ഏതോ ഒരു സംസ്കൃതകവി എഴുതിയ ഒരു പഴയ ശ്ലോകം:
ശ്ലോകം:
ഘടം ഭിത്വാ പടം ഛിത്വാ
മാതരം പ്രഹരന്നപി
യേന കേന പ്രകാരേണ
പ്രസിദ്ധഃ പുരുഷോ ഭവേത്
അര്‍ത്ഥം:
| ഘടം ഭിത്വാ | : | കുടം പൊട്ടിച്ചോ |
| പടം ഛിത്വാ | : | വസ്ത്രം കീറിയോ |
| മാതരം പ്രഹരൻ അപി | : | അമ്മയെ തല്ലുക വരെ ചെയ്തോ |
| യേന കേന പ്രകാരേണ | : | എന്തെങ്കിലുമൊക്കെ വിധത്തിൽ |
| പ്രസിദ്ധഃ പുരുഷഃ ഭവേത് | : | പ്രസിദ്ധൻ ആകണം |
| : | (എന്നാണു ചിലരുടെ ആഗ്രഹം.) |
മറ്റുള്ളവരിൽ നിന്നു വ്യത്യസ്തമായി എന്തെങ്കിലും ചെയ്യുന്നവരാണു സാധാരണയായി പ്രസിദ്ധരാകുന്നതു്. നല്ല ആളുകൾ അവരുടെ നല്ല പ്രവൃത്തികൾ കൊണ്ടു പ്രസിദ്ധരാകും. ചീത്ത പ്രവൃത്തികൾ കൊണ്ടും പ്രസിദ്ധി കിട്ടും. പ്രസിദ്ധിയ്ക്കു വേണ്ടി എന്തും ചെയ്യാൻ മടിയില്ലാത്തവരെ പരിഹസിക്കുകയാണു് ഈ ശ്ലോകത്തിൽ. പ്രസിദ്ധരാകാൻ വേണ്ടി അവർ സാധാരണ ആളുകൾ ചെയ്യാത്ത ചീത്ത പ്രവൃത്തികൾ പോലും ചെയ്യും എന്നർത്ഥം.
ചെക്കോവിന്റെ ഒരു കഥയുണ്ടു്. പ്രസിദ്ധി ആഗ്രഹിച്ച ഒരു പയ്യന്റെ കഥ. അതിനു വേണ്ടി അവൻ ഒരു മണ്ടത്തരം പിടിച്ച അപകടത്തിൽ ചാടുന്നു. എല്ലാവരും അതിനെപ്പറ്റി അറിഞ്ഞതിൽ ആഹ്ലാദിക്കുകയാണു് അവൻ. പിറ്റേന്നത്തെ പത്രത്തിൽ അവന്റെ മണ്ടത്തരത്തിന്റെ വാർത്ത വന്നപ്പോൾ അതു് അവൻ എല്ലാവരെയും കാണിക്കുകയാണു്. മനുഷ്യമനസ്സിന്റെ പ്രത്യേകതകളെയും വൈകൃതങ്ങളെയും കഥകൾക്കു വിഷയമാക്കിയ ആ മഹാകഥാകാരൻ ഈ ശ്ലോകം കണ്ടിട്ടില്ലെങ്കിലും ഇത്തരം മനുഷ്യരെ നന്നായി പരിചയപ്പെട്ടിട്ടുണ്ടു്. ഇത്തരം ശ്ലോകങ്ങളും ചെക്കോവിന്റെ കഥകളും പ്രസിദ്ധമാകുന്നതും മറ്റിടങ്ങളിൽ കാണാത്ത ഈ സാർവ്വജനീനത കൊണ്ടാണു്.
രാഷ്ട്രീയത്തിലും സിനിമാരംഗത്തും മറ്റും ഇതുപോലെയുള്ള പല കഥാപാത്രങ്ങളെ ധാരാളമായി കാണാം. പോപ്പുലാരിറ്റി നേടാൻ എന്തു കോപ്രായവും ചെയ്യാൻ മടിക്കാത്തവർ. അമ്മയെത്തല്ലിയാണെങ്കിലും ആളാവാൻ ശ്രമിക്കുന്നവർ.
ബ്ലോഗുലകത്തിലും ഇത്തരം ആളുകൾ കുറവല്ല. ഒന്നും എഴുതാനില്ലെങ്കിലും എന്തെങ്കിലും കുത്തിത്തിരിപ്പുണ്ടാക്കി ആളാവുന്നവർ. പോപ്പുലാരിറ്റി കുറഞ്ഞെന്നു തോന്നിയാൽ അർത്ഥശൂന്യമായ എന്തെങ്കിലും പോസ്റ്റിടുന്നവർ. മറ്റുള്ളവരെ ചൊറിഞ്ഞു ബഹളമുണ്ടാക്കുന്നവർ.
ഇവർ നേടുന്നതു് പ്രസിദ്ധിയല്ല, അപഹാസ്യതയാണെന്നു് ഇവർ എന്നെങ്കിലും മനസ്സിലാക്കുമോ?
krish | കൃഷ് | 23-Aug-08 at 10:58 am | Permalink
ഹാഹാ.. അതുകൊള്ളാം. അതല്ലേ ഇവിടെ ബൂലോകത്തും നിത്യേനെ സംഭവിച്ചുകൊണ്ടിരിക്കുന്നതും.
തെറി വിളിക്കുക, ജാതി മത ആക്ഷേപം നടത്തുക, വിമര്‍ശിക്കാന്‍ വേണ്ടി മാത്രം വിമര്‍ശിക്കുക, ഇതൊക്കെയല്ലേ പോപ്പുലാരിറ്റി കൂട്ടാന്‍ കാണിക്കുന്ന തന്ത്രങ്ങള്‍. പിന്നെ, കുറെ കോപ്രായങ്ങളും.
