ഞു: “ഈസ്റ്റര്‍ ഒരു ആഘോഷം മാത്രമാണു്, ഗ്രഹമല്ല” (“After all, Easter is a feast, not a planet!”). വിശ്വാസത്തില്‍ അധിഷ്ഠിതമായ ആ ആഘോഷം ജ്യോതിശ്ശാസ്ത്രനിര്‍വ്വചനങ്ങള്‍ അനുസരിച്ചു തന്നെ വേണമെന്നു നിര്‍ബന്ധമില്ല. ഈസ്റ്ററും ക്രിസ്തുമസ്സുമൊക്കെ നല്‍കുന്ന സന്ദേശമാണു പ്രധാനം. ഹിന്ദുക്കളെപ്പോലെ ഗ്രഹങ്ങള്‍ ചില സ്ഥലങ്ങളില്‍ നീല്‍ക്കുന്ന ദിവസങ്ങള്‍ മറ്റുള്ളവയെക്കാള്‍ കൂടുതല്‍ വിശുദ്ധമാണു് എന്ന വിശ്വാസവും ക്രിസ്ത്യാനികള്‍ക്കു പൊതുവേ ഇല്ല.
രാജേഷ് വര്‍മ്മയുടെ ഒരു കഥയാണു് “ഉയിര്‍ത്തെഴുന്നേല്‍ക്കണ്ടായിരുന്നു…”.
രാജേഷിന്റെ ക്രിസ്തു അങ്ങനെ പറഞ്ഞതു് ഒരു പക്ഷേ ഉയിര്‍ത്തെഴുന്നേല്‍പ്പിനെച്ചൊല്ലി നടക്കുന്ന കോലാഹലങ്ങള്‍ കണ്ടായിരിക്കും, അല്ലേ?
അപ്പു | 01-Apr-08 at 8:59 am | Permalink
ഉന്മേഷ്ജീ, വളരെ ആധികാരികമായ ലേഖനം തന്നെ ഇത് സംശയമില്ല. കേരളത്തിലെ ഓര്‍ത്തഡോക്സ് സഭകളും, ഈസ്റ്റര്‍ ആചരിക്കുന്ന മറ്റെല്ലാ വിഭാഗങ്ങളും മാര്‍ച്ച് 23 നു തന്നെയാണ് ഈസ്റ്റര്‍ ആഘോഷിച്ചത്, ഈ വര്‍ഷം.
ക്രിസ്തുമസിന്റെയും ഈസ്റ്ററിന്റെയും തീയതികള്‍ കണക്കാക്കുന്ന രീതി എങ്ങനെയായാലും, അതിലെ യുക്തിയും അയുക്തിയും എന്തൊക്കെയായാലും ഒരു യഥാര്‍ത്ഥവിശ്വാസിയെ സംബന്ധിച്ചിടത്തോളം “ദൈവം മനുഷ്യനായി അവതരിച്ചതിന്റെ ഓര്‍മ്മയെകുറിക്കുന്ന ദിവസമാണ് ക്രിസ്തുമസ്” എന്നും അതുപോലെ, “മരണത്തിന്റെമേല്‍ തന്റെ ജയം ഉറപ്പിച്ച്ച്, ക്രിസ്തു പുനരുത്ഥാനം ചെയ്തതിന്റെ ഓര്‍മ്മയെ കുറിക്കുന്ന ദിവസമാണ് ഈസ്റ്റര്‍” എന്നുമാണ് സഭയുടെ വീക്ഷണത്തില്‍ ഈ ദിവസങ്ങള്‍. ഇതിനുപകരം, ക്രിസ്തുവിന്റെ 2008 ആമതു പിറന്നാള്‍ ഡിസംബര്‍ 25 ന് ആചരിക്കുന്നുവെന്നോ, ക്രിസ്തുവിന്റെ 2008 ആമതു മരണദിവസം 2008 മാര്‍ച്ച്ച് 21 ദുഃഖവെള്ളി ആയിരിക്കും എന്നോ ഒരര്‍‌ത്ഥം ഈ ദിവസങ്ങള്‍ക്കില്ല. അതുകൊണ്ട് ഈസ്റ്റര്‍ മാര്‍ച്ച്ച് 23 ന് ആഘോഷിച്ച്ചാലൂം ഏപ്രില്‍ 27 ന് ആഘോഷിച്ചാലും അതില്‍ പ്രത്യേകിച്ച്ച് വിശേഷമോ, വൈരുദ്ധ്യമോ എന്തെങ്കിലും യുക്തിയോ ഉണ്ടെന്ന് എനിക്കു തോന്നുന്നില്ല. ഈ തീയതികളൊന്നും ശരിയാണെന്നും എനിക്കഭിപ്രായമില്ല. നമ്മുടെ വാദങ്ങളൊക്കെയും ഇന്നത്തെ കലണ്ടര്‍ തീയതികള്‍ ശരിയാണ് എന്ന ചിന്തയില്‍ അധിഷ്ഠിതമാണല്ലോ? അത് അങ്ങനെതന്നെയോ?
