കൊച്ചു കുട്ടികളെ നിരീക്ഷിക്കാൻ വളരെ താത്പര്യമുള്ള ഞാൻ ഒരിക്കൽ ഇങ്ങനെ എഴുതി:
സംസാരിക്കാന്‍ തുടങ്ങിയ കാലം മുതല്‍ വായിക്കാന്‍ തുടങ്ങുന്ന കാലം വരെയാണു് കുട്ടികള്‍ സ്വയം നന്നായി പഠിക്കുന്നതെന്നു തോന്നിയിട്ടുണ്ടു്. ഈ പ്രായത്തിലുള്ള കുട്ടികളോടു സംസാരിക്കാനും അവരുടെ ചെയ്തികള്‍ നോക്കിനില്‍ക്കാനും എന്തൊരു രസമാണു്! എന്തു സംശയങ്ങളാണു് അവര്‍ക്കു്? എത്ര ലോജിക്കലായി ആണു് അവര്‍ ചിന്തിക്കുന്നതു്? (Calvin and Hobbes എന്ന കാര്‍ട്ടൂണ്‍ സ്ട്രിപ്പ് ഇഷ്ടമുള്ളവര്‍ക്കു ഞാന്‍ ഉദ്ദേശിക്കുന്നതെന്താണെന്നു മനസ്സിലാകും.) ചോദിക്കാന്‍ അവര്‍ക്കു ലജ്ജയുമില്ല, അറിയേണ്ടതു് എങ്ങനെയെങ്കിലും മനസ്സിലാക്കുകയും ചെയ്യും.
വായിക്കാറാവുമ്പോള്‍ പുസ്തകത്തിലെ അറിവു് അവന്റെ പ്രകൃത്യാ ഉള്ള കഴിവിനെ കെടുത്തിക്കളഞ്ഞു് മറ്റാരുടെയോ അറിവിനെ സ്പൂണ്‍‌ഫീഡ് ചെയ്യുന്നു. സ്കൂള്‍ വിദ്യാഭാസവും മുതിര്‍ന്നവരോടുള്ള ഇടപെടലും അവന്റെ ചോദ്യം ചെയ്യാനുള്ള താത്‌പര്യത്തെ നശിപ്പിച്ചുകളയുന്നു. ഉത്തരം മുട്ടുമ്പോള്‍ മുതിര്‍ന്നവര്‍ കൊഞ്ഞനം കുത്തുകയും “ഇവനിതെന്തൊരു ചെറുക്കന്‍! എന്റെയൊന്നും ചെറുപ്പത്തില്‍ ഇമ്മാതിരി ചോദ്യമൊന്നും ചോദിക്കില്ലായിരുന്നല്ലോ, പ്രായമായവര്‍ പറയുന്നതു് അങ്ങു വിശ്വസിക്കും. അതാണു വേണ്ടതു്.” എന്നു പറയുകയും ചെയ്യും.
ഇതിനോടു സാമ്യമുള്ള ഒരു പ്രസ്താവന ഈയിടെ ഒരു വലിയ മനുഷ്യൻ പറഞ്ഞതു കേൾക്കാനിടയായി. ചിൽഡ്രൻസ് സയൻസ് കോൺഗ്രസ് ഉദ്ഘാടനം ചെയ്തു കൊണ്ടു്‌, നോബൽ സമ്മാനാർഹനായ ശാസ്ത്രജ്ഞൻ വെങ്കട്ടരാമൻ രാമകൃഷ്ണൻ പറഞ്ഞു:
“We are all born scientists and we stop being scientists as we grow up. Children are curious about plants, insects, blue sky, red sun. The parents, not knowing the answers, just say: Go away.”
“As we grow old, we just take the blue sky for granted, and we stop questioning.”
സെലിബ്രിറ്റികളെ ഉണ്ടാക്കുന്നതിൽ അദ്ദേഹം പണ്ടേ അസഹിഷ്ണുത കാണിച്ചിട്ടുണ്ടു്‌. വിദ്യാർത്ഥികൾക്കു്‌ എന്തു സന്ദേശമാണു കൊടുക്കാനുള്ളതു്‌ എന്ന ചോദ്യത്തിനു്‌ അദ്ദേഹം ഒരിക്കൽ പറഞ്ഞു: “അതു്‌ എന്നോടു ചോദിക്കേണ്ട ചോദ്യമല്ല. ഞാൻ ഒരു വിദ്യാഭ്യാസവിചക്ഷണനല്ല. എന്നോടു സയൻസ് വല്ലതും ചോദിക്കൂ. അതാണു്‌ എനിക്കറിയാവുന്ന വിഷയം.”
