ശ്രീ എം. കെ. ഹരികുമാര്‍ ബ്ലോഗു തുടങ്ങുകയും മറ്റു പല ബ്ലോഗുകളിലും പോയി “ഞാന്‍ നിങ്ങളുടെ ബ്ലോഗ് വായിക്കാം. നിങ്ങള്‍ എന്റേതും വായിക്കൂ…” എന്നു കമന്റിടുകയും ചെയ്തപ്പോഴേ അദ്ദേഹത്തിന്റെ ബ്ലോഗ് ശ്രദ്ധിക്കാന്‍ തുടങ്ങിയതാണു ഞാന്‍. പക്ഷേ അദ്ദേഹത്തിന്റെ ബ്ലോഗില്‍ ശ്രദ്ധിക്കേണ്ടതായി ഒന്നും കണ്ടില്ല. ഈ എഴുത്തുകാരന്‍ കലാകൌമുദിയില്‍ പ്രൊഫ. എം. കൃഷ്ണന്‍ നായരുടെ സാഹിത്യവാരഫലത്തിന്റെ തുടര്‍ച്ചയായി ഒരു കോളം എഴുതുന്നുണ്ടെന്നറിഞ്ഞപ്പോള്‍ അദ്ഭുതം തോന്നി. കലാകൌമുദിയില്‍ എഴുതുന്ന ഒരു നിരൂപകനില്‍ നിന്നു പ്രതീക്ഷിക്കാത്ത അക്ഷരത്തെറ്റുകളും പ്രയോഗവൈകല്യങ്ങളും കണ്ടതും പോസ്റ്റുകള്‍ക്കു വിചാരിച്ചതു പോലെ നിലവാ‍രം കാണാതെ വരികയും ചെയ്തതാണു കാരണം. അവഗണിക്കുന്ന അനേകം ബ്ലോഗുകളില്‍ ഒന്നായി അതു മാറി. എങ്കിലും സബ്സ്ക്രൈബ് ചെയ്തിരുന്ന ഒരു ബ്ലോഗായിരുന്നതു കൊണ്ടു് അതില്‍ പുതിയ പോസ്റ്റുകള്‍ വരുമ്പോള്‍ ഞാന്‍ അറിയുമായിരുന്നു. പലപ്പോഴും ഒന്നു് ഓടിച്ചു വായിച്ചു നോക്കുമാ‍യിരുന്നു-എന്തെങ്കിലും നല്ലതു തടഞ്ഞാലോ എന്നു കരുതി.
“കേരളം-50 ഭാവങ്ങള്‍” എന്ന പംക്തി കണ്ടപ്പോള്‍ ചിരിയാണു വന്നതു്. പ്രിന്റ് മീഡിയയില്‍ ഇങ്ങനെ പല ഫീച്ചറുകളും കണ്ടിട്ടുണ്ടു്. ഏതാനും ലക്കങ്ങളിലെ പ്രതിഫലം ഉറപ്പാക്കാന്‍ അമ്പതു ലക്കങ്ങളിലേക്കു് ഒരു പംക്തി തുടങ്ങുന്നതു കണ്ടിട്ടുണ്ടു്. അന്നൊക്കെ വിചാരിച്ചിരുന്നതു് അതെഴുതുന്നവര്‍ നേരത്തേ എഴുതിത്തയ്യാറാക്കിയതു് സ്ഥലപരിമിതി മൂലം പല ലക്കങ്ങളിലായി പ്രസിദ്ധീകരിക്കുന്നു എന്നാണു്. അല്ലെങ്കില്‍ കൃത്യം 50 ഭാവങ്ങള്‍ എന്നെങ്ങനെ അറിയും? ഓരോന്നായി എഴുതുന്ന പോസ്റ്റുകളുടെ മൊത്തം എണ്ണം ആദ്യമേ ഉറപ്പിച്ചതു കണ്ടപ്പോള്‍ ഇദ്ദേഹം പ്രിന്റ് മീഡിയയുടെ ഗിമ്മിക്കുകളില്‍ നിന്നു പുറത്തു വന്നില്ലല്ലോ എന്നോര്‍ത്തായിരുന്നു ചിരിച്ചതു്. ഈ അമ്പതു ഭാ‍വങ്ങളാകട്ടേ, പ്രത്യേകിച്ചു് ഒരു ചമത്കാരവുമില്ലാത്ത കുറേ വിശേഷങ്ങള്‍ മാത്രം.
ദോഷം പറയരുതല്ലോ, ഹരികുമാര്‍ ബ്ലോഗില്‍ എഴുതിയതില്‍ ഏറ്റവും പാരായണയോഗ്യം ഈ ഭാവങ്ങള്‍ തന്നെ. തീയതി വെച്ചു് ദിവസേന ഒന്നെന്ന കണക്കിനു പടച്ചു വിട്ട കുറിപ്പുകളിലും കവിത എന്നു തോന്നിക്കുന്ന കുറേ പടപ്പുകളിലും (ഇവ എഴുതിയ ആളാണല്ലോ വിത്സന്‍ കവിയാണോ എന്നു് ഉത്പ്രേക്ഷിച്ചതു്, കഷ്ടം!) ജീവിത്തത്തില്‍ ഇതു വരെ പരീക്ഷയുടെ ഉത്തരക്കടലാസിലല്ലാതെ മലയാളം എഴുതിയിട്ടില്ല എന്നു പറഞ്ഞു ബ്ലോഗിംഗ് തുടങ്ങുന്നവരുടെ ആദ്യപോസ്റ്റുകളില്‍ കാണുന്നതില്‍ കൂടുതല്‍ ഒന്നും കാണാന്‍ കഴിഞ്ഞിട്ടുമില്ല.
അങ്ങനെയിരിക്കുമ്പോഴാണു് പ്രേം നസീറാണു മലയാളത്തിലെ ഏറ്റവും വലിയ നടന്‍ എന്ന ഒരു പോസ്റ്റ് അദ്ദേഹം ഇട്ടതു്. അതിനു കുഴപ്പമൊന്നുമില്ല. അങ്ങനെ വിശ്വസിക്കാനും എഴുതാനും ഉള്ള അവകാശം അദ്ദേഹത്തിനുണ്ടു്. പക്ഷേ, അതിനോടു വിയോജിക്കാനുള്ള അവകാശം വായനക്കാര്‍ക്കുമുണ്ടു്. കലാകൌമുദിയില്‍ എഴുതിയതിനോടു വിയോജിച്ചെഴുതുന്ന കത്തുകള്‍ പലതും വാരികക്കാര്‍ മുക്കും-സ്ഥലപരിമിതി പറഞ്ഞു്. പക്ഷേ, ബ്ലോഗില്‍ അങ്ങനെയൊരു സംഗതി ഇല്ല. വിമര്‍ശനം സഹിക്കാന്‍ കഴിയാത്തവനുള്ള സ്ഥലമല്ല ബ്ലോഗ്. ആ പോസ്റ്റിന്റെ കമന്റുകളില്‍ ആരെങ്കിലും ഹരികുമാറിനെ വ്യക്തിപരമായി അധിക്ഷേപിച്ചു എന്നെനിക്കു തോന്നുന്നില്ല. മറിച്ചു്, അദ്ദേഹത്തിന്റെ അഭിപ്രായം ശരിയല്ല എന്നു് ഉദാഹരണസഹിതം വിശദീകരിക്കുക മാത്രമാണു ചെയ്തതു്.