എന്‍.ജെ. ജോജൂ | 01-Apr-08 at 1:09 pm | Permalink
“ഈയിടെ മാര്‍പ്പാപ്പാ സമ്മതിച്ചു, ഗലീലിയോ പറഞ്ഞതു ശരിയായിരുന്നു എന്നു്. ഡാര്വിനെ എന്നു് അംഗീകരിക്കുമോ എന്തോ? ഡാര്വിനെ അംഗീകരിക്കുന്നതില്‍ ഭേദം ക്രൈസ്തവസഭ പിരിച്ചു വിടുകയാണല്ലോ, അല്ലേ”
അല്ല. കത്തോലിക്കാ സഭ ശാസ്ത്രത്തെ അംഗീകരിയ്ക്കുന്നു. ഡാര്‍വിന്റെ സിദ്ധാന്തം കത്തോലിക്കാ സഭ അംഗീകരിയ്ക്കുന്നുണ്ട്. രണ്ടാം വത്തിക്കാന്‍ കൌണ്‍സില്‍(1962–1965) മുതല്‍ എങ്കിലുമുള്ള(അതിനു മുന്‍പുള്ള കാര്യങ്ങള്‍ അറിയില്ല) കത്തോലിയ്ക്കാസഭയുടെ പ്രബോധനങ്ങള്‍ അങ്ങിനെയാണ്.(സണ്‍‌ഡേ സ്കൂളില്‍ ഡാര്‍വിന്റെ സിദ്ധാന്തം പഠനവിഷയമാവുന്നുണ്ട്.) പക്ഷേ എല്ലാ ക്രൈസ്തവസഭകളും അങ്ങിനെയാവണമെന്നില്ല.
അതേസമയം ഗര്‍ഭനിരോധനം, ഗര്‍ഭച്ഛിദ്രം, ക്ലോണിംഗ് തുടങ്ങിയ കാര്യങ്ങളിലെ സഭയുടെ നിലപാടുകള്‍ ശാസ്ത്രത്തോട് വൈമുഖ്യമുണ്ടായതുകൊണ്ടല്ല, അതില്‍ ധാര്‍മ്മിക പ്രശ്നങ്ങള്‍ ഉള്ളതുകൊണ്ടാണ്.
Umesh:ഉമേഷ് | 01-Apr-08 at 6:45 pm | Permalink
അപ്പുവും ജോ‍ജുവും പറഞ്ഞതു് അംഗീകരിക്കുന്നു. കത്തോലിക്കാസഭ ഡാര്വിനെ അംഗീകരിച്ചു എന്നതു് ഒരു പുതിയ അറിവായിരുന്നു. അതിന്റെ വെളിച്ചത്തില്‍ പോസ്റ്റ് മാറ്റിയെഴുതിയിട്ടുണ്ടു്. തെറ്റു പറ്റിയതില്‍ ഖേദിക്കുന്നു. അപ്പുവിനും ജോജുവിനും നന്ദി.
അപ്പുവിന്റെ കമന്റ് കെപ്ലര്‍ പറഞ്ഞ ഒരു വാക്യം ഓര്‍മ്മിപ്പിച്ചു. അതു് ഈ പോസ്റ്റില്‍ എഴുതാന്‍ വിചാരിച്ചതാണു്. മറന്നുപോയി. അതും ചേര്‍ത്തിട്ടുണ്ടു്.
സന്തോഷ് | 01-Apr-08 at 7:35 pm | Permalink
ക്ഷീരമുള്ളോരകിടിന്‍…
പക്ഷി അലച്ചു എന്ന പ്രയോഗം ആദ്യമായി കേള്‍ക്കുകയാണു്. 🙂
ഹരിയണ്ണന്‍ | 01-Apr-08 at 9:22 pm | Permalink
കലണ്ടറുകള്‍ പണ്ടേ കണ്യൂസിങ്ങാണ്.
നമുക്ക് ഓരോ സംസ്ഥാനത്തിനും ഒരു കലണ്ടര്‍വച്ചുണ്ടെന്നുതോന്നുന്നു!
എങ്ങനെയാണ് മലയാളം മാസങ്ങളില്‍ ചിലതിന് 32ഉം 28ഉമൊക്കെ ദിവസങ്ങളാകുന്നത്?ഇതിന്റെ മാനദണ്ഡമെന്താണ്?
ഒന്നു പറഞ്ഞുതരാമോ?
മുന്‍പ് ഏതെങ്കിലും പോസ്റ്റില്‍ ഈ വിഷയം പറഞ്ഞിരുന്നെങ്കില്‍ ഒന്നു ചൂണ്ടിക്കാണിച്ചാല്‍ ഞാന്‍ പോയി എടുത്തോളാം!
ഡാലി | 01-Apr-08 at 10:16 pm | Permalink
സാധാരണ ഈസ്റ്ററും ഇസ്രായേലിലെ പെസഹായും അടുത്തടുത്ത് വന്ന് ധാരാളം അവധി കിട്ടുന്നതാണ് ഈസ്റ്റര്‍ സമയത്ത്. ഇത്തവണ ഒരുമാസത്തോളം മാറി വന്നതെന്താണാവോ എന്ന് വിചാരിച്ചിരുന്നു. അപ്പോ ഇതാണല്ലേ കാര്യം.
