ജ്യോതിര്‍മയിയുടെ ബ്ലോഗിലെ പുപ്പുലിക്കളി (കിം ലേഖനം) എന്ന വാഗ്‌ജ്യോതി പോസ്റ്റിനു കമന്റായി ഇട്ട ശ്ലോകം. പതിനഞ്ചു മിനിട്ടു കൊണ്ടെഴുതിയതാണെങ്കിലും (എഴുതിയതു് എന്നതു ശരിയല്ല, ടൈപ്പുചെയ്തതു് എന്നതു ശരി) പിന്നീടു വായിച്ചപ്പോള്‍ അതു കൂടുതല്‍ രസകരമായിത്തോന്നി. അതിനാല്‍ ഇവിടെയും ഇടുന്നു.
ബ്ലോഗാറില്ല, കമന്റുവാന്‍ കഴികയി, ല്ലേവൂര്‍ജി തന്‍ സര്‍വറില്‍
പോകാറി, ല്ലൊരു തേങ്ങയില്ലെറിയുവാ, നാര്‍മ്മാദമില്ലൊട്ടുമേ,
ഹാ, കഷ്ടം! “ഹിഹി”, സ്മൈലി തൊട്ട ചിരിയി, ല്ലോഫില്ല-പിന്നെന്തരോ
ആകട്ടേ, ഗഡി, പോസ്റ്റുവായനയെ നിര്‍ത്തീടൊല്ല, ശുട്ടീടുവേന്‍!
(കമന്റിട്ടപ്പോള്‍ “തേങ്ങയില്ലുടയുവാന്‍…” എന്നും “ശുട്ടീടുവന്‍” എന്നുമായിരുന്നു.)
ആരെങ്കിലും ഈ ബൂലോഗം എന്താണെന്നറിയാന്‍ ആദ്യമായി എന്റെ ബ്ലോഗിലെങ്ങാനും എത്തി അന്ധാളിച്ചു നില്‍ക്കുകയാണെങ്കില്‍ അവര്‍ക്കു വേണ്ടി ഒരു വ്യാഖ്യാനവും താഴെ:
- ബ്ലോഗാറില്ല: ബ്ലോഗുക എന്നു വെച്ചാല്‍ ബ്ലോഗ് എഴുതുക എന്നര്‍ത്ഥം. To blog.
- കമന്റുക: കമന്റു ടൈപ്പു ചെയ്യുക. To comment.
- ഏവൂര്ജി: ബൂലോഗത്തില്‍ ആളുകളെ ഏട്ടന്‍, ചേട്ടന്‍, ജി, മാഷ്, സാര്‍, ഗുരു, ലഘു എന്നൊക്കെ വിളിച്ചാല്‍ വിളിക്കുന്ന ആളുകള്‍ക്കു പ്രായം കുറവാണെന്നു തോന്നും എന്നൊരു മിഥ്യാധാരണയുണ്ടു്. പാപ്പാനെ ഒഴികെ ആരെയും “ജി” എന്നു വിളിക്കാം. പാപ്പാനെ “പാപ്പാന്‍‌ജി” എന്നു വിളിച്ചാല്‍ (വരമൊഴിയില്‍ ഇടയിലൊരു _ ഇട്ടില്ലെങ്കില്‍ “പാപ്പാഞി” ആയിപ്പോകും എന്നു വേറൊരു കുഴപ്പം) ആനയെക്കൊണ്ടു ചവിട്ടിക്കും എന്നു കേള്‍ക്കുന്നു. ഒരേ പ്രായമുള്ളവരെ “ഗഡി” എന്നു വിളിക്കണം. പ്രായം കുറവായവരെ “ഉണ്ണി” എന്നോ “കുട്ടി” എന്നോ (കുട്ടി എന്നു സമപ്രായക്കാരെയും വിളിക്കാം എന്നും ഒരു മതമുണ്ടു്.) “ഊട്ടി” (as in ബിന്ദൂട്ടി) എന്നോ വെറും പേരോ വിളിക്കാം. അചിന്ത്യയ്ക്കു മാത്രം ആരെയും എന്തും വിളിക്കാം.
ഇവിടെ സ്മര്യപുരുഷന്‍ ഏവൂരാന്‍ ആണു്. അദ്ദേഹം തനിമലയാളത്തിനും മറ്റും ചെയ്യുന്ന സംഭാവനകളെ ആദരിക്കാന്‍ ഏവൂര്ജി എന്നു വിളിക്കുന്നു. ഏവൂരാന്‍‌ജി എന്നും (അണ്ടര്‍സ്കോര്‍ മറക്കരുതു്) വിളിക്കാം. പാപ്പാനെപ്പോലെ വയലന്റല്ല ഈ ജി.
- സര്‍വര്‍: ഏവൂരാന്റെ തനിമലയാളം സര്‍വര്‍. ഇവിടെച്ചെന്നാല്‍ പുതിയ പോസ്റ്റുകളുടെ ലിസ്റ്റു കാണാം.
അവിടെ പരസ്യങ്ങള്‍ മൂലം കാലതാമസമുള്ളതിനാല്‍ പോകില്ല എന്നും പകരം പോളിന്റെ സര്‍വറിലാണു പോകുന്നതെന്നും ഇതിനെ ആരെങ്കിലും ദുര്‍വ്യാഖ്യാനം ചെയ്താല്‍ കവി ഉത്തരവാദിയല്ല.
- തേങ്ങ: Coconut. പോസ്റ്റു വായിക്കാന്‍ സമയമില്ലെങ്കില്‍ തേങ്ങയടിക്കാം പിന്നെ വായിച്ചില്ലെങ്കിലും കുഴപ്പമില്ല എന്നു കണ്ടുപിടിച്ചതു അഗ്രജനും സുല്ലുമാണു്. ഒരു തേങ്ങാക്കാരന്‍ മറ്റൊരു തേങ്ങാക്കാരന്റെ തെങ്ങിന്‍തോപ്പില്‍ പോയി തേങ്ങയടിച്ചതിന്റെ ഉദാഹരണം ഇവിടെ.