വ്യക്തിപരമായ ആക്രമണം തുടങ്ങിവെച്ചതു ഹരികുമാര്‍ തന്നെയാണു്. അദ്ദേഹത്തെ എതിര്‍ത്തു പറഞ്ഞവരെയൊക്കെ ചീത്ത വിളിച്ചു. അവരൊക്കെ ഒരു പത്രാധിപര്‍ക്കുള്ള കത്തു പോലും എഴുതിയിട്ടില്ലാത്തവരാണെന്നു് അധിക്ഷേപിച്ചു. താന്‍ എഴുതുന്ന കോളം മലയാളത്തിലെ ഏറ്റവും മികച്ച പംക്തിയാണെന്നു് അഹങ്കരിച്ചു. നസീറൊഴികെ എതെങ്കിലും നടനെപ്പറ്റി പറഞ്ഞവരൊക്കെ വിവരമില്ലാത്തവരാണെന്നു പ്രഖ്യാപിച്ചു. അദ്ദേഹത്തെ എതിര്‍ത്തവര്‍ പലരല്ല, ഒരാള്‍ തന്നെ പല കള്ളപ്പേരുകളില്‍ എഴുതുന്നവരാണെന്നു് ആരോപിച്ചു.
ഒരേ ആള്‍ തന്നെ പത്രാധിപക്കുറിപ്പും വാരഫല-ജ്യോത്സ്യപംക്തിയും ഡോക്ടറോടു ചോദിക്കുന്ന പംക്തിയും വനിതാലോകത്തിലെ സോദരിച്ചെച്ചിയും വായനക്കാരുടെ കത്തുകളും എഴുതുന്ന സ്ഥാപനങ്ങളില്‍ ജോലി ചെയ്തതു കൊണ്ടാവണം ഹരികുമാറിനു് ഇങ്ങനെയൊരു തോന്നല്‍ ഉണ്ടായതു്. എഡിറ്ററായിരുന്നപ്പോള്‍ പല പേരില്‍ എഴുതുമായിരുന്നു എന്നു രാം മോഹന്‍ പാ‍ലിയത്തു തന്നെ ഇവിടെ പറഞ്ഞിട്ടുണ്ടല്ലോ.
തൂലികാനാമം ഉപയോഗിക്കുന്നവരെ ചീത്ത പറയുകയും അദ്ദേഹത്തെ ഏതെങ്കിലും വിധത്തില്‍ പുകഴ്ത്തിയവരെ മാത്രം വിവരമുള്ളവരായി ചിത്രീകരിക്കുകയും ചെയ്തു് ഹരികുമാര്‍ കൂടുതല്‍ അപഹാസ്യനായി. തന്നെ വിമര്‍ശിച്ച പലരും തന്നെക്കാള്‍ കൂടുതല്‍ വിവരമുള്ളവരാണെന്നു കണ്ടപ്പോള്‍ അവരെ വെട്ടുക്കിളികളെന്നും മറ്റും വിളിച്ചു് പിന്നെയും അപഹാസ്യനായി.
ഇത്രയും മാത്രമേ ചെയ്തുള്ളൂ എങ്കില്‍ അതു വിവരമില്ലാത്ത ഒരു ബ്ലോഗറുടെ തോന്ന്യവാസം എന്നു കരുതി വെറുതേ വിടാമായിരുന്നു. പക്ഷേ, അദ്ദേഹം ഇതേ അഭിപ്രായം തന്നെ “കലാകൌമുദി” വാരികയിലും എഴുതി വിട്ടു. കൂട്ടത്തില്‍ കവിയായ വിത്സനെ അപമാനിച്ചു കൊണ്ടും ഇതിനെപ്പറ്റി ഒന്നുമറിയാത്ത ലാപുടയ്ക്കെതിരെ ഒരു ആരോപണം ഉന്നയിച്ചുകൊണ്ടും. ഇതു് ഗൌരവമായി എടുക്കേണ്ട സംഗതിയാണു്. അടിസ്ഥാനമില്ലാത്ത ഇത്തരം ജല്പനങ്ങള്‍ പ്രസിദ്ധീകരിച്ച “കലാകൌമുദി” മലയാളികളോടു വിശദീകരണം നല്‍കണം. ഹരികുമാര്‍ താന്‍ ചെയ്ത തെറ്റായ പ്രസ്താവനകള്‍ക്കെങ്കിലും മാപ്പു പറയണം.
ഇതു വെളിച്ചത്തു കൊണ്ടു വരാന്‍ വേണ്ടി ഈ പോസ്റ്റിട്ട അഞ്ചല്‍ക്കാരനും അതിനു മുമ്പു് കലാകൌമുദി ലേഖനം സ്കാന്‍ ചെയ്തു് എവിടെയോ ഇട്ട ബ്ലോഗര്‍ക്കും (അനാഗതശ്മശ്രു?) നന്ദി.
(അഗ്രിഗേറ്ററുകളില്‍ വരാത്തതിനാലും എന്റെ സബ്സ്ക്രിപ്ഷന്‍ ലിസ്റ്റില്‍ ഇല്ലാത്തതിനാലും നേരത്തേ കാണാന്‍ പറ്റാഞ്ഞ ഈ പോസ്റ്റിനെപ്പറ്റി ഈ-മെയിലിലൂടെയും ചാറ്റിലൂടെയും നേരിട്ടും വായനലിസ്റ്റിലൂടെ പരോക്ഷമായും എന്നെ അറിയിച്ച എല്ലാ സുഹൃത്തുക്കള്‍ക്കും നന്ദി.)
കലാകൌമുദിയ്ക്കെതിരേ മലയാളം ബ്ലോഗെഴുത്തുകാര്‍ നടത്തുന്ന പ്രതിഷേധത്തില്‍ ഞാനും പങ്കു ചേരുന്നു.
ഹരികുമാര്‍ ബ്ലോഗേഴ്സിനെ വെട്ടുക്കിളികള്‍ എന്നു വിളിച്ചതു് അസംബന്ധമായിരുന്നു. എങ്കിലും ഈ വിഷയത്തെപ്പറ്റി കേട്ട ആരെങ്കിലും മുകളില്‍പ്പറഞ്ഞ (അഞ്ചല്‍ക്കാരന്റെ) പോസ്റ്റില്‍ വന്നു് അതിലെ കമന്റുകള്‍ വായിച്ചാല്‍ ചിലപ്പോള്‍ അങ്ങേരെ ന്യായീകരിച്ചെന്നു വരും. കാരണം, അത്ര മോശം ഭാഷയാണു് നാം അവിടെ ഉപയോഗിച്ചതു്. ഹരികുമാര്‍ എന്തു തെറ്റു ചെയ്താലും, ഇത്ര തരം താണ ഭാഷയില്‍ നമ്മള്‍ സംസാരിക്കരുതായിരുന്നു. കൈപ്പള്ളിയുടെ
തെറി വിളിക്കേണ്ട സമയത്ത്, വിളിക്കേണ്ടവരെ ഭേഷ വിളിക്കാനുള്ളതാണു്. അല്ലാതെ വണ്ടി യോട്ടികുമ്പം കുറുക്കേ ചാടണ മാടിനെം പോത്തിനെ വിളിക്കാനുള്ളതല്ല.
പരസ്യമായി തെറി വിളിക്കാന്‍ ഇതിലും നല്ല ഒരു അവസര്മ് ഇനി കിട്ടിയെന്നു വരില്ല. രണ്ടണ്ണം നീയും വിളിച്ചോ. 🙂
എന്ന പ്രസ്താവത്തോടു യോജിക്കാന്‍ എന്തോ എനിക്കു കഴിയുന്നില്ല.
അതോടൊപ്പം തന്നെ, ഈ ഒറ്റപ്പെട്ട സംഭവത്തെ മുന്‍‌നിര്‍ത്തി പ്രിന്റ് മീഡിയയെ മുഴുവന്‍ തെറി വിളിക്കുന്നതും ശരിയല്ല. പത്രവാര്‍ത്തകളിലും മറ്റും കാണുന്ന തെറ്റുകളെയും ഇരട്ടത്താപ്പുകളെയും നാം വിമര്‍ശിക്കുന്നു എന്നതു ശരി തന്നെ. എങ്കിലും മനുഷ്യരാശിയുടെ അറിവിനെ ഇത്ര കാലവും കാത്തുസൂക്ഷിച്ച കടലാസിനെ ഇപ്പോള്‍ വന്ന കമ്പ്യൂട്ടറിന്റെയും ഇന്റര്‍നെറ്റിന്റെയും പേരില്‍ തള്ളിപ്പറയുന്നതു ശരിയല്ല്ല.