സുല്‍ | 02-Apr-08 at 5:38 am | Permalink
“ക്രിസ്തുവിന്റെ 2008 ആമതു പിറന്നാള്‍ ഡിസംബര്‍ 25 ന് ആചരിക്കുന്നുവെന്നോ, ക്രിസ്തുവിന്റെ 2008 ആമതു മരണദിവസം 2008 മാര്‍ച്ച്ച് 21 ദുഃഖവെള്ളി ആയിരിക്കും“
അപ്പു ക്രിസ്തുമസ്സിനു മുമ്പ് ക്രിസ്തു മരിച്ചൊ????
-സുല്‍
P.C.Madhuraj | 02-Apr-08 at 3:22 pm | Permalink
ഹരിയണ്ണാ,
കെപ്ലറുടെ നിയമങ്ങളില്ലേ? ലോ ഓഫ്‌ കണ്‍സര്‍വേഷന്‍ ഓഫ്‌ ആങ്ഗുലര്‍ മൊമെന്റം അനുസരിക്കാന്‍ സൌരയൂഥത്തിലെ അങ്ഗങ്ങള്‍ ബാദ്ധ്യസ്ഥരാണെന്നും, ഒരു ഗ്രഹം ഇതു അനുസരിക്കാന്‍ വേണ്ടി തന്റെ കോണീയപ്രവേഗത്തില്‍ ചെറിയ മാറ്റങ്ങള്‍ വരുത്തുമെന്നും, ഇതിന്റെ ജ്യാമിതീയപരിണാമം എന്ന നിലക്കു,ഏെതുസമയത്തും, ചരിക്കുന്ന ചാപക്ഷേത്രം (ആര്‍ക്ക്‌ സെക്റ്റര്‍) തുല്യമാക്കാന്‍ വേണ്ടി സൂര്യനില്‍നിന്നു ദൂരം കൂടൂമ്പോള്‍ പതുക്കെ നീങ്ങുമെന്നും സൂര്യനോടടുക്കുമ്പോല്‍ വേഗം നീങ്ങുമെന്നുംകെപ്ലര്‍ പറഞ്ഞതു’കേട്ടറിഞ്ഞ/ കണ്ടറിഞ്ഞ’ മലയാളമാസക്കാരന്‍ അക്കാലത്തു (മേടത്തില്‍ വിഷു വന്നിരുന്ന കാലമായിരിക്കണം) ഭൂമി സൂര്യനോടു (അല്ലെങ്കില്‍ സൂര്യന്‍ ഭൂമിയോടു)അക്കാലത്തു ഏറ്റവും അടുത്തുവരുന്ന ധനുവിനു ദിവസം കുറച്ചു-ധനുവെന്ന മുപ്പതുഡിഗ്രി സൂര്യന്‍ വേഗം നടന്നു തീര്‍ത്തതായി അയാള്‍ മനസ്സിലാക്കിയിരിക്കണം.ഭൂമി-സൂര്യദൂരം അന്നു ഏറ്റവും കൂടുതലൂണ്ടായിരുന്ന മിഥുനത്തിനു 32 ദിവസവും കണ്ടിരിക്കും
സ്ഥിരരാശി സമ്പ്രദായവും ചരരാശി സമ്പ്രദായവും തമ്മിലുള്ള വ്യത്യാസം അറിഞ്ഞവര്‍, ചക്രവര്‍ത്തിമാരില്ലാതായപ്പോള്‍ പഞ്ചാങ്ഗപരിഷ്കരണത്തിനു തുനിയാതിരിക്കുകയും, ആ വ്യത്യാസം ശ്രദ്ധിക്കാത്തവര്‍ കലണ്ടര്‍ പരിഷ്കരണത്തിനു മുതിരുകയും ചെയ്തപ്പോള്‍ ഇന്നും ധനു/മകരങ്ങള്‍ക്കു ദിവസക്കുറവും, മിഥുനം/കര്‍ക്കിടകങ്ങള്‍ക്കു 32ദിവസവും പറയപ്പെടുന്നു. രാശികളെ ചരരാശികളായി കാണുന്നുവെങ്കില്‍ ഇതു ശരിതന്നെ.ജ്യൌതിഷികള്‍, (ജ്യോതിശ്ശാസ്ത്രസാഹിത്യ പരിഷത്തുകാരുടെ എതിരാളികള്‍) മാത്രമാണു,അവരിലും വളരെ കുറച്ചുപേര്‍ മാത്രമാണു, ചരരാശിചക്രം എന്ന മോഡല്‍ അറിഞ്ഞ്‌ ഉപയോഗിച്ചു കാണുന്നതു.
ഉമേഷിന്റെ അഭിപ്രായം ഇതല്ലെന്നു ഒരുവിധം തീര്‍ച്ചയുള്ളതുകൊണ്ടാണു ചാട്ക്കേറി ഈ കമന്റിട്ടത്‌.സ്ഥലവും സമയവും മുടക്കിയോ?
Jack Rabbit | 02-Apr-08 at 4:08 pm | Permalink
325: The Council of Nicea decided to separate the celebration of Easter from the Jewish Passover. They stated: “For it is unbecoming beyond measure that on this holiest of festivals we should follow the customs of the Jews. Henceforth let us have nothing in common with this odious people…We ought not, therefore, to have anything in common with the Jews…our worship follows a…more convenient course…we desire dearest brethren, to separate ourselves from the detestable company of the Jews…How, then, could we follow these Jews, who are almost certainly blinded.”