- ആര്‍മ്മാദം: ഇതിന്റെ അര്ത്ഥം മലയാളം എമ്മേ (എന്റമ്മേ!) പാസ്സായ സിജിയ്ക്കു പോലും അറിയില്ല (അലങ്കാരം അര്‍ത്ഥാപത്തി). ഏതോ സിനിമയില്‍ ഇന്നസെന്റു പറയുന്നു എന്നു സൂ പറയുന്നു. ഏതായാലും ബൂലോഗത്തില്‍ ആദിത്യനും ദില്‍ബാസുരനുമൊക്കെ സ്ഥാനത്തും അസ്ഥാനത്തും ഇതെടുത്തു പൂശാറുണ്ടു്. ബൂലോഗക്ലബ്ബിന്റെ പ്രഖ്യാപിതലക്ഷ്യവാക്യത്തിലും ഇതുണ്ടു്. “അടിച്ചു പൊളിക്കുക” എന്നര്‍ത്ഥം. ഇതൊരു തൃശ്ശൂര്‍ സ്ലാങ്ങാണെന്നാണു് ഏറ്റവും ഒടുവില്‍ കിട്ടിയ അറിവു്.
- ഹാ, കഷ്ടം: വൃത്തത്തിനും പ്രാസത്തിനും വേണ്ടി തിരുകിക്കയറ്റിയതു്. ഇങ്ങനെയുള്ള ഒരാളിന്റെ സ്ഥിതിയെപ്പറ്റി ഓര്‍ക്കുമ്പോള്‍ ഇങ്ങനെ പറഞ്ഞുപോകും എന്നു് ആരെങ്കിലും വ്യാഖ്യാനിക്കാന്‍ സാദ്ധ്യതയുണ്ടു്.
- ഹി ഹി: ബൂലോഗത്തില്‍ ചിരിക്കേണ്ടതു് ഇങ്ങനെയാണു് എന്നു കണ്ടു പിടിച്ചതു ജ്യോതിയാണു്. പെരിങ്ങോടനു മാത്രം “ഹാ ഹാ” എന്നു ചിരിക്കാം. അട്ട എന്ന ജീവി ഹസിക്കുന്നതും അങ്ങനെ തന്നെ.
- സ്മൈലി: “വായിച്ചു, കൂടുതലൊന്നും പറയാനില്ല” എന്ന അര്‍ത്ഥത്തില്‍ കമന്റിലിടുന്ന സാധനം. ഏറ്റവും കൂടുതല്‍ കമന്റുകളില്‍ ഇതിട്ടതു സൂ ആണു്.
അങ്ങനെയല്ലാതെ പുട്ടിനിടയില്‍ തേങ്ങാപ്പീര ഇടുന്നതുപൊലെയും ഇതു് ഇടാം. “തല്ലണ്ടാ, വിരട്ടി വിട്ടാല്‍ മതി…” എന്നര്‍ത്ഥം. (കട: പതാലി) അങ്ങനെ ഇതു് ഏറ്റവും കൂടുതല്‍ ഇട്ടിട്ടുള്ളതു വക്കാരി.
- ഓഫ്: ഓഫ്‌ടോപ്പിക്കിന്റെ ചുരുക്കരൂപം. “ഓ. ടോ.” (ഓട്ടോ അല്ല), “ഓ. പൂ.” (ഓണത്തിനിടയ്ക്കു പൂട്ടുകച്ചവടം) എന്നൊക്കെ പറയും. ആദിത്യന്‍, ഇഞ്ചിപ്പെണ്ണു്, ബിന്ദു തുടങ്ങിയവര്‍ പുനരുജ്ജീവിപ്പിച്ച പ്രാചീനകല. ഇതിനൊരു യൂണിയനും ഉണ്ടു്. പ്രെസിഡണ്ട് ദില്‍ബാസുരന്‍. സെക്രട്ടറി ബിന്ദു. കജാഞ്ചി (ഖജാന്‍‌ജി എന്നതിന്റെ ബൂലോഗവാക്കു്) ആദിത്യന്‍. സാങ്കേതികസഹായം ശ്രീജിത്ത്. ശബ്ദം സുല്ല് & അഗ്രജന്‍ (“ഠോ”). വെളിച്ചം ഇത്തിരിവെട്ടം. ഗ്രാഫിക്സ് കുമാര്‍.
“ദില്‍ബാസ്വരന്‍” ലോപിച്ചാണു “ദില്‍ബാസുരന്‍” ആയതു്‌. “ഓഫ് യൂണിയന്‍” എന്നതു സ്വരത്തില്‍ തുടങ്ങുന്നതു കൊണ്ടു്‌ സ്വരത്തില്‍ തുടങ്ങുന്ന പേരുള്ളവരേ പ്രെസിഡന്റാകാവൂ എന്നൊരു കീഴ്‌വഴക്കമുണ്ടായിരുന്നു. (ഇതിനു മുമ്പുള്ള രണ്ടു പ്രെസിഡന്റുകളുടെയും-ഉമേഷ്, ഇടിവാള്‍- പേരു്‌ സ്വരത്തിലായിരുന്നു തുടങ്ങിയിരുന്നതു്‌.) ദില്‍ബനു്‌ പ്രെസിഡന്റാവുകയും വേണം. ഈ ദുഃസ്ഥിതി ഒഴിവാക്കാന്‍ ദില്‍ബനു്‌ “അസ്വരന്‍” എന്ന പേരു കൊടുത്തു. സ്വരമില്ലാത്തവന്‍ എന്നര്‍ത്ഥം. അതു്‌ ആളുകള്‍ വിളിച്ചുവിളിച്ചു്‌ “അസുരന്‍” എന്നായി. ഒരു ഇള്ളാവാവയുടെ മുഖമുള്ള ആ സാധുവിനെ എന്തിനു്‌ അസുരന്‍ എന്നു വിളിക്കുന്നു എന്നു് ആര്‍ക്കെങ്കിലും സംശയമുണ്ടെങ്കില്‍ ഇപ്പോള്‍ തീര്‍ന്നല്ലോ.