ഞാന്‍ പ്രിന്റ് മീഡിയയില്‍ എന്റെ കൃതികള്‍ പ്രസിദ്ധീകരിക്കണം എന്ന ആഗ്രഹവുമായി നടക്കുന്ന ആളല്ല. എങ്കിലും ഇന്റര്‍നെറ്റില്‍ നിന്നു കിട്ടുന്നതിന്റെ പതിന്മടങ്ങു വായന അച്ചടിച്ച പുസ്തകങ്ങളില്‍ നിന്നു കിട്ടുന്ന ഒരാളാണു്.
ഹരികുമാറിനെ ഇത്ര തരം താണ രീതിയില്‍ തെറി പറഞ്ഞു കമന്റിട്ടതിനും പ്രിന്റ് മീഡിയയെ അടച്ചു ചീത്ത വിളിച്ചതിനും അതു ചെയ്തവര്‍ക്കെതിരേ (അഞ്ചല്‍ക്കാരനും കമന്റിട്ട അനേകം ആളുകള്‍ക്കും എതിരേ അല്ല) ഞാന്‍ പ്രതിഷേധിക്കുന്നു.
ഈ വിഷയത്തില്‍ ഇതു വരെ മൌനം അവലംബിച്ച ബ്ലോഗെഴുത്തുകാരെ ഒളിഞ്ഞും തെളിഞ്ഞും വിമര്‍ശിക്കുന്നതു കണ്ടു. ബൂലോഗത്തു് ഇപ്പോള്‍ ഒരുപാടു കാര്യങ്ങള്‍ നടക്കുന്നുണ്ടു്. കലേഷിന്റെ കല്യാണവും ആദ്യത്തെ ബ്ലോഗ്‌മീറ്റും പണ്ടു് ബ്ലോഗെഴുത്തുകാര്‍ മുഴുവനും കൂടി ആഘോഷിച്ചിട്ടുണ്ടു്. തുടര്‍ന്നു വന്ന എല്ലാ കല്യാണങ്ങള്‍ക്കും മീറ്റുകള്‍ക്കും ആ ആവേശം ഉണ്ടാവണമെന്നില്ല. മഹാത്മാഗാന്ധി നിസ്സഹകരണപ്രസ്ഥാനം തുടങ്ങിയപ്പോള്‍ കിട്ടിയ പിന്തുണയൊന്നും കേരളത്തില്‍ ഇപ്പോള്‍ എല്ലാ ആഴ്ചയിലും നടക്കുന്ന ഹര്‍ത്താലുകള്‍ക്കും കിട്ടാറില്ലല്ലോ.
“അതു ചെയ്തവര്‍ എന്തേ ഇതു ചെയ്യുന്നില്ല?” എന്ന ചോദ്യം അസ്ഥാനത്താണു്. ബ്ലോഗുകളുടെ എണ്ണം കൂടി, പ്രശ്നങ്ങളുടെ എണ്ണം കൂടി, ആളുകളുടെ സമയം കുറഞ്ഞു, വായന തിരഞ്ഞെടുത്ത പോസ്റ്റുകള്‍ മാത്രമായി, പോസ്റ്റുകള്‍ കാണാതെ പോകുന്നു, കണ്ടവയില്‍ പലതും കൂടുതല്‍ ചിന്തിക്കാതെ വിട്ടുകളയുന്നു, അങ്ങനെ പലതും.
കഴിഞ്ഞ കുറേക്കാലമായി പ്രശ്നങ്ങള്‍ പലതുണ്ടു്. വ്യാജ ഐഡി എടുത്ത പല കേസുകള്‍, പോസ്റ്റുകള്‍ മോഷ്ടിച്ച പല കേസുകള്‍, പുഴ.കോം അനുവാദമില്ലാതെ ബ്ലോഗ് സ്നിപ്പറ്റുകള്‍ ഇട്ടതു്, പാചകക്കുറിപ്പുകള്‍ യാഹൂ പൊക്കിയതു്, ലോനപ്പന്‍/വിവിയെ ആരോ മേലധികാരിയോടു പരാതിപ്പെട്ടു് ഉപദ്രവിച്ചതു്, ചിത്രകാരനെ ഫോണില്‍ വിളിച്ചു ഭീഷണിപ്പെടുത്തിയതു്, കുറുമാന്‍ പെണ്ണുപിടിയനാണോ അല്ലയോ എന്നതു്, രാം മോഹന്‍ പാലിയത്തിന്റെ പോസ്റ്റില്‍ അശ്ലീലം ഉണ്ടോ ഇല്ലയോ എന്നതു്, ഹരികുമാര്‍ ബ്ലോഗെഴുത്തുകാരെ അധിക്ഷേപിച്ചതു് തുടങ്ങി നൂറു കാര്യങ്ങള്‍. ഇവയിലെല്ലാം തലയിടാന്‍ എല്ലാവര്‍ക്കും താത്പര്യം ഉണ്ടായെന്നു വരുകില്ല. എന്നെ സംബന്ധിച്ചു്, എനിക്കു കൂടുതല്‍ താത്പര്യം പലപ്പോഴും ജ്യോതിഷം ശാസ്ത്രമാണെന്നു പറയുന്നവരെ എതിര്‍ക്കാനും അക്ഷരത്തെറ്റു തിരുത്താനുമൊക്കെ ആണു്. രാഷ്ട്രീയബോധം കുറവായതുകൊണ്ടായിരിക്കാം. പക്ഷേ ഈ രാഷ്ട്രീയബോധവും ആപേക്ഷികമാണല്ലോ.
മുകളില്‍ പറഞ്ഞ പ്രശ്നങ്ങളില്‍ യാഹൂ കോപ്പിറൈറ്റ് പ്രശ്നത്തിലും ഹരികുമാറിന്റെ പ്രശ്നത്തിലുമൊഴികെ ഒന്നിലും ഞാന്‍ പ്രതിഷേധിക്കുകയോ അഭിപ്രായം പറയുകയോ ചെയ്തിട്ടില്ല. അതു് എന്റെ സ്വാതന്ത്ര്യമാണെന്നു ഞാന്‍ വിശ്വസിക്കുന്നു. എവിടെയങ്കിലും ആരെങ്കിലും പ്രതികരിച്ചിട്ടുണ്ടെങ്കില്‍ പിന്നെയുള്ള എല്ലാ സംഭവങ്ങള്‍ക്കും അവരൊക്കെ പ്രതികരിക്കണം എന്നു ശഠിക്കുന്നതു തെറ്റാണു്. ഒരാള്‍ പ്രത്യേകം പേരെടുത്തു പറഞ്ഞ വക്കാരിയെ ഇപ്പോള്‍ ബ്ലോഗില്‍ത്തന്നെ കാണാനില്ല. ഗവേഷണവിദ്യാര്‍ത്ഥിയായ അദ്ദേഹത്തിനു സമയം കുറവായിരിക്കും. സമയം ഉണ്ടായിരുന്ന സമയത്തു പത്തു പുറത്തില്‍ അഭിപ്രായം എഴുതി. ഇല്ലാത്തപ്പോള്‍ മിണ്ടാതിരിക്കുന്നു. അത്ര മാത്രം.
ബ്ലോഗെഴുത്തുകാര്‍ എന്തു ചെയ്യണമെന്നു തീരുമാനിക്കുകയും അവര്‍ വിചാരിക്കുന്നതു പോലെ ചെയ്യാത്തവര്‍ക്കെതിരേ അനാവശ്യമായ ഭര്‍ത്സനങ്ങള്‍ ഉതിര്‍ക്കുകയും ചെയ്യുന്നതിനെതിരേ ഞാന്‍ പ്രതിഷേധിക്കുന്നു.
സന്ദീപ് | 06-Feb-08 at 7:13 pm | Permalink
ഞാന്‍ ഒന്നുമറിഞ്ഞിരുന്നില്ല.