കൊട്ടും കുരവയോടും കൂടെ തന്നെയും സഹപ്രവർത്തകൻ തോമസ് സ്റ്റെയിറ്റ്സിനെയും ഒരു സംഘം ആളുകൾ പതിനഞ്ചു മിനിറ്റു നേരത്തേയ്ക്കു “സ്വീകരിച്ച”പ്പോൾ അദ്ദേഹം പറഞ്ഞു:
“Scientists are not movie stars or politicians who will feel insulted if they are not showered with accolades. Scientists are not interested in accolades”
ഈ വാർത്തയിൽത്തന്നെയുള്ള അദ്ദേഹത്തിന്റെ മറ്റു ചില പ്രസ്താവനകളും ഉദ്ധരിക്കട്ടേ:
-
“Science is curiosity, testing and experimenting.”
-
“Science is an international enterprise where discoveries in one part of the world are useful in other parts. The traffic should be both ways, and at present the flow from the West to India is more.”
-
“I’ve been honest with you. You are free to disagree. That’s science.”
ഭാരതത്തിലെ ശാസ്ത്രജ്ഞർക്കു്‌ (ന്യൂ ഏജ് ആയാലും ഓൾഡ് ഏജ് ആയാലും, റോക്കറ്റ് വിട്ടു ശാസ്ത്രജ്ഞരായവരും ശാസ്ത്രം നന്നാവാൻ തുലാഭാരം തൂങ്ങുന്നവരും ഒക്കെ) ഒരു മാതൃകയാവട്ടേ ഇദ്ദേഹം!
സൂരജ് | 05-Jan-11 at 5:10 pm | Permalink
“Science is curiosity, testing and experimenting…”
Simplest… but the strongest idea in the world !
Anoop | 05-Jan-11 at 5:55 pm | Permalink
മുൻപ് ശാസ്ത്രസാഹിത്യ പരിഷത്തും പറഞ്ഞതിതൊക്കെ തന്നെയല്ലെ? ഈ ഒരു കാഴ്ചപ്പാടില്ലാതെയാവുമ്പോഴാണ്‌ scientist as a career / profession ഉണ്ടാവുന്നത്.. തുലാഭാരം നടത്തി റോക്കറ്റ് വിടുന്നതും..
യാത്രാമൊഴി | 06-Jan-11 at 1:22 am | Permalink
വിജയശ്രീലാളിതനായി വരുന്ന രാജാക്കന്മാരെയും തമ്പുരാക്കന്മാരെയും ഒക്കെ സ്വീകരിക്കാന് വേണ്ടി ഉണ്ടാക്കിയ ഫ്യൂഡല് പരിപാടി അല്ലേ ഈ കൊട്ടും കുരവയും ഒക്കെ.?
അനൂപ്, കരിയര് സയന്റിസ്റ്റുകളില് തന്നെ ഈ കാഴ്ച്ചപ്പാടുള്ളവര് ഉണ്ട്. ഇല്ലെന്നു ധരിക്കുന്നത് അബദ്ധമാണു കേട്ടോ.
തുലാഭാരസയന്റിസ്റ്റുകളുടെ കാര്യം ശരിയായിരിക്കും.
Devadas VM | 06-Jan-11 at 2:23 am | Permalink
അതന്നേ… “ദൈവം പകിട കളിക്കാറില്ല” എന്ന ഐന്‍സ്റ്റീന്‍ വാചകം പോലും എടുത്ത് മിസ്‌‌ക്വാട്ട് ചെയ്ത് “എന്നാ പിന്നെ പന്നിമലത്തായിരിക്കും കളിക്കുന്നത്” എന്ന്‍ തെറ്റിധരിപ്പിക്കുന്നവരുടെ ഇടയിലേക്ക് ഇറങ്ങി ചെല്ലേണ്ട വാക്കുകള്‍.
vipin | 06-Jan-11 at 5:43 am | Permalink
മ്മടെ റോക്കറ്റ് ശാസ്ത്രജ്ഞന്മാര്‍ സ്ഥാനമാനങ്ങള്‍ കിട്ടുമ്പോള്‍ നേരെ ഓടുന്നത് ഗുരുവായൂരില്‍ തുലാഭാരം നടത്താനാണ് !!!
