ഉദ്ദണ്ഡശാസ്ത്രികളുടെ ശ്ലോകങ്ങള്‍ ഉള്‍ക്കൊള്ളിച്ചുകൊണ്ടു് അന്ത അഹന്തയ്ക്കു് ഇന്ത പോസ്റ്റ് എന്ന പോസ്റ്റെഴുതിയപ്പോള്‍ ഈ ശ്ലോകം ഓര്‍മ്മ വന്നില്ല. അവിടെ അതു വളരെ യോജിക്കുമായിരുന്നു. “കേരളത്തിലെ അമ്പതു ഭാവങ്ങള്‍, ഭാവം 37: കഞ്ഞി” എന്നു കാച്ചാമായിരുന്നു. പോയ ബുദ്ധി ആന പിടിച്ചാല്‍ കിട്ടുമോ? 🙂
ഉദ്ദണ്ഡശാസ്ത്രികള്‍ കഞ്ഞിയെപ്പറ്റി എഴുതിയ ശ്ലോകമാണു് ഇതു്. കഞ്ഞി ഒരു സുന്ദരിയെപ്പോലെയാണന്നാണു് “പ്രൌഢസ്ത്രീരസിക”നായ ഉദ്ദണ്ഡന്‍ പറയുന്നതു്. ശ്ലേഷം ഉപയോഗിച്ചാണു് ഈ ഉപമ ഉണ്ടാക്കുന്നതു്.
ശ്ലോകം:
അംഗജതാപനിഹന്ത്രീ
സുരുചിരലാവണ്യസമ്പദാ മധുരാ
അധരാമൃതോപദംശാ
ശ്രാണാ ശോണാധരീവ രമണീയാ
അര്‍ത്ഥം:
| അംഗ-ജ-താപ-നിഹന്ത്രീ | : | ശരീരത്തില്‍ ഉണ്ടാവുന്ന ചൂടു് ഇല്ലാതാക്കുന്നതും (സുന്ദരി അംഗജന്‍ (കാമദേവന്‍) മൂലമുള്ള ദുഃഖം ഇല്ലാതാക്കുന്നു. താപം = ചൂടു്, ദുഃഖം.) |
| സുരുചിരലാവണ്യസമ്പദാ | : | നല്ല രുചിയുള്ള ഉപ്പു ചേര്‍ന്നതും (ലാവണ്യം = ലവണത്വം = ഉപ്പു്. സുന്ദരിയെപ്പറ്റി പറയുമ്പോള്‍ സൌന്ദര്യം എന്നര്‍ത്ഥം. ലാവണ്യം എന്ന വാക്കിനു രണ്ടര്‍ത്ഥവും ഉണ്ടു്.) |
| മധുരാ | : | രുചിയുള്ളതും (മാധുര്യമുള്ളവളും) |
| അധര-അമൃത-ഉപദംശാ | : | ചുണ്ടിനു് അമൃതായ തൊട്ടുകൂട്ടാന്‍ (ചുട്ട പപ്പടം, അച്ചാര്‍, അസ്ത്രം തുടങ്ങിയവ) ഉള്ളതും (ചുണ്ടിനു് അമൃതു നല്‍കിക്കൊണ്ടു് മെല്ലെ കടിക്കുന്നവള്‍ എന്നു് സുന്ദരിയ്ക്കു് അര്‍ത്ഥം) |
| ശ്രാണാ | : | (ആയ) കഞ്ഞി |
| ശോണാധരീ ഇവ | : | ചുവന്ന ചുണ്ടുള്ള സുന്ദരിയെപ്പോലെ |
| രമണീയാ | : | ആനന്ദദായിനിയാണു്. |
ശരീരത്തിലുള്ള ചൂടു കുറയ്ക്കാന്‍ കഞ്ഞി വളരെ നല്ലതാണത്രേ. അതുകൊണ്ടാണല്ലോ പനിയുള്ളവര്‍ക്കു കഞ്ഞി കൊടുക്കുന്നതു്. ചൂടുള്ള ദിവസം കുടിക്കാന്‍ ഏറ്റവും നല്ലതു കഞ്ഞിയാണെന്നും പറഞ്ഞുകേട്ടിട്ടുണ്ടു്.
ഇനി ഉദ്ദണ്ഡന്‍ പെണ്ണുങ്ങളെ “കഞ്ഞി” എന്നു വിളിച്ചെന്നും അതിനു ഞാന്‍ അര്‍ത്ഥമെഴുതിയെന്നും ഒക്കെ പറഞ്ഞു സ്ത്രീവിമോചന-വനിതാലോകക്കാര്‍ ബഹളം ഉണ്ടാക്കാതിരുന്നാല്‍ മതിയായിരുന്നു 🙂
പ്രചോദനം: കഞ്ഞിവെള്ളത്തെപ്പറ്റി ഡാലി ഇട്ട “ഒഴക്ക് കഞ്ഞെര്‍ള്ളം” എന്ന ജീ‌ടോക്ക് സ്റ്റാറ്റസ് മെസ്സേജ്.