From: here
Umesh:ഉമേഷ് | 02-Apr-08 at 5:17 pm | Permalink
മധുരാജിന്റെ വാക്കുകളില്‍ അസ്ഥാനത്തായ ആശങ്കകളുടെ ഛായ കാണുന്നുണ്ടല്ലോ. ഞാന്‍ ഇതിനു വേറേ ഒരു വിശദീകരണമേ കൊടുക്കൂ എന്നു പ്രവചിക്കുന്നതിന്റെ അടിസ്ഥാനമെന്തു്?
ഹരിയണ്ണന്റെ ചോദ്യത്തിനു് ഉത്തരം:
ഗ്രിഗോറിയന്‍ കലണ്ടറിലെ (ആധുനികശകവര്‍ഷകലണ്ടറിലെയും) മാസങ്ങള്‍ക്കു് യാതൊരു ജ്യോതിശ്ശാസ്ത്രപ്രാധാന്യവുമില്ല. സൌകര്യത്തിനു വേണ്ടി ഓരോ മാസത്തിനും നിശ്ചിതതീയതികള്‍ നിശ്ചയിച്ചിരിക്കുന്നു.
വര്‍ഷം എന്ന ആശയം സൂര്യന്റെ സഞ്ചാരത്തെ ആശ്രയിച്ചിരിക്കുന്നതു പോലെ, മാസം എന്നതു് ചന്ദ്രന്റെ സഞ്ചാരത്തെ അടിസ്ഥാനമാക്കിയായിരുന്നു പണ്ടുള്ള മിക്കവാറും എല്ലാ കലണ്ടറുകളിലും. ഇന്നും ഇസ്ലാമിക്, ചൈനീസ്, യഹൂദകലണ്ടറുകളില്‍ മാസങ്ങള്‍ ചന്ദ്രസഞ്ചാരം അടിസ്ഥാനമാക്കിയുള്ളതാണു്.
ഭാരതത്തിലെ പഴയ ശകവര്‍ഷകലണ്ടറിലും ഇപ്പോഴും പ്രചാരത്തിലുള്ള ചൈനീസ് കലണ്ടറിലും വര്‍ഷം സൂര്യസഞ്ചാരത്തെയും മാസം ചന്ദ്രസഞ്ചാരത്തെയും ആശ്രയിച്ചായിരുന്നു. ഏകദേശം 29.5 ദിവസമാണു ചന്ദ്രമാസം. അങ്ങനെ വര്‍ഷത്തില്‍ ബാക്കിയാവുന്ന ദിവസങ്ങള്‍ക്കു വേണ്ടി അധിമാസങ്ങള്‍ ഏര്‍പ്പെടുത്തി. (ഇവിടെ ശകവര്‍ഷവും ചൈനീസും തമ്മില്‍ വ്യത്യാസമുണ്ടു്.)
ഇസ്ലാമിക് കലണ്ടറില്‍ ചന്ദ്രനെ മാത്രമാണു നോക്കുന്നതു്. 12 ചന്ദ്രമാസങ്ങള്‍ ചേരുന്നതു് ഒരു വര്‍ഷം. അതിനാല്‍ ആ കലണ്ടറിലെ വര്‍ഷം ബാക്കിയുള്ള കലണ്ടറുകളെ അപേക്ഷിച്ചു ചെറുതാണു്.
മലയാളികളുടെ കൊല്ലവര്‍ഷം “വ്യത്യസ്തനായൊരു ബാര്‍ബറാം കലണ്ടര്‍” ആണു്. പൂര്‍ണ്ണമായും സൂര്യസഞ്ചാരത്തെ അടിസ്ഥാനമാക്കിയുള്ളതാണു് അതു്. വര്‍ഷം സൂര്യനു ചുറ്റും ഭൂമി കറങ്ങുന്ന സമയം ആണു്. ഈ 360 ഡിഗ്രിയെ 12 കൊണ്ടു വിഭജിച്ചു് ഓരോ ഭാഗത്തും സൂര്യന്‍ സഞ്ചരിക്കുന്ന കാലയളവിനെ ഓരോ മാസം എന്നു വിളിച്ചു.
അതായതു്, മലയാളമാസങ്ങള്‍ സൂര്യന്റെ സ്ഥാനത്തെ കുറിക്കുന്നു. 0 മുതല്‍ 30 വരെയുള്ളതു മേടം, 30 മുതല്‍ 60 വരെ ഇടവം എന്നിങ്ങനെ.
ഭൂമി സൂര്യനു ചുറ്റും ഒരു പൂര്‍ണ്ണവൃത്തത്തിലാണു ചുറ്റുന്നതെങ്കില്‍ മാസങ്ങള്‍ക്കു തുല്യദൈര്‍ഘ്യമായിരിക്കും – ഏകദേശം 365.25 / 12 = 30.4 ദിവസം. അപ്പോള്‍ മാസങ്ങള്‍ 30, 31 എന്നിവയിലൊരു എണ്ണം ദിവസമായിരിക്കും. (എപ്പോഴാണു സൂര്യന്‍ അതിര്‍ത്തി കടക്കുന്നതു് എന്നതിനെ ആശ്രയിച്ചാണു് എന്നാണു് ഒന്നാം തീയതി എന്നു തീരുമാനിക്കുന്നതു്.)