വായിച്ചുവന്നപ്പോള്‍ സംഭവം ലേശം മോശം തന്നെ. ഉമേഷ്ജിയുടെ അഭിപ്രായത്തോട് യോജിക്കുന്നു.
ബൂലോകത്ത് വഴക്കടിക്കുന്നത് എന്തിനാണെന്ന് എനിക്കിതു വരെയും പിടികിട്ടിയിട്ടില്ല.നേരിട്ട് കാണാന്‍ കഴിയില്ല എന്നു ഉറപ്പുള്ളതാണോ കാരണം?
എന്തായാലും പല സഹബൂലോകരുടെയും തനിനിറം അത്ര നല്ലതല്ല് എന്ന് വിശ്വസിക്കാന്‍ തുടങ്ങിയതില്‍ പിന്നെ “disappointment” ഉണ്ടായിട്ടില്ല.
എനിക്കറിയാവുന്ന ചില നല്ല എഴുത്തുകാരുണ്ട് ഇവിടെ. അവരുടെ മാത്രം വായിക്കുന്നു. കമന്റ് അധികം വായിക്കാറുമില്ല, അധികം എഴുതാറുമില്ല. അതു കാരണം തന്നെ എന്റെ കരിങ്കല്ലിന്റെ പുറത്ത് കയറിക്കളിക്കാന്‍ ആരും എന്നെ അറിയുന്നുമില്ല. 🙂
എന്നാലും എന്റെ കൊച്ചു പ്രതിഷേധം ഞാനും അറിയിക്കുന്നു. (എന്നട്ടിപ്പൊ എന്തിനാ എന്നു ചോദിച്ചാല്‍ ഉത്തരമൊന്നുമില്ലെങ്കിലും!)
സന്ദീപ്.
ഗുപ്തന്‍ | 06-Feb-08 at 7:48 pm | Permalink
ബ്ലോഗെഴുത്തുകാരന്‍ എന്ന നിലയില്‍ ഹരികുമാറിനെ തുറന്നതിര്‍ത്ത ആ‍ദ്യചിലരില്‍ ഒരാളാണ് ഞാന്‍. അതൊരു കോലാഹലമായപ്പോള്‍ പലതവണ പിന്മാറാന്‍ ശ്രമിച്ചെങ്കിലും ഹരികുമാര്‍ എങ്ങനെയോ ഞാനാണ് എല്ലാ വിമര്‍ശനത്തിന്റെയും പിന്നില്‍ എന്ന് തെറ്റിദ്ധരിക്കുകയും ആവര്‍ത്തിച്ച് എന്നെ പേരെടുത്ത് പറഞ്ഞ് തിരികെ വിമര്‍ശിക്കുകയും ചെയ്തു. എനിക്ക് പിന്മാറാന്‍ തോന്നിയില്ല. ഇപ്പോഴും അഞ്ചല്‍ക്കാരന്റെ പോസ്റ്റില്‍ നടക്കുന്ന ചര്‍ച്ചകളില്‍ ഞാന്‍ പങ്കെടുത്തത് ഹരികുമാറിനെ വെള്ളപൂശി സംഗതി മുഖ്യധാരാമാധ്യങ്ങള്‍ക്ക് നേരെ ഒരു പ്രതിഷേധമോ ഒക്കെ ആക്കി മാ‍റ്റാനുള്ള ശ്രമം ഉണ്ടെന്ന് തോന്നിയപ്പോഴാണ്. എന്റെ മുന്നില്‍ ഹരികുമാര്‍ ഒരു എഴുത്തുകാരന്‍ എന്ന നിലയില്‍ എടുത്ത നിലപാടുകള്‍ക്കാണ് ഈ പ്രശ്നത്തില്‍ ഏറെ ഉത്തരവാദിത്തം ഉള്ളത്. അത് ആ പോസ്റ്റിലെ കമന്റുകളില്‍ ഞാന്‍ ആവര്‍ത്തിച്ച് പറഞ്ഞിട്ടുണ്ട്.
വിമര്‍ശനം/പ്രതിഷേധം ഒരു വലിയ ആഘോഷമാക്കുന്നതിനോട് വ്യക്തിപരമായി യോജിപ്പില്ല. എനിക്ക് ബൂ‍ലോഗത്ത് ഉന്നയിക്കപ്പെടുന്ന ഏതു വിഷയത്തില്‍ താല്പര്യം ഉണ്ടാവണം എന്ന് ഞാന്‍ മാത്രം ആണ് തീരുമാനിക്കുന്നത്.
ഹരികുമാറിന്റെ ലേഖനത്തില്‍ വന്ന ഒരു പരാമര്‍ശം വച്ചുമാത്രം പെരിങ്ങോടനെ വ്യക്തിപരമായി ഈ പ്രശ്നത്തിലേക്ക് വലിച്ചിഴക്കാന്‍ ശ്രമം നടന്നു. പിന്നെ നിശബ്ദരായിരീക്കുന്നവര്‍ക്കെതിരെയും. ഇതുരണ്ടും തീര്‍ത്തും അനഭിലഷണീയമാണെന്ന് ഞാന്‍ കരുതുന്നു. അഞ്ചല്‍ക്കാരന്‍ അക്കാര്യം ഒരു കമന്റില്‍ പറയുകയും ചെയ്തിരുന്നു.
ഈ പോസ്റ്റില്‍ എഴുതിയിരിക്കുന്ന കാര്യങ്ങളോട് പൊതുവെ എന്റെ യോജിപ്പ് അറിയിക്കുന്നു.
ഗുപ്തന്‍ | 06-Feb-08 at 7:57 pm | Permalink
കൂട്ടത്തില്‍ ഈ പ്രശ്നത്തില്‍ ഹരികുമാറിനെക്കൊണ്ട് ഹെറ്റു തിരുത്തിക്കാം എന്ന് വാഗ്ദാനം ചെയ്തതിനു ശേഷം അതില്‍ പിന്നോട്ട് പോയതിലും സാസ്കാരികമായ ഒരു അപകടം എന്ന നിലയില്‍ അദ്ദേഹം എഴുതുന്ന കോളം തുടരുന്നതിലും എനിക്ക് കലാകൌമുദിയോട് പ്രതിഷേധം ഉണ്ട്. പക്ഷെ അത് കലാകൌമുദിയോടാണ്. പ്രിന്റഡ് മീഡിയ മുഴുവനോടും അല്ല.
കണ്ണൂരാന്‍ | 07-Feb-08 at 6:00 am | Permalink
ഉമേഷ്ജിയുടെ പോസ്റ്റിനു കീഴെ ഒരു കൈയ്യൊപ്പ്.
Jayarajan | 07-Feb-08 at 6:03 am | Permalink
അവിടെ നടന്ന കമന്റ് മഹാമഹം കണ്ട് അന്തം വിട്ട് നില്ക്കാനേ കഴിഞ്ഞുള്ളൂ. അവന്‍ എവിടെ, പുലി എവിടെ എന്നൊക്കെ കണ്ടപ്പോള്‍ എന്റെ മനസ്സില്‍ തോന്നിയ പല കാര്യങ്ങളുമാണു്‌ ഉമേഷ്ജി ഇവിടെ പറഞ്ഞിരിക്കുന്നത്. നന്നായി. അടിയില്‍ എന്റെ വകയും ഒരു്‌ ഒപ്പ്
Joju | 07-Feb-08 at 6:26 am | Permalink
പറയേണ്ടവര്‍ തന്നെ പറയേണ്ടത് പറയണം. ഉമേഷ് ജീ പറയേണ്ടതു പോലെ തന്നെ പറഞ്ഞു. അഭിപ്രായത്തോട് യോജിയ്ക്കുന്നതുകൊണ്ടും അഭിപ്രയത്തിന്റ് ആനുകാലിക പ്രസക്തികൊണ്ടും മാത്രം കമന്റിടൂന്നു.