ഇതിന്റെ മറ്റൊരു വകഭേദമാണു് നൂറടിക്കുക, ഇരുനൂറടിക്കുക തുടങ്ങിയവ. സന്തോഷും ബിന്ദുവുമാണു് ഇതിനു വിദഗ്ദ്ധര്‍. എത്ര തവണ നൂറടിച്ചാലും തലയുടെ സ്ഥിരതയില്‍ കാര്യമായ മാറ്റം ഇവര്‍ക്കു വരാറില്ല.
- എന്തരോ ആകട്ടേ: രാജമാണിക്യത്തില്‍ നിന്നും ദേവരാഗത്തില്‍ നിന്നും ബൂലോഗം കടം കൊണ്ട ഭാഷ. ഈ ചിന്താഗതിയെ “അരാഷ്ട്രീയത” എന്നു ചന്ത്രക്കാറനും ബെന്നിയും വിളിക്കുന്നു.
- ഗഡി: ബൂലോഗത്തിനു വിശാലമനസ്കന്‍ നല്‍കിയ രണ്ടാമത്തെ മികച്ച സംഭാവന. ഇപ്പോള്‍ ഇതു പബ്ലിക്ക് ഡൊമൈനില്‍. ആദ്യത്തെ സംഭാവന കറന്റ് ബൂക്സിന്റെ പ്രൈവറ്റ് ഡൊമൈനിലും. കൂട്ടുകാരന്‍, കാശിനു കൊള്ളാത്തവന്‍ എന്നൊക്കെ അര്ത്ഥം. സുന്ദരന്‍ എന്ന അര്‍ത്ഥമില്ല. അതിനു “ചുള്ളന്‍” എന്നു പറയണം.
- പോസ്റ്റ്: ബ്ലോഗില്‍ ഒരു സമയത്തു വരുന്ന സാധനം. ഇതിനെന്തിനു പോസ്റ്റ് എന്നു പറയുന്നതെന്നറിയണമെങ്കില്‍ ഉമേഷിന്റെ ബ്ലോഗില്‍ നോക്കിയാല്‍ മതി. അവസാനം എത്തുമ്പോഴേയ്ക്കു് ആദ്യത്തിലുള്ളതു മറന്നുപോകും, വല്ലതും മനസ്സിലായെങ്കില്‍!
- ശുട്ടീടുവേന്‍: ബൂലോഗത്തിനു വക്കാരിയുടെ പല സംഭാവനകളില്‍ ഒന്നു്. തനിമലയാളം ഓടിക്കാന്‍ ഒരു ലിനക്സ് സര്‍വറും നല്ല ഇന്റര്‍നെറ്റ് കണക്‍ഷനും നോക്കി നടന്ന ഏവൂരാന്‍ പല തവണ ആവശ്യപ്പെട്ടിട്ടും ഒരെണ്ണം സെറ്റപ്പ് ചെയ്യാഞ്ഞ ഉമേഷിനെ അതിനു പ്രേരിപ്പിക്കാന്‍ ഏവൂരാന്‍ ഇട്ട പോസ്റ്റില്‍ വക്കാരി ഉമേഷിനെ ഭീഷണിപ്പെടുത്തിയതു്. മണിച്ചിത്രത്താഴു് സിനിമയില്‍ നിന്നു പൊക്കിയതാണെന്നു തോന്നുന്നു.
അര്ത്ഥം:
ബ്ലോഗെഴുതാറില്ല, കമന്റിടുവാന്‍ സമയമില്ല, തനിമലയാളം പേജില്‍ പോകാറുപോലുമില്ല, വായിച്ചില്ലെങ്കിലും പേജു വരെ പോയി ഒരു തേങ്ങായടിക്കുകയും കൂടിയില്ല, വായിച്ചു കമന്റിട്ടു അതിന്റെ ബാക്കി കമന്റിട്ടു നൂറടിച്ചു രസിക്കാറില്ല. ഹാ, കഷ്ടമെന്നേ പറയേണ്ടൂ… ഒരു ചിരി പോലും -“ഹി ഹി” എന്നോ ഒരു സ്മൈലി ഇട്ടോ-ചിരിക്കാറില്ല, ഒരു ഓഫ്‌ടോപ്പിക് കമന്റു പോലും ഇടാറില്ല… എന്തു പറ്റി ഉണ്ണീ നിനക്കു്? എന്തെങ്കിലും ആകട്ടേ, പോസ്റ്റു വായിക്കുന്നതു നീ നിര്‍ത്തരുതു്. നിര്‍ത്തിയാല്‍ കൊന്നുകളയും ഞാന്‍!
[ഞാന്‍ ഓടി പാലത്തില്‍ നിന്നു വെള്ളത്തിലേക്കെടുത്തു ചാടി നീന്തി തുമ്പയിലെത്തി ഒരു റോക്കറ്റിന്റെ മൂട്ടില്‍ പിടിച്ചു ചന്ദ്രനിലേക്കു പോകട്ടേ-പുറകേ ജ്യോതി മാത്രമല്ല, കവിതയില്‍ ഇമ്മാതിരി ഭാഷയും ഇംഗ്ല്ലീഷും ഉപയോഗിച്ചതിനു് അനംഗാരിയും അതിനെ വ്യാഖ്യാനിച്ചതുകൊണ്ടു് അങ്ങനെ പറ്റുന്നതിനു പകരം ഇങ്ങനെ പറ്റിയില്ലേ എന്നു ചോദിച്ചു വക്കാരിയും ഉണ്ടു്!]
ബ്ലോഗുഭാഷയിലെ പദങ്ങളും ഉള്‍ക്കൊള്ളിക്കാന്‍ പറ്റിയില്ല. ശാര്‍ദ്ദൂലവിക്രീഡിതത്തിനു് ഒരു വരിയില്‍ പത്തൊന്‍പതക്ഷരമല്ലേ ഉള്ളൂ.
ഇതുപോലെയുള്ള ബ്ലോഗുഭാഷയിലെഴുതിയ ബ്ലോഗുകവിതകള്‍ കമന്റുകളായി ക്ഷണിച്ചുകൊള്ളുന്നു. ഏറ്റവും നല്ല കവിതയ്ക്കു് ജ്യോതി ഒരു സമ്മാനം കൊടുക്കുമായിരിക്കും. കൊടുത്തില്ലെങ്കില്‍ വക്കാരിയെക്കൊണ്ടു് “ശുട്ടിടുവേന്‍” എന്നു പറയിച്ചു നോക്കാം 🙂
(അടുത്ത തവണ പുഴ.കോമിന്റെ കൊളാഷില്‍ ഇതായിരിക്കും എന്റെ ടിപ്പിക്കല്‍ പോസ്റ്റായി വരുന്നതു്. ആര്‍ക്കറിയാം!)