ഇവിടെയാണു മധുരാജ് പറഞ്ഞ കെപ്ലര്‍ നിയമത്തിന്റെ പ്രസക്തി. ഒരു നിശ്ചിതസമയത്തു് ഭൂമി സൂര്യനു ചുറ്റും കറങ്ങുമ്പോള്‍ കടന്നു പോകുന്ന ആംഗുലര്‍ ഏറിയ തുല്യമായിരിക്കും എന്നതാണു് ആ നിയമം. ആംഗുലര്‍ ഏറിയ സൂര്യനും ഭൂമിയും തമ്മിലുള്ള ദൂരത്തിന്റെയും കടന്നു പോകുന്ന ആംഗിളിന്റെയും ഗുണനഫലമാണു്. അതായതു്, ഭൂമി സൂര്യനോടു കൂടുതല്‍ അകന്നിരിക്കുന്ന സന്ദര്‍ഭങ്ങളില്‍ 30 ഡിഗ്രി കടക്കാന്‍ കൂടുതല്‍ സമയം എടുക്കും, അടുത്തിരിക്കുന്ന സമയത്തു കുറവും.
അതുകൊണ്ടാണു് ചില മാസങ്ങളില്‍ 28 ദിവസവും ചിലമാസങ്ങളില്‍ 32 ദിവസവും ഉണ്ടാകുന്നതു്.
ഇനി മധുരാജിനോടു്:
മലയാളം കലണ്ടര്‍ ഉണ്ടാക്കിയവര്‍ കെപ്ലര്‍ നിയമം ആ രീതിയില്‍ അറിവില്ലെങ്കില്‍കൂടി നക്ഷത്രങ്ങളെ അപേക്ഷിച്ചു സൂര്യന്റെ സഞ്ചാരം തുല്യവേഗതയിലല്ലെന്നു കണ്ടുപിടിച്ചിരുന്നു. അതനുസരിച്ചു വളരെ കൃത്യമായിത്തന്നെ കലണ്ടര്‍ രൂപകല്പന ചെയ്യുകയും ചെയ്തിരുന്നു.
മലയാളം കലണ്ടറില്‍ കാലാനുസൃതമായ മാറ്റങ്ങള്‍ വരുത്തിയിട്ടില്ല എന്നു മധുരാജ് പറയുന്നതു ശരിയല്ല. ഗ്രഹങ്ങളുടെ സ്ഥാനം കാണാന്‍ ഏറ്റവും ആധുനികരീതികള്‍ തന്നെയാണു നമ്മുടെ കലണ്ടറുകള്‍ പിന്തുടരുന്നതു്. എന്റെ കലണ്ടറുകള്‍ ഞാന്‍ ആധുനികരീതികള്‍ ഉപയോഗിച്ചാണു കണക്കുകൂട്ടുന്നതു്. അതു് അച്ചടിച്ച ഇന്നത്തെ കലണ്ടറുകളുമായി ഒത്തുപോകുന്നുണ്ടു്. അതിനു പകരം സൂര്യസിദ്ധാന്തമോ ആര്യഭടീയമോ ഉപയോഗിച്ചു കണക്കുകൂട്ടിയാല്‍ വ്യത്യാസമുണ്ടാവും. കാലാനുസൃതമായി കണക്കുകള്‍ പരിഷ്കരിക്കണം എന്നു് ആ പുസ്തകങ്ങളില്‍ത്തന്നെ പറഞ്ഞിട്ടുമുണ്ടു്.
ഇന്നത്തെ മലയാളം കലണ്ടറുകള്‍ സൂര്യഗതി കണക്കാക്കുന്നതും മാസങ്ങളുടെ ദൈര്‍ഘ്യം കണക്കാക്കുന്നതും ശരി തന്നെയാണു്. ഭാരതീയര്‍ റെഫറന്‍സ് പോയിന്റായി കണക്കാക്കുന്നതു് നക്ഷത്രങ്ങളെയും (ഉദാ: ചിത്തിരനക്ഷത്രം 180 ഡിഗ്രി) പാശ്ചാത്യര്‍ സൂര്യസഞ്ചാരത്തെയും ആണു്. ഇതില്‍ ഒന്നു ശരിയും മറ്റൊന്നു തെറ്റുമാണന്നും പറയാന്‍ പറ്റില്ല. രണ്ടും സ്ഥിരമല്ല എന്നതു തന്നെയാണു കാരണം.