Jayarajan | 07-Feb-08 at 6:41 am | Permalink
ഗുപ്തന്റെ കമന്റില്‍ ഒരു തിരുത്ത്: “പ്രിന്റഡ് മീഡിയ മുഴുവനോടും അല്ല” എന്നുള്ളത് “പ്രിന്റഡ് മീഡിയയോട് മുഴുവനും അല്ല” എന്നല്ലേ വേണ്ടത്? ഇനി അല്ലേ? ഉമേഷ്ജീ ഹെല്പ്പൂ!
കൃഷ് | krish | 07-Feb-08 at 8:00 am | Permalink
വായിച്ചു. ഇനിയെന്ത് പറയാനാ.
Moorthy | 07-Feb-08 at 10:52 am | Permalink
പോസ്റ്റിനോട് യോജിക്കുന്നു. എന്റെ പ്രതിഷേധം ഞാന്‍ ഒരു മെയില്‍ വഴി കലാകൌമുദിയെ അറിയിച്ചിരുന്നു.
ശ്രീജിത്ത് കെ | 07-Feb-08 at 4:50 pm | Permalink
ഞാന്‍ ഹരികുമാറിന്റെ ലേഖനങ്ങളോ അവിടെ വന്ന കമന്റുകളോ കണ്ട്ടിട്ടില്ല. കലാകൌമുദിയില്‍ വന്ന ലേഖനം മാത്രം കണ്ടു. അത് പ്രതിഷേധാര്‍ഹമാണ്‍. പക്ഷെ ഉമേഷേട്ടന്‍ പറഞ്ഞതുപോലെ ബൂലോക ക്ലബ്ബില്‍ വന്ന പോസ്റ്റില്‍, ഹരികുമാറിനുണ്ടെന്ന് പറയുന്ന താഴ്ന്ന സംസ്കാരത്തിനോട് മത്സരിക്കുന്നതരത്തില്‍ കമന്റുകള്‍ കണ്ടതോടെ ഈ വിഷയത്തില്‍ ഒരു കമന്റ് പോലും അവിടെ ഇടില്ലെന്ന് തീരുമാനിക്കേണ്ടി വന്നു.
ഇപ്പോഴും താത്പര്യം ഉണ്ടായിട്ടല്ല, എന്നാലും ഒരു കാര്യം പറയണമെന്ന് ആഗ്രഹിക്കുന്നു. അഹങ്കാരത്തിനെ അഹങ്കാരം കൊണ്ടോ, തോന്ന്യവാസത്തെ തോന്ന്യവാസം കൊണ്ടോ, വിവരക്കേടിനെ വിവരാക്കേട് കൊണ്ടോ തോല്‍പ്പിക്കുക സാധ്യമല്ല. ചിലരെങ്കിലും ഈ സത്യം ഇനിയും മനസ്സിലാക്കേണ്ടിയിരിക്കുന്നു.
കിനാവ് | 08-Feb-08 at 5:09 pm | Permalink
എനിക്ക് പിടികിട്ടാത്തത് ഈ പോസ്റ്റിന്റെ പ്രസക്തിയാണ്. പിന്നെ ബ്ലോഗര്‍മാര്‍ എല്ലാവര്രും ഒറ്റ വാരിയെല്ലില്‍ നിന്നൂരിയെടുത്ത ഹവ്വമാരല്ല. അവിടെ നടന്നത് പ്രതിഷേധമാണ്. കല്ല്യാണ്‍നവിരുന്ന്നായിരുന്നില്ല.
സ്നേഹപൂര്‍വ്വം സജി.
കിനാവ് | 08-Feb-08 at 5:10 pm | Permalink
എനിക്ക് പിടികിട്ടാത്തത് ഈ പോസ്റ്റിന്റെ പ്രസക്തിയാണ്. പിന്നെ ബ്ലോഗര്‍മാര്‍ എല്ലാവര്രും ഒറ്റ വാരിയെല്ലില്‍ നിന്നൂരിയെടുത്ത ഹവ്വമാരല്ല. അവിടെ നടന്നത് പ്രതിഷേധമാണ്. കല്ല്യാണ്‍നവിരുന്ന്നായിരുന്നില്ല.
സ്നേഹപൂര്‍വ്വം സജി.
ഇത്തിരിവെട്ടം | 11-Feb-08 at 5:35 am | Permalink
ഇതിന് താഴെ എന്റെയും ഒരു ഒപ്പ്.
Umesh:ഉമേഷ് | 14-Feb-08 at 6:44 pm | Permalink
കിനാവേ,
ഈ പോസ്റ്റിനു മൂന്നു ഭാഗങ്ങളുണ്ടല്ലോ. ഏതിനാണു പ്രസക്തിയില്ലെന്നു പറഞ്ഞതു്? അതോ മൂന്നിനും ഇല്ലെന്നോ?
ബ്ലോഗെഴുത്തുമായി ബന്ധപ്പെട്ട ചില കാര്യങ്ങളെപ്പറ്റി എന്റെ അഭിപ്രായം ഞാന്‍ എന്റെ ബ്ലോഗില്‍ എഴുതിയതിനു ഏതെങ്കിലും പ്രസക്തിയുടെ മാനദണ്ഡം ഉപയോഗിക്കണോ? അവിടെ നടന്നതു് ആഘോഷമാണെന്നു ഞാന്‍ പറഞ്ഞില്ലല്ലോ.
കിനാവ് | 16-Feb-08 at 9:56 am | Permalink
ഉമേഷേട്ടന്‍,
ഈ പോസ്റ്റിന് മൂന്ന് ഭാഗങ്ങളുണ്ടെന്നത് നേരാണ്. പക്ഷേ അതിന്റെ ആദ്യഭാഗത്തെ അവസാനഭാഗങ്ങള്‍ കൊണ്ട് മുക്കുന്ന ചെപ്പടിവിദ്യയാണ് ഉമേഷേട്ടന്‍ പ്രയോഗിച്ചിരിക്കുന്നത്. കമന്റുകള്‍ സാക്ഷ്യം. ഈ കണ്‍കെട്ട് എന്തിനാണെന്ന് ചിന്തിച്ചപ്പോള്‍ ഞാനൊന്ന് കാടുകയറി. ഒരു പക്ഷേ തെറ്റിദ്ധാരണയായിരിക്കും. എന്നുവെച്ച് പ്രസക്തിയില്ലെന്നൊന്നും ഞാന്‍ പറഞ്ഞില്ല. പ്രസക്തിയെന്തെന്ന് എനിക്ക് പിടികിട്ടുന്നില്ലെന്നേ പറഞ്ഞുള്ളൂ. ഒരാളെഴുതുന്നതെല്ലാം മറ്റൊരാള്‍ക്ക് പിടികിട്ടണമെന്നില്ലല്ലോ. ആ പിടിയില്ലായ്മ ഒരു പിടിയില്ലായ്മയായി തന്നെ അവിടെ നിന്നോട്ടെ.
പ്രതിഷേധത്തിന്റെ രീതികളെക്കുറിച്ച്:
ഗാന്ധിയെ ഞാന്‍ വളരെയധികം ബഹുമാനിക്കുന്നു. എന്നുവച്ച് ഗാന്ധി ഉപ്പുകുറുക്കിയതുകൊണ്ട് മാത്രമാണ് ഇന്ത്യ സ്വതന്ത്രയായതെന്ന് വിശ്വസിക്കുന്നില്ല. അത് എന്റെ വിശ്വാസം. അങ്ങനെയല്ലാത്തവരുമുണ്ടായിരിക്കാം, ഒരു സമൂഹമല്ലേ. പിന്നെ ആ പോസ്റ്റിലെ കമന്റുകളിലെ സദാചാരക്കുറവ് നിയന്ത്രണാധീതമാകുന്നെങ്കില്‍ അവിടെ വന്നു തന്നെ പറയാമായിരുന്നു. അവിടെ ഒരു ലിങ്കിട്ട് ഇവിടെ വന്ന് ഖണ്ഡകാവ്യം പ്രസിദ്ധീകരിച്ചതാണ് എന്തിനെന്ന് എനിക്ക് മനസിലാകാതെ പോയത്.എന്റെ വിവരക്കേടുകൊണ്ടായിരിക്കാം. വിട്ടുകളയാം.