(അയ്യോ, മറന്നു, ഈയുള്ളോനു് വല്യ പോപ്പുലാരിറ്റിയൊന്നുമില്ലേ. വല്ലപ്പോഴും സമയം കിട്ടുമ്പോള്‍ പോസ്റ്റിടും. അതിലെ അര്‍ത്ഥവും അര്‍ത്ഥശൂന്യതയൊന്നും കൂടുതല്‍ നോക്കാറില്ലേ. അര്‍ത്ഥം നോക്കാന്‍ ഭാഷാ നിഘണ്ടു കൈയ്യിലില്ല്ലാത്തതുകൊണ്ടാണേ!!!!
ഇനി പോസ്റ്റിടാണ്ട് നോക്ക്യാമതിയോ. 🙂 )
അനില്‍@ബ്ലൊഗ് | 23-Aug-08 at 3:42 pm | Permalink
🙂
Salu Thomas John | 23-Aug-08 at 5:24 pm | Permalink
കൊള്ളാം! ആരെയാണു ലക്ഷ്യമാക്കുന്നതു?
t.k. | 23-Aug-08 at 9:08 pm | Permalink
ഇത് പ്രശസ്തി കുറഞ്ഞപ്പോള്‍ ഇട്ട പോസ്റ്റ് അല്ലല്ലോ? 🙂
അദ്ദാണു്! തൊമ്മനു മാത്രമേ കാര്യം മനസ്സിലായുള്ളൂ 🙂
suraj rajan | 23-Aug-08 at 11:08 pm | Permalink
ഒരു കുടം കിട്ടുമോ ? [:P]
കുടമില്ല സൂരജേ. തത്ക്കാലം ഉടുതുണി കൊണ്ടു് അഡ്ജസ്റ്റു ചെയ്യ് 🙂
jayarajan | 24-Aug-08 at 5:36 am | Permalink
ഉമേഷ്ജീ, ഉദ്ദണ്ഡ ലേഖനത്തിലെപ്പോലെ ലിങ്കുകള്‍ കൊടുത്തിരുന്നുവെങ്കില്‍ ഉപകാരമായേനെ 🙂 (മനസ്സിലായി: “ഞാന്‍ പൊതുവേ പറഞ്ഞതാണ്‍്‌,ആരെയും ഉദ്ദേശിച്ചല്ല” എന്നല്ലേ; അതിനാണ്‌ ഇസ്മൈലി:))
ഞാന്‍ പൊതുവേ പറഞ്ഞതാണു ജയരാജാ, ആരെയും ഉദ്ദേശിച്ചതല്ല 🙂
വെമ്പള്ളി | 25-Aug-08 at 9:14 am | Permalink
ആ‍ഹാ ഇവിടെ വന്ന് മൂന്നു നാലു പോസ്റ്റും തട്ടിയോ? ഞാന്‍ ബാംഗ്ലൂര്‍ക്കുള്ള ട്രെയിനിലിരുന്ന് എന്തൊ ഒരു സ്വപ്നം കണ്ടിരുന്നു. പിന്നിപ്പോഴാണ് ഇവിടെ വന്നു നോക്കിയത്. – അന്വേഷണങ്ങള്‍
ശേഷു,,, | 28-Mar-10 at 7:59 pm | Permalink
ഹായ് ഉമേഷ്ജി
നല്ല ശ്ലോകം…
പ്രസിദ്ധഃ പുരുഷഃ ഭവേത് എന്നത് പ്രസിദ്ധൻ ആകാം എന്നല്ലേ…
പ്രസിദ്ധൻ ആകണം എന്നല്ലല്ലോ….
ചിലപ്പോൾ എനിയ്ക്ക് തെറ്റിയതായിരിയ്ക്കും…….. 🙂
ബിജുകുമാര്‍ | 30-Mar-10 at 2:03 pm | Permalink
ഉമേഷ്ജിയുടെ പുതിയ പോസ്റ്റ് നന്നായിരിയ്ക്കുന്നു. ഇയ്യിടെയൊന്നും ഇത്രയും നല്ലൊരു സുഭാഷിതം കേള്‍ക്കുവാനോ വായിയ്ക്കുവാനോ സാധിച്ചിട്ടില്ല.
നമ്മുടെ സായിബാബയ്ക്കൊരു കഴിവുണ്ടല്ലോ ശൂന്യതയില്‍ നിന്നും ഭസ്മം എടുക്കുന്നത്. അതുപോലെ ഉമേഷ്ജി ശൂന്യതയില്‍നിന്നും പോസ്യുണ്ടാക്കുന്നത് കണ്ടോ? അതാണ് ടാലന്റ് എന്നു പറയുന്നത്.
ആശംസകള്‍!
ശങ്കരന്‍ | 05-Apr-10 at 6:51 am | Permalink
ഉമേശ്ജി,
ഇതേ സുഭാഷിതത്തിന്റെ ഒരു പാഠഭേദം ഞാന്‍ വായിച്ചതായി ഓര്‍ക്കുന്നു.
ഘടം ഭിന്ദ്യാത് പടം ഛിന്ദ്യാത്
കുര്യാത് രാസഭരോഹണം
യേന കേന പ്രകാരേണ
പ്രസിദ്ധഃ പുരുഷോ ഭവേത്
ആദ്യവരിയില്‍ ചെറിയ വ്യത്യാസം മാത്രമേയുള്ളൂ. രണ്ടാം വരിയില്‍ “കഴുതപ്പുറത്ത് കയറിയിട്ടായലും മതി” എന്നൊരു വ്യത്യാസവുമുണ്ട്.