സൂര്യന്‍ ഭൂമദ്ധ്യരേഖയ്ക്കു മുകളില്‍ വരുമ്പോള്‍ 0 ഡിഗ്രി എന്നു കണക്കാക്കുന്നതു കൊണ്ടു പാശ്ചാത്യര്‍ക്കു് ഒരു ഗുണമുണ്ടു്. നിശ്ചിതതീയതികളിലെ പകലിന്റെ ദൈര്‍ഘ്യം നിശ്ചിതമായിരിക്കും. ഉദാഹരണമായി മാര്‍ച്ച് 21-നും സെപ്റ്റംബര്‍ 23-നും പകലും രാത്രിയും തുല്യമായിരിക്കും. നക്ഷത്രങ്ങളെ അവലംബിക്കുന്നതുകൊണ്ടു് ഭാരതീയര്‍ക്കു് അതു സാദ്ധ്യമല്ല. അതിനു പകരം ഒരു പ്രത്യേകതീയതിയില്‍ (മലയാളം) നക്ഷത്രങ്ങളെ അപേക്ഷിച്ചു സൂര്യന്റെ സ്ഥാനം നിശ്ചിതമായിരിക്കും. ഉദാഹരണമായി മേടം 1-നു് സൂര്യന്‍ രേവതിനക്ഷത്രത്തിന്റെയും അശ്വതിനക്ഷത്രത്തിന്റെയും ഇടയിലായിരിക്കും.
എന്നാല്‍ മേടം 1-നു പകലും രാത്രിയും തുല്യമായിരിക്കും എന്നു് ശഠിക്കുന്ന ആളുകള്‍ ഉണ്ടു്. കുറേ നൂറ്റാണ്ടുകള്‍ക്കു മുമ്പു് അതു ശരിയാണു്. ഇപ്പോള്‍ അല്ല. അതു മാത്രമാണു ഞാന്‍ ഈ പോസ്റ്റില്‍ പറഞ്ഞതു്. ശാഠ്യത്തിനു മുമ്പു് അതൊന്നു ശരിയാണോ എന്നു പരീക്ഷിച്ചു നോക്കണം എന്നേ പറഞ്ഞുള്ളൂ. പഴമക്കാര്‍ പറയുന്നതു് അപ്പാടെ വിശ്വസിക്കരുതു് എന്നു്. ആണുങ്ങള്‍ക്കു പെണ്ണുങ്ങളെക്കാള്‍ കൂടുതല്‍ പല്ലുകളുണ്ടെന്നു് അരിസ്റ്റോട്ടില്‍ പറഞ്ഞതു നൂറ്റാണ്ടുകളോളം വിശ്വസിച്ചവരാണു പാശ്ചാത്യര്‍. ഒരുത്തന്‍ പോലും ഒരു ആണിന്റെയും പെണ്ണിന്റെയും വായ് തുറന്നു പല്ലുകള്‍ എണ്ണിനോക്കാന്‍ ശ്രമിച്ചില്ല.
വളരെ നല്ല ഒരു കലണ്ടര്‍ ആണു് മലയാളം കൊല്ലവര്‍ഷക്കലണ്ടര്‍. അതു കൊണ്ടാണു് ഞാന്‍ അതിനെപ്പറ്റി കൂടുതല്‍ പഠിക്കുന്നതും. എന്നെ വെറുതേ ഭാരതീയശാസ്ത്രത്തെ അന്ധമായി തമസ്കരിക്കുന്നവന്‍ എന്നു മുദ്ര കുത്തല്ലേ.
roby.kurian | 03-Apr-08 at 10:46 pm | Permalink
പോസ്റ്റ് വായിക്കാന്‍ ഒരു മണിക്കൂറെടുത്തു ഇതെഴുതാന്‍ എത്ര സമയമെടുത്തു..
സമ്മതിച്ചേ…:)
ഒരു സംശയം.
കറുത്ത വാവും വെളുത്ത വാവുമാണോ
അതോ
കറുത്തവാവും വെളുത്തവാവുമാണോ..?
അതോ രണ്ടും ശരിയോ?
കറുത്ത വാവു് എന്നു വേര്‍തിരിച്ചെഴുതുന്നതു തന്നെ ശരി. പക്ഷേ മലയാളികള്‍ സ്പേസിടാന്‍ അത്ര നിര്‍ബന്ധം കാണിക്കാറില്ല. രണ്ടു വാക്കു ചേര്‍ന്നുണ്ടാകുന്ന പ്രയോഗങ്ങളെ ഒറ്റ വാക്കാക്കി(ഒറ്റവാക്കാക്കി)ക്കളയും 🙂
ജ്യോതിര്‍മയി | 04-Apr-08 at 4:53 pm | Permalink
ഒറ്റ വാക്കും കളയരുതു് 🙂
(ഇല്ല, കളയുന്നില്ല, മനസ്സിലായ ഒറ്റ വാക്കുവെച്ചു സംശയം ചോദിയ്ക്കാം)
“പൂര്‍ണ്ണമായും ശരിയല്ല” എന്നു പ്രസ്താവിക്കുമ്പോള്‍ ആ, ‘അല്ല’എന്നതുണ്ടല്ലോ, അത് എവിടേയ്ക്കാണു ചേരുന്നത്? പൂര്‍ണ്ണമല്ല- ഭാഗികമാണ് എന്ന നിലയ്ക്കോ അതോ ‘ശരി’ എന്നതിലേയ്ക്കോ- ശരി അല്ല- ശരിയല്ല, എന്നുവെച്ചാല്‍ തെറ്റാണു് എന്ന്. പൂര്‍ണ്ണമായും തെറ്റാണു് എന്നുമാകാം ആ പ്രസ്താവനയുടെ അര്‍ത്ഥം അല്ലേ?