Umesh::ഉമേഷ് | 16-Jan-07 at 3:07 am | Permalink
ഒരു ബ്ലോഗു ശ്ലോകം. ബ്ലോഗിലെ നവാഗതര്‍ക്കായി കുറേ വിവരങ്ങളും ലിങ്കുകളും ഉള്‍ക്കൊള്ളിച്ചിട്ടുണ്ടു്.
എന്റെ വീട്ടുപടിയില്‍ തേങ്ങാ ഞാന്‍ തന്നെ അടിച്ചോളാം. ഠോ!
ബിന്ദു. | 16-Jan-07 at 3:16 am | Permalink
എനിക്കു തലയ്ക്കു സ്ഥിരത ഉണ്ടെന്നു സമ്മതിച്ചതുകൊണ്ട് ഈ പോസ്റ്റ് ഉഗ്രന്‍.:) വേഗം വന്നൊരു തേങ്ങ ഉടച്ചതാ. ശ്ലോകം പിന്നെ.
ദിവാസ്വപ്നം | 16-Jan-07 at 3:16 am | Permalink
ഹ ഹ ഹ
:))
ഇത്തിരിവെട്ടം | 16-Jan-07 at 3:17 am | Permalink
ഇത് സംഭവം കലക്കി.
ഒരു തേങ്ങ എന്റെ വക കൂടി…
ഓടി പാലത്തില്‍ നിന്നു വെള്ളത്തിലേക്കെടുത്തു ചാടി നീന്തി തുമ്പയിലെത്തി ഒരു റോക്കറ്റിന്റെ മൂട്ടില്‍ പിടിച്ചു ചന്ദ്രനിലേക്കു പോയ ഉമേഷേട്ടന്റെ തൊട്ട് മുമ്പില്‍ ഞാനും ഓടിയിരിക്കുന്നു.
വല്യമ്മായി | 16-Jan-07 at 3:30 am | Permalink
🙂
Su | 16-Jan-07 at 3:37 am | Permalink
ഹി 🙂 ഹി 🙂 ഹി:) ഹി:)
ബിന്ദു. | 16-Jan-07 at 3:42 am | Permalink
സൂവെന്താ സമസ്യാ പൂരണത്തിനു ഇട്ടതാണോ? 🙂
Su | 16-Jan-07 at 3:46 am | Permalink
ഞാനൊന്നു ചിരിച്ചുനോക്കിയതാ ബിന്ദൂ. 🙂
ഇടിവാള്‍ | ItIVal | 16-Jan-07 at 4:11 am | Permalink
ഉമേഷ്ജീയേ, നല്ല അസ്സലു പോസ്റ്റ്. വായിച്ചു ശരിക്കും ചിരിച്ചൂ.
രണ്ടു കാര്യങ്ങള്‍ പറയട്ടേ:
1- മറ്റേ യൂണിയന്റെ പ്രസിഡന്റു സ്ഥാനം ഞാന്‍ രാജി വച്ചിട്ട് കുറേ കാലമായി. ക്രൌണ്‍ പ്രിന്‍സ് ആയ ദില്‍ബാസുരന്‍ ഈ സ്ഥാനത്ത് അവരോധിക്കപ്പെട്ടിരിക്കുന്നു 😉
2- അര്‍മാദം എന്ന വാക്ക്: സൂ പറഞ്ഞപോലേ മലയാള സില്‍മാ നടന്‍ ഇന്നസെന്റ് കണ്ടു പിടിച്ച വാക്കാണിത്. “ഇഷ്ടം” എന്ന ദിലീപ് സില്‍മയില്‍, കെളവന്മാരായ നെടുമുടി വേണുവും, ഇന്നസെന്റും കൂടി ഒരു വീട്ടില്‍ കല്യാണത്തലേന്നു പോകുന്നു. അവിവാഹിതനും, സ്വല്പം വോള്‍ടേജ് കൂടിയവനുമായ ഇന്നസെന്റ് അവിടത്ത കളര്‍ സ്ത്രീജനങ്ങളെ കണ്ട് രോമാഞ്ചകഞ്ചുകിതനായി തിരിച്ച് റൂമില്‍ വന്നു നെടുമുടിയോട് പറയുന്നതാണ്.. “ ടോ , നല്ല കിളി പോലത്ത പെന്‍പിള്ളേരാ വന്നിരിക്കുന്നേ, ഇനി രണ്ടു ദൂസത്തേക്ക് അര്‍മാദം തന്നെ അര്‍മാദം..
ഈ പടം ഇറങ്ങിയ കാലത്ത്, മഹീന്ദ്രാ കമ്പനി “അര്‍മാദ” എന്നൊരു 4 വീല്‍ ഡ്രൈവ് ലോഞ്ചു ചെയ്തിരുന്നു. ഇതിന്റെ പരസ്യം കിട്ടാന്‍ മഹീന്ദ്രക്കാരു ഇനസെന്റിനു കൈക്കൂലി കൊടുത്ത് നിര്‍മ്മിച്ചതാണീ പദം എന്നു വാദമുണ്ട്..
എന്തരോ എന്തോ…
ഒരു “ണപ്പ് “ ( അടിപൊളി എന്നതിനുള്ള തൃശ്ശൂര്‍ വാക്കാ) വാക്ക് ബൂലോഗത്തിനും മലയാളത്തിനും കിട്ടീന്ന് പറഞ്ഞാ മതീല്ലോ..