അനോണി ആന്റണി | 01-Jun-08 at 8:23 pm | Permalink
കഞ്ഞി കുടിച്ചിട്ട് തന്നെ ഒരേ എളക്കം. ഉദ്ദണ്ഡണ്ണന്‍ കള്ളും ബീഫ് ഫ്രൈയും കഴിച്ചിട്ടാണെങ്കില്‍??.
പലായദ്ധ്വം തോമസുകുട്ടീ, പലായദ്ധ്വം
ആന്റണിയേ,
ഇവിടെ 353 മുതല്‍ 367 വരെയുള്ള 13 ശ്ലോകങ്ങള്‍ നോക്കൂ. (369-ഉം ഈ വര്‍ഗ്ഗത്തില്‍ പെടുന്നതാണു്.) തണ്ണിയടിച്ചതിനു ശേഷം മഹാന്മാര്‍ എഴുതിയ ശ്ലോകങ്ങള്‍ കാണാം.
Jayarajan | 01-Jun-08 at 8:47 pm | Permalink
ഛെ! അനോണിച്ചേട്ടന്‍ പറ്റിച്ചു കളഞ്ഞു. ഞാന്‍ ഒരു തേങ്ങ ഉടയ്ക്കാന്‍ വന്നതായിരുന്നു. കഞ്ഞിയെങ്കില്‍ കഞ്ഞി; അതും കുടിച്ച്‌ മടങ്ങാം 🙂
ലക്ഷ്മി | 03-Jun-08 at 12:47 pm | Permalink
എനിക്കീ ദ്വയാര്‍ത്ഥം നന്നേ ഇഷ്ടപ്പെട്ടു
rishi | 04-Jun-08 at 5:23 am | Permalink
ഉമേഷ്,
വളരെ വളരെ നന്ദിയുണ്ട്. നാലു വരി എഴുതാനുള്ള സ്ഥിതിയുണ്ടാവാന്‍ കാരണം ഉമേഷിന്റെ അകമഴിഞ്ഞ സഹായങ്ങളാണ്. അതിന് ഒരു വഴികാട്ടി യാഹൂ ഗ്രൂപ്പിലെ നമ്മുടെ അക്ഷരശ്ലോക സദസ്സു തന്നെയെന്നതില്‍ ഒരു സംശയവും ഇല്ല.
സമയം കിട്ടുമ്പോള്‍ എന്റെ ബ്ലോഗില്‍ കയറി തിരുത്തലുകള്‍ ആവശ്യമുണ്ടെങ്കില്‍ നേരെയാക്കിത്തരാന്‍ അപേക്ഷ.
വെള്ളെഴുത്ത് | 05-Jun-08 at 1:59 pm | Permalink
“ഉണങ്ങിക്കരിഞ്ഞ ഇലവുമരത്തില്‍ വല്ലതുമുണ്ടോ? എന്നാലുണ്ടാക്കുക തന്നെ. ഉപമയെന്നും വിരോധാഭാസമെന്നും രണ്ടലങ്കാരമുണ്ടല്ലോ. ഇല്ലാത്ത ഔപമ്യവും വിരോധവും ഉണ്ടാക്കിത്തീര്‍ക്കാന്‍ ശ്ലേഷവുമുണ്ട്. പിന്നെന്തിനാണു പഞ്ഞം? ശാല്മലീവൃക്ഷം പാണ്ഡവസേനയെപോലിരിക്കുന്നു,കാന്താമുഖം പോലിരിക്കുന്നു, ആനയെപ്പോലെ, പൂനയെപ്പോലെ എന്നെല്ലാം കെട്ടിച്ചമയ്ക്കുകതന്നെ. ഏകശബ്ദവാസിത്വം കൊണ്ടുമാത്രം രണ്ടു വസ്തുക്കള്‍ക്കു തമ്മില്‍ സാദൃശ്യമോ വിരോധമോ ഉണ്ടെന്നു നടിക്കുന്നത് കേവലം ബാലിശത്വമല്ലയോ?”
-കാദംബരിയുടെ തുടക്കത്തിലുള്ള ശുഷ്കശാല്‌മലീവൃക്ഷവര്‍ണ്ണനയെപ്പറ്റി ഏ ആര്‍ രാരരാജവര്‍മ്മ സാഹിത്യസാഹ്യത്തിലെ ‘വര്‍ണ്ണന’ത്തില്‍.
ഇത്തരം സംഭവമൊക്കെ സാഹിത്യവിനോദങ്ങളുടെ കൂടെയാണു്, കവിതയായല്ല, കൂട്ടേണ്ടതു് എന്നാണു് എന്റെ അഭിപ്രായം.
കേരളപാണിനി എന്നെ പലപ്പോഴും അദ്ഭുതപ്പെടുത്തിയിട്ടുണ്ടു്. സമകാലത്തില്‍ നിന്നും വളരെ മുന്നോ‍ട്ടു പോയ പ്രതിഭാധനനായിരുന്നു അദ്ദേഹം.