സ്നേഹപൂര്‍വ്വം സജി.
കമന്റട്ട | 18-Feb-08 at 4:12 pm | Permalink
ഉമേഷ്ജീ, കമന്റ് വിതയ്ക്കാതെ കമന്റ് കൊയ്യാന്‍ വല്ല വഴിയുമുണ്ടോ ഈ പാടത്ത്?
അതുപോലെ അക്ഷരം കറുപ്പിക്കാനും അടിയില്‍ വരയ്ക്കാനും പച്ച കത്തി കരി താടി നിണം ഒക്കെയായി ചുട്ടിയിടാനും?
😉
Umesh:ഉമേഷ് | 18-Feb-08 at 7:25 pm | Permalink
കമന്റട്ടേ,
കമന്റു വിതയ്ക്കാതെ കമന്റു കൊയ്യാന്‍ ഏറ്റവും എളുപ്പമുള്ള വഴി കമന്റ് ഫീഡ് സബ്സ്ക്രൈബ് ചെയ്യുകയാണു്.
ബ്ലോഗില്‍ വരുന്ന എല്ലാ കമന്റും സബ്സ്ക്രൈബ് ചെയ്യാന്‍ (ഇതു് മെയിന്‍ പേജിന്റെ സൈഡ് ബാറില്‍ ലിങ്ക് ആയും ഉണ്ടു്): http://malayalam.usvishakh.net/blog/comments/feed
ഒരു പ്രത്യേക പോസ്റ്റിന്റെ കമന്റുകള്‍ സബ്സ്ക്രൈബ് ചെയ്യാന്‍ പോസ്റ്റിന്റെ URL-ന്റെ കൂടെ /feed എന്നും ചേര്‍ക്കുക. ഉദാഹരണമായി ഈ പോസ്റ്റിന്റെ കമന്റ് ഫീഡ് http://malayalam.usvishakh.net/blog/archives/289/feed എന്നാണു്. 289-നു പകരം അതാതു പോസ്റ്റിന്റെ നമ്പര്‍ കൊടുത്താല്‍ ഏതു പോസ്റ്റിന്റെയും കമന്റ് ഫീഡ് കിട്ടും. പോസ്റ്റു കഴിഞ്ഞു കമന്റുകള്‍ തുടങ്ങുന്നതിനു മുമ്പു് ഇംഗ്ലീഷില്‍ മൂന്നു വരിയില്‍ ഉപന്യസിച്ചിരിക്കുന്നതിലും കമന്റ് ഫീഡിന്റെ ലിങ്ക് ഉണ്ടു്.
കമന്റില്‍ അക്ഷരം കറുപ്പിക്കാന്‍ ഇടത്തും വലത്തും <b> </b> എന്നിവ ഇടുക. ചരിക്കാന്‍ <i> </i>. അടിയില്‍ വരയ്ക്കാന്‍ <u> </u>. നിറം വരുത്താന്‍ പറ്റുമോ എന്നറിയില്ല. <font color=”green”>പച്ച</font> എന്നു കൊടുത്തു നോക്കൂ.
കമന്റട്ട | 18-Feb-08 at 7:35 pm | Permalink
അട്ട ഒന്നു നോക്കട്ടെ
ഇതു ശരിയാവുന്നുണ്ടോ?
നീല
ചുവപ്പ്
മഞ്ഞ
പച്ച
നിറം
ഉണ്ടോ? അതോ ഉണ്ടില്ലേ?
daivam | 21-Feb-08 at 4:14 pm | Permalink
ചിലപ്പോള്‍ ചെരിപ്പെടുത്തടിച്ചശേഷം പറഞ്ഞാലേ ചിലര്‍ക്ക് മനസ്സിലാകൂ.
ഉള്ളില്‍ തെറി പൊട്ടിയാല്‍ അത് പറഞ്ഞുതീരുന്നതു തന്നെയാണ് നല്ലത്.
ഉള്ളിലും തെറി വരാതിരിക്കുന്നത് മറ്റൊരു സംസ്കാരമാണ്.
കിനാവ് | 21-Feb-08 at 5:58 pm | Permalink
kamantattayum daivavumokke paranjathu enikku manasilaayi. ullile theri olippicchuvekkaanum enikkariyaam. ithu gurukulam, enikkum.
Umesh:ഉമേഷ് | 22-Feb-08 at 5:01 pm | Permalink
ദൈവവും കൈപ്പള്ളിയും പറഞ്ഞതു പോലെ ചിലരോടു തെറി പറഞ്ഞേ മതിയാവൂ. പക്ഷേ, ഈ കാര്യത്തില്‍ അതു ശരിയായോ എന്നൊരു സംശയം. ഹരികുമാര്‍ പ്രശ്നത്തെപ്പറ്റി അറിഞ്ഞ ഒരു സുഹൃത്തു് (കലാകൌമുദിയും മറ്റും വായിക്കുന്ന ആള്‍. ബ്ലോഗും വായിക്കും. വളരെയധികം ഇല്ലെന്നു മാത്രം.) അഞ്ചല്‍ക്കാരന്റെ പോസ്റ്റിലെ കമന്റുകള്‍ വായിച്ചിട്ടു് നിങ്ങള്‍ ബ്ലോഗേഴ്സ് ഇങ്ങനെയാണോ പെരുമാറുന്നതു് എന്നു ചോദിച്ചു. ഹരികുമാര്‍ ബ്ലോഗെഴുത്തുകാരെ അധിക്ഷേപിച്ചിട്ടുണ്ടെന്നതു ശരി തന്നെ. പക്ഷേ മൂന്നാമതൊരാള്‍ വായിച്ചാല്‍ ഇതാണു കൂടുതല്‍ തോന്നുക. ഞാന്‍ അയാളോടു് അക്ഷരജാലകവും അതിലെ കമന്റുകളും വായിക്കാന്‍ പറഞ്ഞു. എങ്കിലും പല വായനക്കാരുടെ ഇടയിലും “എന്തോ” ബ്ലോഗെഴുത്തുകാരെ പറഞ്ഞതിനു് ബ്ലോഗെഴുത്തുകാര്‍ ഹരികുമാറിനെ പച്ചത്തെറിയില്‍ കുളിപ്പിച്ചു എന്ന അഭിപ്രായമുണ്ടു്. കലാകൌമുദിയോടാണോ ബ്ലോഗിനോടാണോ ഇതുമൂലം കൂടുതല്‍ പ്രതിഷേധം രണ്ടും വായിക്കുന്ന (ബ്ലോഗെഴുത്തുകാരല്ലാത്ത) വായനക്കാര്‍ക്കു് ഉണ്ടാവുക എന്നു പറയാന്‍ പറ്റില്ല.
എന്റെ പോസ്റ്റിന്റെ സിംഹഭാഗവും ഹരികുമാര്‍ ചെയ്ത കുത്സിതങ്ങള്‍ വിശദീകരിക്കാനും അദ്ദേഹത്തെ വിമര്‍ശിക്കാനും തന്നെയാണു വിനിയോഗിച്ചതു്. പക്ഷേ, അതു മാത്രം പറഞ്ഞാല്‍ പോരാ എന്നാണു് എന്റെ മനസ്സാക്ഷി എന്നോടു പറഞ്ഞതു്. ക്ഷമിക്കണം, ഞാനൊരു ആക്ടിവിസ്റ്റല്ല. കുറ്റം ഞാന്‍ നില്‍ക്കുന്ന പക്ഷത്തും ഉണ്ടെങ്കില്‍ ഞാന്‍ അതും പറയാറുണ്ടു്. കരിങ്കാലിയെന്നു വിളിച്ചു കൊള്ളൂ.