“അഥാ യധാ അര്‍മാദി
തരോ ഇന്നസെന്റായ നമ:“
“അര്‍മാദിക്കുക എന്ന വാക്ക് തന്ന ഇന്നസെന്റിനെ നമിക്കുന്നു എന്നു വ്യംഗ്യം”
Adithyan | 16-Jan-07 at 4:21 am | Permalink
ഈ പോസ്റ്റില്‍ എനിക്ക് തന്ന കവറേജിന് എന്റെ സ്വന്തം പേരിലും പിന്നെ ഞാനാകുന്ന പ്രസ്ഥാനത്തിന്റെ പേരിലും നന്ദി രേഖപ്പെടുത്തിക്കൊള്ളുന്നു. എന്റെ അടുത്ത പോസ്റ്റില്‍ ഉമേഷ്ജീടെ പേര് രണ്ടുമൂന്നെടത്ത് പറയുകയും ആരും വായിക്കാതെ പൊടിപിടിച്ചു കിടക്കുന്ന രണ്ടുമൂന്ന് പോസ്റ്റുകളിലേക്ക് ലിങ്ക് കൊടുക്കുകയും ചെയ്യുന്നതാരിക്കും.
🙂
പിന്നെ സ്ലോകത്തെക്കുറിച്ച് പറഞ്ഞാല്‍…
“രണ്ട് നാലു പോസ്റ്റുകൊണ്ടൊരുത്തനെ ബ്ലോഗിനടിമയാക്കുന്നതും ഗൂഗിള്‍
കമന്റില്‍ നൂറടിച്ച് മന്നന്റെ പോസ്റ്റില്‍ തേങ്ങമാത്രമാക്കുന്നതും ഗൂഗിള്‍”
സ്ലോകം അത്ര പോരല്ലെ? സാരമില്ല, ഞാന്‍ ഒരു നൂറടിച്ചിട്ട് ഒന്നൂടെ ഒന്ന് എഴുതിനോക്കാം.
കുറുമാന്‍ | 16-Jan-07 at 6:15 am | Permalink
ഇത് അമറന്‍ പോസ്റ്റ് തന്നെ. പക്ഷെ സ്വന്ത വീട്ടുപടിക്കല്‍ സ്വയമായി തേങ്ങ ഉടച്ചതിനോട് ശക്തിയായി വിയോജിക്കുന്നു. (ഉമേഷ്ജി എന്താ ശബരിമലക്കു പോകുവാണോ, സ്വന്തം വീട്ടുപടിക്കല്‍ തേങ്ങ ഉടച്ചിട്ട്?)
മറ്റുള്ളവരുടെ അവസരങ്ങള്‍ തട്ടിതെറിപ്പിക്കുന്ന ഇത്തരം ബൂര്‍ഷ്വാത്തരത്തിനെതിരെ ഇന്നുമുതല്‍ ബ്ലോഗും കവലയില്‍ ഞങ്ങള്‍ സത്യാഗ്രഹമിരിക്കുന്നതാണ്.
Umesh::ഉമേഷ് | 16-Jan-07 at 6:22 am | Permalink
ബിന്ദൂ,
ബിന്ദുവിന്റെ തലയ്ക്കു സ്ഥിരതയുണ്ടെന്നു ഞാന്‍ പറഞ്ഞില്ലല്ലോ. നൂറടിച്ചാലും അതു കുറയുകയില്ല എന്നല്ലേ പറഞ്ഞുള്ളൂ? [പൂജ്യത്തില്‍ നിന്നെങ്ങനെ കുറയാന്‍ എന്നു് ആത്മഗതം]
സന്തോഷു നൂറടിച്ചീടില്‍
മദ്യപിക്കാതെ മത്തനാം
ബിന്ദൂട്ടി നൂറടിച്ചീടില്‍
കഞ്ചാവില്ലാതെ വട്ടുമാം
എന്നു കവിവചനം.
മുകളില്‍ക്കൊടുത്ത ശ്ലോകത്തിന്റെ അലങ്കാരം ‘വിഭാവന’.
കാര്യം കാരണമെന്യേ താന്‍
വരുന്നതു വിഭാവന
എന്നു ലക്ഷണം.
തറവാടി | 16-Jan-07 at 6:22 am | Permalink
ഉമേഷേട്ടാ ,
ഇത് നന്നായി,
ഒപ്പം ഒന്നൂടെ പറയട്ടെ , എനിക്കേറ്റവും അസഹ്യമായ വിളി ആ ” ഗുര്വോ” എന്നതാണ്‌
ഗുരുക്കളെ ഏറ്റം ബഹുമാനിക്കുന്ന എനിക്കും അങ്ങിനെ തോന്നണമെങ്കില്‍ എന്തായിരിക്കും കരണം എന്ന് പലപ്പോഴും ആലോചിച്ചിട്ടുണ്ട്.
ശ്രീജിത്ത് കെ | 16-Jan-07 at 7:06 am | Permalink
കലക്കന്‍ ശ്ലോകം. അതിന്റെ വിവരണം അതിലും പഷ്ട്. ഉമേഷേട്ടാ തൊഴുന്നു.
ഓഫ് യൂണിയന്‍ ബ്ലോഗിന്റെ ഗ്രാഫിക്സ് കുമാറേട്ടന്‍ എന്നത് മനസ്സിലായില്ല. ആ മനുഷ്യന്‍ ആ വഴിയെങ്ങും പോയിട്ടില്ല എന്റെ അറിവില്‍.
വിശാല്‍ജി നല്‍കിയ ആദ്യ സംഭാവനയും പിടികിട്ടിയില്ല.
ഓ.ടോ: ഈ തേങ്ങായടി ഇത്തിരി അരോചകമായിപ്പോകുന്നു ബ്ലോഗില്‍ ഈയിടെയായി. പോസ്റ്റിനെക്കുറിച്ചോ പോസ്റ്റ് ഇട്ട ആളിനെക്കുറിച്ചോ ഒരു ബന്ധവുമില്ലാത്ത ഈ ഒരു കമന്റ് ഓഫ് ടോപ്പിക്ക് പോലും ആകുന്നില്ല. ആരും തെറി വിളിച്ചിട്ട് കാര്യമില്ല. ഞാന്‍ പണ്ടെ ചെവി പൊത്തി.
psprasad | 16-Jan-07 at 10:19 am | Permalink
ഉമേശന്‍ മാഷിന്റെ പോസ്റ്റുമോര്‍ട്ടം മേശയിലേക്ക്‌ ഇതാ ഒരു വികൃതി, വൃത്തവും ചതുരവും വടിവുമില്ലാതെ.)