Kalavallabhan | 06-Jan-11 at 7:45 am | Permalink
“We are all born scientists ”
അദ്ദേഹത്തിന്റെ ഈ വരികൾ “ഹിന്ദു” വിൽ വായിച്ചിരുന്നു.
ആത്മാർത്ഥമായ അറിയണമെന്നുള്ള ആഗ്രഹം ആ പ്രായത്തിൽ മാത്രമാണുള്ളത്.
വനവാസി. | 06-Jan-11 at 8:02 am | Permalink
ഉചിതമായി ഈ കുറിപ്പ്.
ശാസ്ത്രാവബോധം ശാസ്ത്രജ്ഞര്‍ തന്നെ ഉപേക്ഷിക്കുന്ന കാലം.
കാൽ‌വിൻ | 06-Jan-11 at 12:44 pm | Permalink
കാലോചിതം…..
Jack Rabbit | 06-Jan-11 at 4:43 pm | Permalink
ഇപ്പോള്‍ ബൂലോകത്തെ എറ്റവും വലിയ ശാസ്ത്രഅജ്ഞന്റെ വര്‍ത്തമാനങ്ങള്‍ ഇവിടെ വായിക്കാം
/JR
Alex | 08-Jan-11 at 1:23 pm | Permalink
ശ്രീ ഉമേഷ്,
യഥാര്‍ത്ഥത്തില്‍ താങ്കള്‍ എന്താണ് ഉദ്ദേശിക്കുന്നതെന്ന് മനസ്സിലാകുന്നേയില്ല. വെങ്കട്ടരാമൻ രാമകൃഷ്ണൻ പറഞ്ഞത് ശാസ്ത്രജ്ഞർ അഭിനന്ദനങ്ങളുടെ പൂച്ചെണ്ടുകള്‍ ആഗ്രഹിച്ചു ജോലി ചെയ്യുന്നവരാകരുത് എന്നാണു. താങ്കള്‍ പറയുന്നു ഭാരതത്തിലെ ശാസ്ത്രജ്ഞർ അദ്ദേഹത്തെ കണ്ടു പഠിക്കണമെന്ന്. അതിനര്‍ത്ഥം ഇവിടുത്തെ കമ്പ്ലീറ്റ് ശാസ്ത്രജ്ഞരും കയ്യടിക്കു വേണ്ടി പണിയെടുക്കുന്നവര്‍ ആണെന്നാണോ. വിജയങ്ങളുടെ ക്രെഡിറ്റ്‌ മുഴുവന്‍ സഹപ്രവര്‍ത്തകര്‍ക്ക് വിട്ടുകൊടുത്തു പരാജയങ്ങളുടെ വിമര്‍ശന ശരങ്ങള്‍ സ്വയം ഏറ്റുവാങ്ങി ഭാരതത്തിനു വേണ്ടി ജീവിച്ചു മരിച്ച വിക്രം സാരാഭായിയെ പോലുള്ളവര്‍ ഭാരതീയര്‍ക്കെന്നല്ല ലോകത്തിനു മുഴുവന്‍ ജ്വലിക്കുന്ന മാതൃകയല്ലേ ഉമേഷ്?
എന്നിട്ട് താങ്കള്‍ പറയുന്നു തുലാഭാരം തൂങ്ങുന്നവര്‍ രാമകൃഷ്ണനെ കണ്ടു പഠിക്കണമെന്ന്. ഇത് രണ്ടും തമ്മില്‍ എന്ത് ബന്ധമാണ് ഉള്ളത് ഉമേഷ്. അത് ഒരാളുടെ സ്വകാര്യ വിശ്വാസം അല്ലെ. അയാള്‍ തുലാഭാരം നടത്തുകയോ മെഴുകുതിരി കത്തിക്കുകയോ തലകുത്തി നില്‍ക്കുകയോ ചെയ്തോട്ടെ. How does it really matter? ഇത് ചെയ്യുന്നു എന്നതുകൊണ്ട്‌ അയാള്‍ പ്രശസ്തിക്കു വേണ്ടി ജീവിക്കുന്ന ഒരാളാണെന്ന നിഗമനത്തില്‍ എന്ത് അടിസ്ഥാനത്തിലാണ് താങ്കള്‍ എന്തുന്നത്?