പക്ഷേ അതല്ല ഇവിടെ ഉദ്ദേശിച്ചതെന്നു തോന്നുന്നു.
ഉദ്ദിഷ്ടപ്രസ്താവന പൂര്‍ണ്ണമായും അല്ല, ഭാഗികമായി മാത്രം ശരിയാണു്- എന്നാണെന്നു തോന്നുന്നു. ‘
പൂര്‍ണ്ണമായും ശരിയല്ല എന്നതിനുപകരം ‘പൂര്‍ണ്ണമായുംശരി’ അല്ല എന്നെഴുതിയാല്‍ ഭേദപ്പെടുമോ?
ജ്യോതിയുടെ ചോദ്യം ആദ്യം ഞാന്‍ തെറ്റായി ആണു മനസ്സിലാക്കിയതു്. അപൂര്‍ണ്ണമായ ശരി എന്ന ഒന്നുണ്ടോ എന്ന ഫിലസോഫിക്കല്‍ ചോദ്യമാണെന്നു കരുതി. പിന്നെയാണു മനസ്സിലായതു് ഇതൊരു ഭാഷാ-വ്യാകരണ-ചോദ്യമാണെന്നു്.
ജ്യോതി പറഞ്ഞതു ശരിയാണു്. അതിനു രണ്ടു വിധത്തില്‍ അര്‍ത്ഥം തോന്നാം:
(പൂര്‍ണ്ണമായും ശരി)(അല്ല) = (ഭാഗികമായ ശരി) ആണു്.
(പൂര്‍ണ്ണമായും) (ശരി അല്ല) = ഇതു ശരിയല്ല. ആ കാര്യം പൂര്‍ണ്ണമാണു്.
ഘടനയനുസരിച്ചു് രണ്ടാമത്തേതാണു വരേണ്ടതു്. കാരണം, “പൂര്‍ണ്ണമായും” എന്നതു നാമവിശേഷണമല്ല, ക്രിയാവിശേഷണമാണു്. അതു് “അല്ല” എന്നതിന്റെ വിശേഷണമാണു്. എങ്കിലും ഈ വാക്യത്തിനു് ആദ്യത്തെ അര്‍ത്ഥമാണു സാധാരണയായി തോന്നുക.
ഈ ദുര്‍ഗ്രഹത ഒഴിവാക്കാന്‍ എന്താണു ചെയ്യുക? ഒരു പക്ഷേ “പൂര്‍ണ്ണമായ ശരിയല്ല” എന്നു മതിയാവും. അപ്പോള്‍ പൂര്‍ണ്ണമായ എന്നതു നാമവിശേഷണമാണെന്നു വ്യക്തമാകും.
Jayarajan | 06-Apr-08 at 7:20 pm | Permalink
ഹോ! ഈ ജ്യോതിയേച്ചിയെ സമ്മതിച്ചു തന്നിരിക്കുന്നു; ഇത്രയും കാലമായിട്ടും എനിക്കിങ്ങനെയൊരു സംശയം തോന്നിയില്ലല്ലൊ 🙁
ഉമേഷ്ജിക്ക്‌ തോന്നുന്നുണ്ടാവും, ഞാന്‍ 2 വര്‍ഷമെടുത്ത്‌ എഴുതിയ പോസ്റ്റിനെപ്പറ്റി ഒന്നും പരാമര്‍ശിക്കാതെ അതില്‍ വന്ന ഒരു കമന്റിനെക്കുറിച്ച്‌ മാത്രം എഴുതുന്ന ഇവന്‍ എവിടത്തുകാരനാണെടാ എന്ന്…. തെറ്റ്‌ ഉമേഷ്ജീയുടേത്‌ തന്നെയാ, അവസാനം കൊടുത്ത ലിങ്കില്‍ ക്ലിക്കി ഞാന്‍ ‘നെല്ലിക്ക’യിലെത്തി. ഒരിക്കല്‍ വായിച്ചതായിരുന്നു, എങ്കിലും ഒരിക്കല്‍ കൂടി കമന്റ്സ്‌ എല്ലാം വായിച്ചു. അവസാനത്തെ കമന്റില്‍ നിന്നും കൈപ്പള്ളിയുടെ ബ്ലോഗിലെത്തി; അവിടെ നിന്നും ‘ബൂലോഗ ക്ലബ്ബി’ലും ‘ശേഷം ചിന്ത്യ’ത്തിലും എത്തി. എല്ലാം (കമന്റടക്കം) വായിച്ചു തിരിച്ചു ഇവിടെ വന്നപ്പോഴേക്കും ഇവിടെ വായിച്ചതൊക്കെ മറന്നും പോയി 🙁
എന്തോ ചില സംശയങ്ങളുണ്ടായിരുന്നു. ഇനി അടുത്ത പോസ്റ്റ് വായിക്കട്ടെ, ആ സംശയങ്ങള്‍ വീണ്ടും വന്നാല്‍ അവിടെ ചോദിക്കാം 🙂
thaaraapadham | 15-Apr-08 at 4:17 pm | Permalink
ഉയിര്‍ത്തെഴുന്നേല്‍പ്പിലെ കുരിശുകളും, ഈസ്റ്റര്‍ കണ്ടുപിടിക്കാനുള്ള എളുപ്പവഴിയും വായിച്ചു. ബ്ലോഗില്‍ ഇങ്ങിനെയൊരു പോസ്റ്റിടാന്‍ കാണിച്ച സഹനശക്തിയുടെ മുന്നില്‍ നമിക്കുന്നു.