കിട്ടാനുള്ളത്‌ കിട്ടിയാലുമേതോ കമ്പിപ്പാരയുമായ്‌ വരും കമണ്ടര്‍*
ചുറ്റാനുള്ളൊരു സമയവും വൃഥാ ചാറ്റിത്തുപ്പിയിടയ്‌ക്കീര്‍ഷ്യയാല്‍
തമ്മില്‍ക്കോര്‍ത്തും തരികിടകളിച്ചും പിന്നെസ്‌സോറിപറഞ്ഞൊഴിഞ്ഞും
ഇല്ലാതുള്ളൊരു ബാക്കിനേരമൊത്താലോഫീസ്‌ജോലി തികച്ചിടും പലര്‍!
======================
കമണ്ടര്‍* = മണ്ടന്മാരായ കമന്റ് രചയിതാക്കള്‍ എന്ന അര്‍ഥത്തില്‍
atulya | 16-Jan-07 at 10:48 am | Permalink
ആനയെക്കൊണ്ടു ചവിട്ടിക്കും എന്നു കേള്‍ക്കുന്നു!! I Object your honour. 🙂
(
Umesh::ഉമേഷ് | 16-Jan-07 at 2:22 pm | Permalink
സാരമുള്ള വചനത്തിലൊക്കെയും
നീരസാര്‍ത്ഥമറിയുന്നു ദുര്‍ജ്ജനം
ക്ഷീരമുള്ളൊരകിടിന്‍ ചുവട്ടിലും
ചോര തന്നെ കൊതുകിന്നു കൌതുകം.
വെറുതെ ഒരു ശ്ലോകം ചൊല്ലിയതാണു്. “ചവിട്ടിക്കും” എന്ന വാക്കു കണ്ടപ്പോള്‍ അതുല്യയ്ക്കു തോന്നിയതു വായിച്ചിട്ടല്ല 🙂
siji | 16-Jan-07 at 2:30 pm | Permalink
ന്ദേ..ഇത് ഇവിടെയും പോസ്റ്റിയോ?
ശ്ലോകം കിടിലന്‍.അര്‍ഥം പറഞ്ഞുതന്നതു നന്നായി.ഇതിന്‌ ഞാന്‍ മേറ്റെന്തല്ലാമര്‍ഥങ്ങളാണ്‌ കണ്ടത്‌ എന്റമ്മോ..അതുതന്നെയാ എനിക്കും ചോദിക്കാനുള്ളത്‌ എവിടെ നിന്നാ ഞാന്‍ യെം.എ ഏടുത്തത്‌.
Umesh::ഉമേഷ് | 16-Jan-07 at 3:10 pm | Permalink
ഇടിവാളേ,
പ്രെസിഡന്റ് സ്ഥാനത്തു നിന്നു മാറ്റി എക്സ്-പ്രെസിഡന്റ് ആക്കിയിട്ടുണ്ടു്. ദില്‍ബാസുരനെ തത്‌സ്ഥാനത്തു പ്രതിഷ്ഠിക്കുകയും തത്രഭവാ‍ന്റെ പേരിനെപ്പറ്റി ഇപ്പോള്‍ തോന്നിയ ഒരു പാര കാച്ചുകയും ചെയ്തിട്ടുണ്ടു്. വായിക്കാന്‍ വിട്ടുപോകണ്ടാ.
പതാലി, ബൂലോഗക്ലബ് ഇവയിലേക്കു ലിങ്കു കൊടുത്തു. സ്മൈലിയുടെ അര്ത്ഥം പുനര്‍‌നിര്‍വചിച്ചു. ഇത്രയൊക്കേയുള്ളൂ വ്യത്യാസങ്ങള്‍. ഒന്നുകൂടി വായിച്ചാല്‍ നഷ്ടമുണ്ടാവില്ല എന്നര്‍ത്ഥം.
ഋ | 16-Jan-07 at 3:32 pm | Permalink
ബൂലോഗവിക്രീഡിതം
ഹിഹി
രാജ് | 16-Jan-07 at 4:45 pm | Permalink
എന്റെ നിരീക്ഷണത്തില്‍ (ചാറ്റും മെയിലും പിന്മൊഴീം നിരീക്ഷിച്ചതില്‍ നിന്ന്) ഹി ഹി എന്ന ചിരിച്ചി feminine ആണ്, ഹാഹാ എന്ന ചിരി masculine ടോണും. എന്നാലും ചിലപ്പോഴൊക്കെ ഹിഹി എന്ന് ചിരിച്ചു പോകും, അത് പിന്നെ ഉമേഷ്ജി സിന്ധുച്ചേച്ചീടെ സ്വാധീനം മൂലം അടുക്കളയില്‍ കഞ്ഞി വയ്ക്കുന്നില്ലയോ!
ഏവൂരാന്‍ | 16-Jan-07 at 5:24 pm | Permalink
നന്നേ സുഖിച്ചു,.! 🙂 ഉമേശ ഗുരുക്കള്‍ക്ക് നന്ദി.. 🙂
തനിമലയാളം ഓടിക്കാന്‍ ഒരു ലിനക്സ് സര്‍വറും നല്ല ഇന്റര്‍നെറ്റ് കണക്‍ഷനും നോക്കി നടന്ന ഏവൂരാന്‍ പല തവണ ആവശ്യപ്പെട്ടിട്ടും ഒരെണ്ണം സെറ്റപ്പ് ചെയ്യാഞ്ഞ ഉമേഷിനെ അതിനു പ്രേരിപ്പിക്കാന്‍…
നോക്കി നടന്നുവെന്നല്ല, ഇപ്പോഴും നടക്കുകയുമാണു്. ഞാന്‍ കരുതി സൌകര്യപൂര്‍വ്വം ഇതൊക്കെ അങ്ങ് മറന്നു കളഞ്ഞുവെന്നു്. 🙂 ഓരോ തവണയും ഉമേഷിനെ വീഴ്‌ത്താന്‍ വിരിക്കുന്ന വലയില്‍, മറ്റാരെങ്കിലും കുടുങ്ങും. ഇത്തവണയും “ഏതോ” ഒരാള്‍ [ഏതോ ഒരു ശകുന്തള എന്ന രീതിയില്‍.. 🙂 ] ആ വലയ്ക്ക് അടുത്തു കൂടെ ഉലാത്തുന്നുണ്ട് — പറഞ്ഞു ഞാന്‍ jinx ആക്കുന്നില്ല, പൂര്‍ണ്ണമായും വീണു കഴിയുമ്പോള്‍ അറിയിക്കാം, ആര്‍മ്മാദിക്കാം.