chithrakaran | 08-Jan-11 at 5:57 pm | Permalink
തുലാഭാരം നടത്താനും പൂമൂടാനും നടക്കുന്ന റ്റൈപ്പ് ശാസ്ത്രജ്ഞരെ
വല്ല സര്‍ക്കാരോഫീസിലും ചായ കൊണ്ടുവരാനോ, പേപ്പറു പറന്നു പോയാല്‍ പിടിക്കാനുള്ള ജോലി ഏല്‍പ്പിക്കാനോ,അംബലത്തില്‍ നിന്നും പ്രസാദം കൊണ്ടു വരാനോ,വഴിപാടുകള്‍ കഴിപ്പിക്കാനോ ഉള്ള ജോലികള്‍ നല്‍കുകയോ, കുറച്ചു കുനിഷ്ടു കുന്നായ്മ,ഏഷണി തുടങ്ങിയ
ഉത്തരവാദിത്തങ്ങള്‍ നല്‍കി….പുനപ്രതിഷ്ഠിച്ച് ശാസ്ത്ര ലോകത്തെ രക്ഷിക്കുകയാണു വേണ്ടത്. ശാസ്ത്രം സൈന്യം രാഷ്ട്രീയം തുടങ്ങിയ മേഖലകളില്‍ സീനിയോറിറ്റി നോക്കി പേപ്പര്‍ വെയ്റ്റിനെ മേധാവിയാകുംബോള്‍ രാജ്യമാണ് ജീര്‍ണ്ണിക്കുക. സ്വന്തം ബുദ്ധിതന്നെ സത്യസന്ധതയോടെ പ്രവര്‍ത്തിപ്പിക്കാനാകാത്ത (വിഢിദൈവ) വിശ്വാസിയെ ശാസ്ത്രത്തിന്റെ ചുമതല ഏല്‍പ്പിക്കുന്നത് ആത്മഹത്യാപരമാണ്.
ചിന്തയും പ്രവര്‍ത്തിയും വസ്തുനിഷ്ടമായാല്‍ പിന്നെ താന്ത്രികമായ കോപ്രായങ്ങള്‍ക്കാണ് എന്ത് പ്രസക്തിയുള്ളത്.കാട്ടിക്കൂട്ടലുകളൊക്കെ കൃത്രിമ സാധനങ്ങള്‍ ഒറിജിനലാണെന്ന് തോന്നിപ്പിക്കാനാണ്.
ഒറിജിനലിന് ബേജാറുകളില്ല.
ആര്യന്‍ | 14-Jan-11 at 11:31 am | Permalink
“റോക്കറ്റ് വിട്ടു ശാസ്ത്രജ്ഞരായവരും” എന്ന പ്രയോഗം കലക്കി. മേലോട്ട് വിട്ടാല്‍ താഴോട്ട് പോകുന്ന റോക്കറ്റ് ഉണ്ടാക്കിയവരെ ഒക്കെ പിടിച്ച് തലപ്പത്തിരുത്തിയാല്‍ രാജ്യത്തിന്‍റെ ഗതി എങ്ങനെ അധോഗതി ആകാതെ ഇരിക്കും! ഇത് തന്നെ സഖാവ് വി. എസ്. എല്ലാവര്‍ക്കും മനസ്സിലാകുന്ന (അല്പം ഗ്രാമ്യമെന്നു തോന്നാവുന്ന) ഭാഷയില്‍ പറഞ്ഞപ്പോള്‍ എല്ലാവരും ചാടിക്കടിക്കാന്‍ അല്ലായിരുന്നോ ഭാവം … ഓരോരോ വേഷം കെട്ടലുകളേയ്‍.
njjoju | 23-Feb-11 at 2:18 pm | Permalink
“ഭാരതത്തിലെ ശാസ്ത്രജ്ഞർക്കു്‌ (ന്യൂ ഏജ് ആയാലും ഓൾഡ് ഏജ് ആയാലും, റോക്കറ്റ് വിട്ടു ശാസ്ത്രജ്ഞരായവരും ശാസ്ത്രം നന്നാവാൻ തുലാഭാരം തൂങ്ങുന്നവരും ഒക്കെ)” – ഇതിലെ പൊളിറ്റിക്സിനോടൊഴികെ ബാക്കിയുള്ളതിനോടു യോജിപ്പ്