കിനാവു പറഞ്ഞ “ആദ്യഭാഗത്തെ അവസാനഭാഗങ്ങള്‍ കൊണ്ട് മുക്കുന്ന ചെപ്പടിവിദ്യ” എന്താണെന്നു മനസ്സിലായില്ല. ഒന്നും മുക്കാതെ പറയാനാണു ഞാന്‍ ശ്രമിച്ചതു്. അതു പറഞ്ഞതു് എന്റെ ബ്ലോഗിലുമാണു്. ഇനി ഇതിന്റെ ഒരു ലിങ്ക് കമന്റായി അവിടെ ഇട്ടതാണു പ്രശ്നമെങ്കില്‍ അതു ഡിലീറ്റ് ചെയ്യാം. ആ പോസ്റ്റിന്റെ കര്‍ത്താവായ അഞ്ചല്‍ക്കാരനു യുക്തമെന്നു തോന്നിയാല്‍ അദ്ദേഹത്തിനു് ആ കമന്റു ഡിലീറ്റു ചെയ്യാം. (ഇതു് എന്റെ എല്ലാ കമന്റുകള്‍ക്കും ബാധകമാണു്. എന്റെ കമന്റുകള്‍ പോസ്റ്റിന്റെ കര്‍ത്താവു് ഡിലീറ്റു ചെയ്താല്‍ എനിക്കു യാതൊരു വിരോധവുമില്ല. എന്റെ ബ്ലോഗില്‍ ഞാനും ചെയ്യുന്ന കാര്യമാണതു്.)
കമന്റില്‍ HTML ഫോര്‍മാറ്റിംഗ് എങ്ങനെ ചെയ്യാം എന്നു പരീക്ഷിച്ച കമന്റട്ടയോടും കിനാവു മെക്കിട്ടു കേറുന്നതു കണ്ടു. അയാള്‍ പറഞ്ഞതു് എന്തു മനസ്സിലായെന്നാണു കിനാവു പറയുന്നതു്?
കിനാവ് | 23-Feb-08 at 7:55 am | Permalink
ഉമേഷേട്ടന്‍,
ഞാനെന്തു മെക്കട്ടുകയറിയെന്നാണ് ഉമേഷേട്ടന്‍ പറയുന്നത്. പറഞ്ഞതു മനസിലായി എന്നു പറഞ്ഞാല്‍ മെക്കട്ടുകയറ്റമാകുമോ.
കാറ്റുവിതച്ച് കൊടുങ്കാറ്റ് കൊയ്യുന്നതിലെ തത്വവും കരി, കത്തി വേഷങ്ങളും പരിഹാസമല്ലെങ്കില്‍ മറ്റെന്താണ് എന്നൊന്നും ഞാന്‍ ചോദിക്കുന്നില്ല. ലിങ്കിലെ നിഷ്കളങ്കത്വം തന്നെ ധാരാളം. അഭിപ്രായം പറയുമ്പോള്‍ നട്ടെല്ലില്‍ നിന്ന് പറയാനറിയാത്തവനോട് പ്രതികരിക്കേണ്ടത് എന്റെ ചുമതലയുമല്ല. മനസിലായി എന്ന വാക്കിന് പുതിയ അര്‍ത്ഥങ്ങളൊന്നുമറിയാത്തതുകൊണ്ടു വന്ന തെറ്റായിരിക്കാം.
പിന്നെ, കലാകൌമുദിയും ബ്ലോഗുമൊക്കെ വായിക്കുന്ന ആ സുഹൃത്തിനോട് പറയേണ്ടിയിരുന്ന മറുപടി ഹരികുമാറിന്റെ ബ്ലോഗുവാ‍യിച്ചു നോക്കൂ എന്നായിരുന്നില്ല. മലയാളം ബ്ലോഗ്ഗ് ആരാലും നയിക്കപ്പെടുന്ന ഒരു പ്രസ്ഥാനമല്ല എന്നായിരുന്നു. ലോക്കല്‍,ബ്രാഞ്ച്,ഏരിയ,ജില്ല,സംസ്ഥാനകമ്മറ്റികളുള്ള കേരളത്തിലെ അച്ചടക്കത്തിന്റെ അപ്പോസ്തലപ്പാര്‍ട്ടിയുടെ സംസ്ഥാനസമ്മേളനത്തില്‍ വരെ കള്ളുകുപ്പികൊണ്ട് ഏറ് നടക്കുന്നു. അപ്പോള്‍ ഒരു പ്രതിഷേധ പോസ്റ്റില്‍ ഇത്തിരി തെറി(?)വിളിച്ചെങ്കില്‍ അതില്‍ അത്ര വലിയ ഖേദമൊന്നും നടിക്കേണ്ട ആവശ്യമില്ലെന്നേ. പിന്നെ അഞ്ചല്‍ക്കാരന്റെ ആ ഒരൊറ്റപോസ്റ്റ് കൊണ്ട് ആരെങ്കിലും ബൂലോകത്തെ മൊത്തം വിലയിരുത്തിയെങ്കില്‍ അവരോട് നമുക്ക് സഹതപിക്കാം. അല്ലാതെന്തു പറയാന്‍.
ആ ലിങ്കവിടെ ഇട്ടതില്‍ ആര്‍ക്കും ബുദ്ധിമുട്ടൊന്നും കാണില്ല. ഞാനും പറഞ്ഞില്ല. അവിടെ പറയേണ്ടത് അവിടെ പറഞ്ഞില്ല എന്നേ പറഞ്ഞുള്ളൂ. ഇനി എന്റെ ഇവിടുത്തെ കമന്റ് എന്തെങ്കിലും ബുദ്ധിമുട്ടുണ്ടാക്കുന്നുവെങ്കില്‍ ഡിലീറ്റുചെയ്യുന്നതിന് എനിക്കും യാതൊരു വിരോധവുമില്ല.
ഇവിടെ വന്ന് കമന്റിട്ടതിന് ഞാന്‍ മാപ്പുപറയണമെന്നാണെങ്കില്‍ അതിനും ഞാന്‍ ഒരുക്കമാണ്.
സ്നേഹപൂര്‍വ്വം സജി.
കമന്റട്ട | 23-Feb-08 at 10:00 am | Permalink
അയ്യേ സജിക്കുട്ടാ… പൂയ് പൂയ്…. 🙂 🙂
വിതയ്ക്കുന്നതും കൊയ്യുന്നതും ഒക്കെ നെരിട്ട് കാറ്റിനോടും കൊടുംകാറ്റിനോടും ബന്ധപ്പെടുത്തണോ? അല്ലാതെ, നിരുപദ്രവമായി വിചാരിച്ചുകൂടേ?
സ്വന്തമായി കമന്റൊന്നും ഇടാതെ തന്നെ, ഇവിടെ വരുന്ന എല്ലാ കമന്റുകളും സീഡ് ചെയ്യാതെ ലീച്ച് ചെയ്ത് വായിക്കാന്‍ പറ്റുവോ എന്നല്ലേ ഞാന്‍ ഉമേഷേട്ടനോടു ചോദിച്ചുള്ളൂ? അതില്‍ പിന്നെന്തിനാ ആവശ്യത്തിലധികം അര്‍ത്ഥം കാണുന്നേ? ടൊറന്റ് ഒക്കെ യൂസ് ചെയ്യുന്നവര്‍ക്ക് അറിയത്തില്ലേ സീഡിങ്ങും ലീച്ചിങ്ങും ഒക്കെ? അപ്പോ അട്ട, കമന്റട്ട എന്നൊക്കെ പറഞ്ഞാല്‍ എന്താ?
പച്ച,കത്തി, കരി എന്നൊക്കെ പറഞ്ഞാല്‍ കഥകളിയിലെ വേഷങ്ങളുടെ നിറമല്ലേ? ഉമേഷേട്ട്ടന്റെ ബ്ലോഗല്ലേ, ഒരു ഫണ്ണായിക്കോട്ടെ എന്നു വെച്ച് ഇച്ചിര സാഹിത്യം ചേര്‍ത്തെഴുതീന്നുള്ളതാണോ എന്റെ തെറ്റ്? അല്ലാണ്ട് വേറേ അര്‍ത്ഥവും കളിയാക്കലും ഒന്നും ഞാന്‍ ഉദ്ദേശിച്ചിട്ടില്ല പൊന്നേ.