പ്രസരണം നിമിത്തം വിഷുവങ്ങള്‍ മാറിക്കൊണ്ടിരിക്കും എന്ന് ഷിജു അലക്സിന്റെ പോസ്റ്റില്‍ നിന്ന് വായിച്ചിരുന്നു. 71 വര്‍ഷം കൊണ്ട്‌ 1 ഡിഗ്രി മാറുന്നുണ്ടെന്നും പറയുന്നു. അതിനനുസരിച്ച്‌ നമ്മള്‍ വിഷുദിനം മാറ്റേണ്ടതുണ്ടോ ? അതോ കാര്‍ഷികവൃത്തിയുമായി ബന്ധപ്പെട്ട്‌ മേടം 1നു തന്നെ ആഘോഷിക്കുന്നത്‌ തുടരുന്നതാണോ ശരി. വിഷുവം എന്ന ദിവസം ജ്യോതിഷഫലപ്രവചനത്തില്‍ പ്രത്യേകിച്ച്‌ സ്വാധീനമൊന്നും ചെലുത്താത്തതുകൊണ്ടാവാം ആ മാറ്റത്തിന്‌ പ്രാധാന്യം കൊടുക്കാതെ പോയത്‌ എന്ന് എനിക്കു തോന്നുന്നു. (തോന്നല്‍ മാത്രമാണ്‌, ശരിയാണോ എന്നറിയില്ല.)
വിഷുവം ജ്യോതിഷത്തില്‍ ഒരു സ്വാധീനവും ചെലുത്തുന്നില്ല എന്നതു ശരിയാണോ? മേടവിഷുവത്തെ രാശിചക്രത്തിന്റെ ആദിയായി കരുതുന്നതു കൊണ്ടു എല്ലാ ഗ്രഹസ്ഫുടങ്ങളും ഗ്രഹങ്ങള്‍ ഏതു രാശിയിലാണെന്നതും അതിനെ ആശ്രയിച്ചല്ലേ? ഒരു സ്ഥിരബിന്ദുവിനെ ആശ്രയിച്ചു വേണം ജ്യോതിഷഗണനം നടത്താന്‍ എന്നാണു വെയ്പ്. പക്ഷേ, എല്ലാം ചലിച്ചു കൊണ്ടിരിക്കുന്ന പ്രപഞ്ചത്തില്‍ ഒരു സ്ഥിരബിന്ദു കണ്ടുപിടിക്കാന്‍ സാദ്ധ്യമല്ല. പാശ്ചാത്യര്‍ സ്ഥിരബിന്ദുവിനു പോകാതെ First point of Aries എന്ന ചരബിന്ദുവിനെ ആധാരമാക്കി. ഭാരതീയര്‍ സ്ഥിരമെന്നു കരുതി നക്ഷത്രങ്ങളെ ആധാരമാക്കി. ഏതു നക്ഷത്രമെന്നതനുസരിച്ചു് ഭാരതീയര്‍ക്കു പല രീതികളുണ്ടു്. ചിത്തിര നക്ഷത്രത്തെ 180 ഡിഗ്രിയായി കണക്കാക്കിയ ലാഹിരിയുടെ പദ്ധതിയാണു കലണ്ടറുകളിലും മറ്റും-അതു് ഇന്ത്യാഗവണ്മെന്റ് അംഗീകരിച്ചതു കൊണ്ടു്. അതില്‍ നിന്നു വ്യത്യസ്തമായ പല പദ്ധതികളുമുണ്ടു്-കൃഷ്ണമൂര്‍ത്തി, ബി. വി. രാമന്‍, ഉഷാശശി തുടങ്ങി. ഇതില്‍ ഏതാണു ജ്യൌതിഷികള്‍ സ്വീകരിക്കേണ്ടതു് എന്നു പറയാന്‍ ഞാന്‍ ആളല്ല.
കാര്‍ഷികാ‍വശ്യങ്ങള്‍ക്കു പാശ്ചാത്യപദ്ധതിയാണു നോക്കേണ്ടതു് എന്നാണു് എന്റെ അഭിപ്രായം. കാരണം, സൂര്യഗതി അനുസരിച്ചു വേണം കൃഷി നടത്താന്‍.
Manu | 16-Apr-08 at 4:16 pm | Permalink
Gnostic Gospels പഠിച്ചു മനസ്സിലാക്കിയാല്‍ പോരെ ഗുരോ? പ്രശ്നം ഗുരുതരം, പക്ഷെ കാര്യം വളരെ നിസ്സാരം, അല്ലെ?
Azer | 19-Sep-14 at 11:42 am | Permalink
That’s a smart way of thiiknng about it.
Mathew | 02-Jan-16 at 7:16 pm | Permalink
Umesh, good article with quiet a bit supporting data.
I read that there’s a proposal to remove the dependency of Easter on the full moon since some researchers were able to get a break through on why Easter was tied to the full moon that comes right after March 21.