🙂
jyothirmayi | 16-Jan-07 at 5:34 pm | Permalink
ഇതു ചിലബ്ലോഗുലോബികള്‍ ആ ചാരുകസേരയിലിരിയ്ക്കുന്ന ആചാര്യനെ സ്വാധീനിച്ച്‌ എഴുതിച്ചതാണോ? അതോ വക്കാരി ജ്യോതിയോടിടയാന്‍ വേണ്ടി തയ്യാറാക്കിയതാണോ, അതുമല്ലെങ്കില്‍ ….
ഒരു സി.ബി.ഐ…
(പാരാബ്ലോഗിന്‌ ഒരു സാമ്പിള്‍:-)
പോസ്റ്റ് കൊള്ളാം. ശ്ലോകം രസികന്‍.
പിന്നെ, ജീ, എന്നത് ബഹുമാനം കാണിയ്ക്കാനാണ്‌. പച്ചമലയാളത്തില്‍ പറഞ്ഞാല്‍ to keep (some) distance. എല്ലാവരേയും ബഹുമാനിയ്ക്കാന്‍ പഠിയ്ക്കണം:-)
പുള്ളി | 17-Jan-07 at 4:12 am | Permalink
ഇടീ,
‘ആര്‍മാദം’ ഇന്നസെന്റ് പോപ്പുലറൈസ് ചെയ്തു എന്നേയുള്ളൂ. ഇഷ്ടത്തില്‍ ഇന്നസെന്റ് പറയുന്നതിന്‌ മുന്‍പു തന്നെ ചാലക്കുടി/അങ്കമാലി/ആലുവാ ഭാഗങ്ങളില്‍ എന്‍ എച് 47ന്‌ ഇരുവശങ്ങളിലും ഒരു 8-10 കി.മീ. ചുറ്റളവില്‍ ഉപയോഗത്തിലുണ്ടായിരുന്നതായി ലേഖകന്‌ (കട: ചിത്രകാരന്‍) അറിയാം. ഉന്‍മാദം കരളിലൊരുന്മാദം എന്നപോലെ ആര്‍മാദം കരളിലൊരാര്‍മാദം എന്ന് പാടി സൈക്കിളില്‍ നിന്നു ചവുട്ടി സെക്കന്റ്‌ ഷോയ്ക്ക്‌ പോയിരുന്ന ഒരു സംഘത്തിലെ അംഗമായിരുന്നൂ ഞാന്‍,
“ഇഷ്ടം” പുറത്തിറങ്ങുന്നതിനു മുന്‍പ്‌ തന്നെ.
പിന്നെ, നമുക്ക് ഈ ബൂലോഗത്തില്‍ നിന്ന് എല്ലാവര്‍ഷവും ഓരോ വേര്‍ഡ് ഓഫ് ദ ഇയര്‍ തിരഞ്ഞെടുത്താലോ?
പുറത്തിറങ്ങിയിട്ട് കുറച്ചായെങ്കിലും ആര്‍മാദം ഒരു നല്ല കാന്‍ഡിഡേറ്റ് ആണ്…
ദില്‍ബാസുരന്‍ | 17-Jan-07 at 5:29 am | Permalink
ഉമേഷനണ്ണാ,
ഒരു ഇള്ളാവാവയുടെ മുഖമുള്ള ആ സാധുവിനെ എന്തിനു്‌ അസുരന്‍ എന്നു വിളിക്കുന്നു എന്നു് ആര്‍ക്കെങ്കിലും സംശയമുണ്ടെങ്കില്‍ ഇപ്പോള്‍ തീര്‍ന്നല്ലോ
എല്ലാര്‍ക്കും തീര്‍ന്നല്ലോ?
ഇതാണ് വ്യക്തിഹത്യ. അല്ലാതെ കുമാറേട്ടന്‍ ഫോട്ടോഷോപ്പില്‍ പറ്റ്ബുക്കിലെഴുതിച്ച് ചെയ്യുന്ന കളികളല്ല. പിന്നെ ‘ജഞ്ജലിപ്പിനെ പറ്റി പറയാഞ്ഞതെന്തേ?
ഓടോ: ഈ അടുത്ത കാലത്തൊന്നും സംസ്കൃത പോസ്റ്റുകള്‍ വായിച്ച് ഇത്ര ഭയങ്കരമായി ചിരിച്ചിട്ടില്ല.(മനസ്സിലാവാതെ ഇളിഞ്ഞ ചിരി കുറേ ചിരിച്ചിട്ടുണ്ടെങ്കിലും) 🙂
അഗ്രജന്‍ | 17-Jan-07 at 11:32 am | Permalink
നല്ല രസികന്‍ പോസ്റ്റ് – ങു… ങും… രസിക്കാതിരിക്കില്ലല്ലോ…തേങ്ങയുടെ പേരിലാണെങ്കിലും അഗ്രജനും ഒരിരിപ്പിടം (ഒന്നല്ല രണ്ടിടത്ത്) കിട്ടിയതല്ലേ :))
തേങ്ങാകച്ചോടൊക്കെ ഇപ്പോ വളരെ മോശം… പുത്യേ കൊറേ കച്ചോടക്കാരുള്ളോണ്ട് മാര്‍ക്കറ്റില്‍ പിടിച്ചുനില്‍ക്കാന്‍ ഭയങ്കര പാടാ 🙂
സന്തോഷ് | 18-Jan-07 at 7:05 am | Permalink
ആദി, യതുല്യ, യുമേഷു, കുമാറു, നിഷാദു, വിശാല, ദിവാ, സിബു, ദില്‍ബനു, മിഞ്ചീം
ബിന്ദു, സു, ഡാലി, യമുല്ലയുമങ്ങനെ, ബെന്നി, മൊഴീ, മിടിവാള, രവിന്ദതു, സാക്ഷീ,
ലാപുട, വിശ്വ, മനൂ, കുറുമാ, നനിലും, ശനിയന്‍, പെരിയോന്‍, ഷിജു, ദേവ, മനു, ശ്രീ,
ജ്യോതി, കരിത്തലയന്‍, നള, നെന്നിവരൊക്കെ ബുലോഗ വനത്തിലെ പുപ്പുലികള്‍ താന്‍!