ഉമേഷേട്ടാ, ഹി ഹി.(ഞാന്‍ അനോണിയല്ലാട്ടോ,ഈമെയില്‍ ഐഡി കണ്ടല്ലോ?);-)
പിന്നെ പറഞ്ഞപോലെ ചെയ്തുനോക്കി. കളറൊന്നും പറ്റില്ലാന്നു മനസ്സിലായി. ഫീഡിന്റെ കാര്യം ശ്രമിക്കുന്നേയുള്ളോ.
Umesh:ഉമേഷ് | 24-Feb-08 at 4:18 am | Permalink
കിനാവു വീണ്ടും കാടു കയറുന്നു. ഇവിടെ (ഇപ്പോള്‍ ആ സംവിധാനം ബ്ലോഗറിലുമുണ്ടു്) ഒരു കമന്റിടുമ്പോള്‍ അതിനോടൊപ്പം ചെക്ക് ബോക്സില്‍ ടിക്ക് ചെയ്താല്‍ അതു മുതലുള്ള കമന്റുകള്‍ ഈ-മെയില്‍ ആയി കിട്ടും. ഇങ്ങനെ കമന്റിടാതെ കമന്റ് കാണാന്‍ വഴിയുണ്ടോ എന്നാണു കമന്റട്ട ചോദിച്ചതു്. എന്റെ ചില പോസ്റ്റുകളിലെ കമന്റുകള്‍ സംഭരിക്കാന്‍ താത്പര്യമുള്ള ഒരാളാണു കമന്റട്ട. ഇതു കൂടാതെ എന്റെ പല പോസ്റ്റുകളിലും ഒരു സ്മൈലി മാത്രമിട്ടു കമന്റ് സബ്സ്ക്രൈബ് ചെയ്തിട്ടുണ്ടു് അദ്ദേഹം. എന്തിനിങ്ങനെ ഒന്നുമില്ലാക്കമന്റിടുന്നു എന്നതിന്റെ വിശദീകരണത്തിനു് തിരഞ്ഞെടുത്തതു് ഈ പോസ്റ്റായിപ്പോയി. എന്തൊക്കെ അര്‍ത്ഥങ്ങളാണു് അതിനു കണ്ടെത്തിയതു്? പച്ച, കരി തുടങ്ങിയവയ്ക്കും പല നിറങ്ങള്‍ എന്ന അര്‍ത്ഥമേ ഞാന്‍ മനസ്സിലാക്കിയുള്ളൂ. കിനാവല്ലാതെ ആര്‍ക്കെങ്കിലും ഇങ്ങനെയൊരു അര്‍ത്ഥം തോന്നിയോ എന്നറിയില്ല.
കമന്റട്ടയെ വിടൂ. ഇനി കാര്യത്തിലേക്കു വരാം.
“അഭിപ്രായം പറയുമ്പോള്‍ നട്ടെല്ലില്‍ നിന്ന് പറയാനറിയാത്തവനോട്…” എന്നു പറഞ്ഞതു് എന്നെപ്പറ്റിയല്ല, കമന്റട്ടയെപ്പറ്റിയാണു് എന്നു തോന്നിയതിനാല്‍ മറുപടി പറയുന്നില്ല. അങ്ങനെയല്ല ഉദ്ദേശിച്ചതെങ്കില്‍ ദയവായി വ്യക്തമാക്കുക.
കലാകൌമുദി വായിക്കുന്ന സുഹൃത്തിനോടു് ബ്ലോഗ് പ്രസ്ഥാനമാണു്‌, തീപ്പന്തമാണു്, ഭാവിയുടെ അച്ചുതണ്ടാണു് എന്നൊക്കെ പറഞ്ഞു സ്വയം പരിഹാസ്യനാവാന്‍ എനിക്കുദ്ദേശ്യമില്ല സുഹൃത്തേ. ഹരികുമാറിനെ എന്തിനു ബ്ലോഗെഴുത്തുകാര്‍ ചീത്ത വിളിച്ചു എന്നറിയാന്‍ അങ്ങേരെഴുതിക്കൂട്ടിയ പടപ്പുകള്‍ തന്നെ വായിച്ചു നോക്കൂ എന്നാണു ഞാന്‍ പറഞ്ഞതു്. ഞാന്‍ ഖേദം നടിച്ചുമില്ല. ഹരികുമാര്‍ അതര്‍ഹിക്കുന്നു എന്നു പറഞ്ഞു ബ്ലോഗെഴുത്തുകാരുടെ പക്ഷത്തു തന്നെയാണു ഞാന്‍ നിന്നതു്.
“അവിടെ പറയേണ്ടതു് അവിടെ പറഞ്ഞില്ല” എന്നതിന്റെ കാരണം എനിക്കു പറയേണ്ടതു് കുറേ വലിയതായതാണു്. അതു കൊണ്ടാണു് അതൊരു പോസ്റ്റായി ഇട്ടതു്. പല ദിവസം കൊണ്ടു് എഴുതിത്തീര്‍ക്കാം, ലിങ്കോ മാറ്റോ ചേര്‍ക്കണമെങ്കില്‍ എളുപ്പത്തില്‍ ചേര്‍ക്കാം തുടങ്ങി പല ഗുണങ്ങളുമുണ്ടു് അതിനു്. മുമ്പു് ഇതിനായി ഒരു ബ്ലോഗു തന്നെ ഉണ്ടായിരുന്നു. ഇപ്പോള്‍ എന്റെ ബ്ലോഗില്‍ “പ്രതികരണം” എന്നൊരു കാറ്റഗറിയായി കമന്റുകള്‍ ഇടുന്നു. കമന്റീട്ടിട്ടു് അതു പിന്നെ ഭരണിയില്‍ സൂക്ഷിക്കുന്നതിനേക്കാള്‍ എനിക്കു് ഇതാണു കൂടുതല്‍ ഇഷ്ടം. മുമ്പും ഇതു ചെയ്തിട്ടുണ്ടു്. ഒരു ഉദാഹരണം ഇവിടെ.
പിന്നെ പറയേണ്ടതു് എന്താണു് പറയരുതാത്തതു് എന്താണു് എന്നതിനെപ്പറ്റി പലര്‍ക്കും പല അഭിപ്രായവുമുണ്ടാവും. എന്റെ അഭിപ്രായമാണു് ഞാന്‍ ഈ പോസ്റ്റില്‍ എഴുതിയതു്. ഹരികുമാറിനെതിരേ കലാകൌമുദിയ്ക്കോ മറ്റോ ബ്ലോഗെഴുത്തുകാരുടെ അഭിപ്രായം അയച്ചുകൊടുക്കാന്‍ താത്പര്യമുണ്ടെങ്കില്‍ ഇതിലെ ആദ്യഭാഗവും അതില്‍ ചേര്‍ക്കുന്നതില്‍ എനിക്കു സന്തോഷമേ ഉള്ളൂ. പക്ഷേ, അതിനെപ്പറ്റി എന്റെ ബ്ലോഗില്‍ എഴുതുമ്പോള്‍ അതിനോടനുബന്ധിച്ചുള്ള മേല്‍പ്പറഞ്ഞ കാര്യങ്ങളും എഴുതണം എന്നു് എനിക്കു നിര്‍ബന്ധമുണ്ടു്. അതിനാലാണു് അതൊരു പ്രത്യേക പോസ്റ്റാക്കിയതു്.
കിനാവിന്റെ കമന്റ് ഡിലീറ്റ് ചെയ്യാന്‍ ഉദ്ദേശ്യമില്ല. വിമര്‍ശിക്കുന്ന കമന്റൊക്കെ ഡിലീറ്റു ചെയ്യാനാണെങ്കില്‍ എന്റെ ബ്ലോഗില്‍ അധികം കമന്റുണ്ടാവില്ല.
കിനാവിന്റെ വികാരം ഞാന്‍ മനസ്സിലാക്കുന്നു. കമന്റിനു വളരെ നന്ദി.
കിനാവ് | 24-Feb-08 at 4:26 pm | Permalink
🙂