എന്നൊന്ന് തട്ടിക്കൂട്ടിയിട്ടുണ്ട്. ഇതേപ്പറ്റി ഒരു പോസ്റ്റുതന്നെ ഇവിടെ ഇടുകയും ചെയ്തു.
ഗുപ്തന്‍ | 11-Mar-09 at 11:19 am | Permalink
സംഗതി കൊള്ളാം …പക്ഷെ…
ബ്ലോഗാറില്ല, കമന്റുവാന്‍ കഴികയി, ല്ലേവൂര്‍ജി തന്‍ സര്‍വറില്‍
പോകാറി, ല്ലൊരു തേങ്ങയില്ലെറിയുവാ, നാര്‍മ്മാദമില്ലൊട്ടുമേ
മൊത്തത്തില്‍ ഒരു ഇല്ല വിട്ടുപോയിട്ടില്ലേ എന്നൊരു സംശയം.
ഏവൂര്ജി തന്‍ സെര്വറില് പോകാറില്ല, ഇല്ലൊരു തേങ്ങയെറിയുവാന്‍ , അര്‍മാദമില്ലൊട്ടുമേ എന്ന് മൂന്നുകാര്യങ്ങളാണെങ്കില്‍ വിട്ടുപോയിട്ടുണ്ട്.
ശ്ശെടാ, മലയാളത്തിലും എഴുതണോ പദച്ഛേദവും അന്വയവും ഒക്കെ?
ബ്ലോഗാറു് ഇല്ല
കമന്റുവാൻ കഴികയില്ല
ഏവൂർജി തൻ സർവറിൽ പോകാറില്ല
ഒരു തേങ്ങ ഇല്ല എറിയുവാൻ
ആർമ്മാദമില്ല ഒട്ടുമേ
ഹാ കഷ്ടം
ഹിഹി, സ്മൈലി തൊട്ട ചിരി ഇല്ല
ഓഫ് ഇല്ല
പിന്നെ എന്തരോ ആകട്ടേ
(അല്ലയോ) ഗഡീ
പോസ്റ്റുവായനയെ നിർത്തീടൊല്ല
ശുട്ടീടുവേൻ
എവിടെയാ ഗുപ്താ ഒരു ഇല്ല കുറഞ്ഞതു്? ശുട്ടീടുവേൻ!
ഗുപ്തന്‍ | 11-Mar-09 at 2:13 pm | Permalink
ഏവൂരാന്റെ സെര്വറില് പോകുക, തേങ്ങയടിക്കുക, അര്മ്മാദിക്കുക – ഇതുമൂന്നും മൂന്നുകാര്യങ്ങളായിട്ടാണ് പറയുന്നതെങ്കിലേ പ്രശ്നമുള്ളൂ എന്നു ഞാന്‍ പറഞ്ഞിട്ടുണ്ടല്ലോ ഉമേഷ്ജീ.
തേങ്ങയടിക്കാന്‍ അര്മ്മാദമൊട്ടുമില്ല എന്നാണെങ്കില്‍ പ്രശ്നമില്ല; അങ്ങനെ പറഞ്ഞാല്‍ ഉമേഷ്ജി മുകളില്‍ പറഞ്ഞിരിക്കുന്ന അര്ത്ഥം [[തനിമലയാളം പേജില്‍ പോകാറുപോലുമില്ല, വായിച്ചില്ലെങ്കിലും പേജു വരെ പോയി ഒരു തേങ്ങായടിക്കുകയും കൂടിയില്ല, വായിച്ചു കമന്റിട്ടു അതിന്റെ ബാക്കി കമന്റിട്ടു നൂറടിച്ചു രസിക്കാറില്ല.]]കിട്ടാന്‍ ഒരുപാട് അധ്വാനിക്കേണ്ടിവരും എന്നേയുള്ളൂ
Sorry about typos: Keyman not working. Your keybord also is not perfect in Winodows Italian version
ഗുപ്തന്‍ | 11-Mar-09 at 2:32 pm | Permalink
‘Also’ in the above comment cuz I have problems using keyman, varamozhi and other translit. programmes in windows italian version. It does not refer to any other problem 😉
I have used your keyboard in Win Eng version without much difficulty.
Umesh:ഉമേഷ് | 11-Mar-09 at 2:49 pm | Permalink
ഈ ഗുപ്തൻ എന്താണു പറയുന്നതെന്നു വേറേ ആരെങ്കിലും ഒന്നു പറഞ്ഞുതരുമോ പ്ലീസ്?
പോകാറില്ല, തേങ്ങ ഇല്ല, ആർമാദമില്ല എന്നു മൂന്നു് ഇല്ലകൾ ഉണ്ടല്ലോ…
ഗുപ്തന്‍ | 11-Mar-09 at 4:01 pm | Permalink
യ്യൊ..ശരിയാണേ..മേയാകുള്‍‌പാ.. ആ –ല്ലൊരു തേങ്ങയില്ലെറിയുവാനിലെ രണ്ടാമത്തെ ല്ല പത്തുതവണ വായിച്ചിട്ടും കണ്ണില്‍ പെട്ടില്ല. ഉറക്കക്ഷീണം :))
ഗുപ്തന്‍ | 11-Mar-09 at 4:04 pm | Permalink
ഡിലീറ്റ് ബട്ടന്‍ വച്ചില്ലെങ്കില്‍ ഈ ബ്ലോഗില്‍ കമന്റിടില്ല എന്ന് തീരുമാനിക്കേണ്ടിവരും ..മാനം രക്ഷിക്കാന്‍ ഒരു മാര്‍ഗം തരൂ…